- Era titulara de Governacion soslinhe que "mos trapam deuant d´un rendètz-vos istoric" e que " es uelhs deth mon seràn deman metudi sus Catalonha"
- Era conselhèra a explicat que i a 550 jornalistes acreditadi, dont 180 son de mejans internacionaus; ua mòstra, çò a dit, der interès que desvelhen aguestes eleccions
- A planhut era insensebilitat demostrada pera Junta Electorau Centrau (JEC) as peticions deth Govèrn entà alongar eth tèrme de vòt en estrangèr, çò qu'a hèt que fòrça catalans residents en exterior non agen arrecebut es bulletins de vòt
En escadença dera celebracion des eleccions entath Parlament de Catalonha deth 27 de seteme, eth Departament de Governacion e Relacions Institucionaus pren en carga era organizacion deth centre de difusion de donades, installat en Parlament (parc dera Ciutadèla, s/n).
Era conselhèra de Governacion e Relacions Institucionaus, Meritxell Borràs, a presentat as mejans de comunicacion es espacis abilitadi entath seguiment e entara difusion des donades des eleccions e a explicat quin ei eth dispositiu que se desplegarà entath corrècte foncionament dera jornada electorau.
"Eth Departament de Governacion e Relacions Institucionaus e eth Govèrn dera Generalitat auem trabalhat fòrça entà garantir que tot sigue prèst entà deman", çò a dit Meritxell Borràs. "Damb era tòca que cap de catalan que volgue votar demore sense podè´c hèr".
En aguest sens, era conselhèra a arregraït eth trabalh des milèrs de persones que trabalharàn en dispositiu electorau entà assegurar que tot foncione ben. "Mos trapam deuant d´un rendètz-vos istoric e per açò eth nòste nivèu d´exigéncia ei estat tanben plan naut".
Era conselhèra a explicat que i a 5.510.798 persones cridades as urnes, que compòsen eth cens electorau entad aguestes eleccions, que 196.062 son residents en estrangèr.
Problèmes damb eth vòt en estrangèr
Borràs a soslinhat que i a agut un increment important en vòt per corrèu. Atau, 131.062 ciutadans an sollicitat de votar per corrèu, era majoritat en Estat espanhòu. D´un aute costat, era conselhèra a planhut que i age agut catalans residents en estrangèr que volien votar e non ac an pogut hèr pr'amor que non an arrecebut a temps es paperetes. A arrebrembat qu'eth Govèrn a sollicitat tres còps ara Junta Electorau Centrau ua prorròga deth tèrme entà votar que non ei estada concedida, maugrat qu'era documentacion non ei arribada en termini previst a causa dera impugnacion d´ua candidatura.
"Planhem era insensibilitat demostrada deuant d´aqueres peticions deth Govèrn", çò a dit era titulara de Governacion, "que harà qu'encara un còp i age catalans residents en estrangèr que maugrat volé'c non poderàn votar". Coma exemple, Borràs a mencionat païsi coma es Estats Units, Chile, Mexic o bères parts de China.
Un ueitantenat de mejans estrangèrs
Meritxell Borràs a soslinhat que, entà seguir eth desvolopament des eleccions entath Parlament de Catalonha en centre de difusion de donades, i a mès de 550 jornalistes acreditadi, qu´aperaquí 180 son jornalistes estrangèrs, d´un ueitantenat de mejans de comunicacion internacionaus.
Era conselhèra, qu'a arrebrembat qu'aguest maitin tanben i a agut ua amassada damb parlamentaris internacionaus, a afirmat que "aguestes son ues eleccions qu'an desvelhat un interès e ues expectatives fòrça nautes".
"Deman es uelhs deth mon seràn metudi sus Catalonha e sus es catalans e es catalanes", çò a dit era conselhèra. "Hèsqui ua crida entà que dem ua leçon de civisme e de respècte e que votem damb normalitat e democraticaments".
Es donades deth procès electorau
Es elegeires que residissen en Catalonha, çò a explicat era conselhèra, poderàn votar en 2.697 collègis e 8.181 mèses electoraus. I aurà 24.543 membres titulars des mèses electoraus e 49.086 membres suplenti, e tanben 3.885 representants dera Administracion.
Per çò qu'ei des efectius policèrs, i aurà 8.186 mòssos d´esquadra, que 4.519 haràn prètzhèts extraordinaris dirèctaments restacadi damb eth dispositiu electorau. De mès, cau ahiger-i 1.703 efectius de polícia locau e 143 susvelhants locaus.
Era conselhèra a arrebrembat que pendent era jornada se disposarà d´informacion sus participacion e resultats en web resultats.parlament2015.cat. Ath delà, eth Govèrn a metut a disposicion des ciutadans era aplicacion gratuïta entà dispositius mobils Eleccions 27S, que permeterà consultar en quina mobil que sigue o tauleta totes es donades de participacion e resultats e comparar-les damb es des eleccions de 2012. De mès, damb aquera aplicacion, es usatgèrs poderàn saber tanben es nòms des candidats elegidi qu'entren en Parlament de Catalonha a mesura qu'auance er escrutinh.
Atanben, pendent era jornada electorau contunharà tostemp operatiu eth telefòn d´atencion entà consultes sus es eleccions (93 551 59 90), eth corrèu electronic eleccions.governacio@gencat.cat e eth telefòn d´atencion as ciutadans 012. Per toti aqueri canaus, çò a dit era conselhèra, s´an gerit enquia aué 12.000 consultacions.
Tanben contunharà operatiu eth web www.Parlament2015.cat, Damb tota era informacion deth procès electorau, qu´a ja arrecebut mès de 134.000 visites.
