Eth Departament tanben sollicite un relambi dera data der escrutinh generau, qu'ei eth 30 de seteme
Governacion argumente qu'era documentacion entà votar encara non s´a pogut enviar, a causa des diuèrsi recorsi presentadi ath Tribunau Constitucionau
Eth Departament de Governacion e Relacions Institucionaus a demanat ara Junta Electorau Centrau (JEC) ua prorròga deth termini entà qu'es catalans residents en estrangèr e poguen enviar eth vòt per corrèu enes eleccions entath Parlament de Catalonha deth 27 de seteme. Eth termini acabe eth 22 de seteme entàs residents permanents en estrangèr (CERA) e eth 23 de seteme entàs que i viuen de manèra temporau (ERTA), cossent damb er article 75 dera LOREG e er article 5.1 dera Reiau decrèt 1621/2007, de 7 de deseme, respectivaments.
Era arrason dera sollicitacion ei que, a conseqüéncia des recorsi presentadi deuant eth Tribunau Constitucionau contra era proclamacion de candidatures enes quate circonscripcions catalanes, ara ora d´ara encara non s´a pogut enviar era documentacion entà poder votar per corrèu en exterior. Aqueth endarrieratge pòt provocar qu'es electors que se tròben en estrangèr e qu´agen demanat eth vòt per corrèu non arreceben es paperetes damb pro de temps entà votar laguens deth termini legau establit.
Egalaments, s'eth JEC autorize alongar eth termini d´enviament de vòt, eth Departament de Governacion e Relacions Institucionaus demane un relambi des madeishi dies ena data der escrutinh generau, qu'ei eth 30 de seteme. En aguest cas, era peticion se hè entà evitar que, maugrat auer votat laguens des terminis establidi, es vòts non se poguen comptabilizar pr'amor qu'arriben mès tard deth 30 de seteme, a causa dera prorròga der enviament deth vòt per corrèu.