Un totau de 164.247 persones votaràn peth prumèr còp enes eleccions entath Parlament de Catalonha deth 27S

Eth cens electorau definitiu de 2015 ei de 5.510.798 persones, 96.930 mès qu'enes comicis entath Parlament de hè tres ans

I a 196.062 persones residentes en estrangèr cridades as urnes

Eth Burèu deth Cens Electorau der Institut Nacionau d´Estadistica (INE) a barrat eth cens definitiu entàs eleccions entath Parlament deth 27 de seteme e un totau de 5.510.798 persones son cridades a votar. D´aqueres persones, 164.247 son naui electors. En Barcelona i a 121.960 que votaràn peth prumèr còp en ues eleccions entath Parlament de Catalonha; en Girona, 16.078; en Lhèida, 9.119, e en Tarragona, 17.090.

En aguesti comicis i a, en totau, 96.930 persones mès inscrites en cens electorau, en comparason damb es comicis precedenti celebradi en 2012. Eth Cens d´electors residents absenti (CERA) ei de 196.062 persones, 39.545 residents en estrangèr mès qu'enes eleccions anteriores.

D´aguest totau, 4.124.321 persones son dera circonscripcion de Barcelona (que 151.546 son enregistrades en estrangèr); 510.823, dera circonscripcion de Girona (15.266 en estrangèra); 313.736, dera circonscripcion de Lhèida (14.623 en estrangèr), e 561.918, dera circonscripcion de Tarragona (14.627 en estrangèr). Enes darrèri comicis entath Parlament de Catalonha de 2012, eth cens electorau siguec de 5.413.868 persones, 96.930 catalans mens qu'enes eleccions d´aguest mes de seteme.

Cens electorau definitiu per demarcacions electoraus

Mès de 3.500 consultes atengudes

Eth Govèrn dera Generalitat a metut a disposicion des ciutadans diuèrsi canaus entà arrecéber informacion sus es eleccions, qu'an arrecebut, en un mes, mès de 3.500 consultes. Era majoritat d´aqueres consultes èren restacades damb eth vòt per corrèu en Estat e en estrangèra, e tanben damb eth cens electorau.

Eth canau principau ei eth web www.parlament2015.cat, qu'amasse tota era informacion sus eth calendari electorau, es qüestions frequentes, era norma, era composicion des juntes electoraus, eth directòri des juntes, es donades estadistiques, eca. Coma nauetat, en aguesta escadença, eth portau includís sèt vidèos tutoriaus sus es tèmes següents: membres de mèses electoraus, vòt presenciau, vòt per corrèu, vòt des electors catalans que residissen en estrangèr de  manèra  permanenta, vòt des electors catalans que se tròben temporauments en estrangèr, vòt accessible entàs persones non vedentes e vòt entà persones malautes o andicapades que non se pòden desplaçar. Eth web ei en quate lengües: catalan, occitan, castelhan e anglés.

Ath delà deth web electorau, es ciutadans e ciutadanes tanben se pòden informar e resòlver dobtes sus es tramits que tòquen ath procès electorau enes hilats sociaus, corrèu electronic (eleccions.governacio@gencat.cat), per miei de telefonia mobila e telefonicament.

Ua auta nauetat ei era possibilitat d´utilizar era aplicacion de messatgeria instantanèa entà dispositius mobils Telegram entà demanar informacion e resòlver dobtes sus es eleccions. Tanben, com en d´autes escadences, s´atien es consultes via telefonica a trauès deth 012 e deth Centre d´Atencion Telefonica qu'a metut marcha eth Departament de Governacion e Relacions Institucionaus, damb eth numèro 93 551 59 90.