- Era conselhèra de Governacion a presentat era aplicacion coma "un estrument gratuït ath servici des ciutadans entà facilitar informacion en temps reau"
- Bères foncionalitats son proposicions gessudes d'un concors d'idèes ciutadanes que se hec entà melhorar era aplicacion des eleccions de 2012
- Era opcion "Eth mèn parlament" permet de hèr simulacions e configurar aliances des candidatures
Era conselhèra de Governacion e Relacions Institucionaus, Meritxell Borràs, a presentat aué era aplicacion Eleccions 27S, que permeterà de consultar en telefon mobil o ena tauleta es auanci de participacion e es resultats der escrutinh des eleccions entath Parlament de Catalonha de dimenge que ven. "Un còp mès, eth Govèrn met ath servici des ciutadans un estrument gratuït entà facilitar informacion damb totes es donades e en temps reau", çò a declarat era conselhèra Borràs.
Era titulara de Governacion a soslinhat qu'aquera aplicacion incorpòre foncionalitats sorgides d'un procès participatiu. "Era Generalitat dauric en 2013 un concors d´invencions entà melhorar era aplicacion des eleccions entath Parlament de 2012", çò a dit. "Es suggestions mès votades peth public e avalorades per un grop d´expèrts se tengueren en compde entara aplicacion actuau".
Meritxell Borràs a explicat es novetats dera aplicacion Eleccions 27S, que permeterà de seguir es donades de participacion e es resultats ath detalh a diuèrsi nivèus (Catalonha, circonscripcions, comarques e municipis) e comparar-les damb es des eleccions entath Parlament de 2012. Era novetat, en aguest cas, ei que s´ahig era possibilitat d'auer-les per comarca. Ath delà, er usatgèr tanben a era opcion de mercar coma favorit un determinat municipi, comarca o circonscripcion que se volgue seguir de manèra preferenta.
Era conselhèra tanben a soslinhat d'autes foncionalitats naues qu´a incorporat era aplicacion, coma una seccion damb informacion detalhada des resultats des candidatures, a on apareishen donades sus es vòts, eth percentatge de vòt e es escons obtengudi entà cada formacion, tant a escala de Catalonha coma de circonscripcion. "A compdar des vòts compdats en escrutinh e deth corresponent despartiment d´escons, es usatgèrs poderàn saber tanben eth nòm des candidats elegidi qu'entren en Parlament de Catalonha", çò a explicat.
Interaccion damb er usatgèr e damb es hilats sociaus
Ua auta novetat d'aguesta aplicacion ei era foncionalitat "Eth mèn Parlament", qu'es persones usatgères pòden hèr simulacions, configurar aliances des candidatures e comparar s'obtien majoritat a compdar dera soma d´escons a mesura qu'auance er escrutinh. Es aliances se pòden quitament definir abans deth dia des eleccions entà dempús poder-ne hèr eth seguiment.
Fin finau, es resultats, era participacion e "Eth mèn Parlament" se pòden comunicar e partejar coma imatge a trauès des hilats sociaus mès coneishudi.
Eleccions 27S ei ua aplicacion mobila gratuïta disponibla en catalan, castelhan e anglés entà iOS e Android e se pòt descargar d'aguest ligam: http://www.parlament2015.cat/ca/app
Concors entà captar idèes
Era aplicacion Eleccions 27S a estat desvolopada en bona part gràcies as aportacions hètes pes usatgèrs dera aplicacion qu'eth Govèrn lancèc en escadença des darrères eleccions catalanes. Quauqui mesi dempús deth lançament dera aplicacion, era Generalitat metec en marcha era iniciatiua Invencions Dubèrtes, entà amassar es suggestions des usatgèrs e melhorar era aplicacion. Entre es mesi de hereuèr e març de 2013, un web amassèc es suggestions e es mès votades peth public e avalorades dempús per un grop d´expèrts s´an incorporat en aquera aplicacion. Es idèes incorporades son es foncionalitats "Eth mèn Parlament" e era lista de nòms de deputats qu'entren en Parlament, que se pòt consultar en temps reau.
Parlament 2012 ei ua aplicacion mobila gratuïta qu'era Generalitat creèc entà seguir es eleccions catalanes deth 25 de noveme de 2012. Siguec era prumèra aplicacion en Euròpa qu'un Govèrn e metie a disposicion des ciutadans entà seguir en temps reau es resultats des eleccions. Solament en quate dies artenhec aperaquí 80.000 descargues dempús 120 païsi e venguec era prumèra en classament des aplicacions mobiles gratuïtes descargades des mercats d´Apple e Google.