Borràs arremèrque er interès des comicis ena comunautat internacionau e hè ua crida entà qu'era jornada electorau "balhe ua leçon de civisme e convivéncia"
Era conselhèra de Governacion e Relacions Institucionaus, Meritxell Borràs, a compareishut ena sala de premsa deth centre de difusion de donades installat en Parlament de Catalonha entà arreportar eth començament dera jornada electorau. Era conselhèra a explicat que non i a agut cap d´incidéncia arremercabla qu'age empedit era dubertura normau des collègis electoraus. Atau, en moment dera compareishença, entàs 9.45 ores, es 8.181 mèses electoraus de Catalonha s´èren constituïdes sense problèmes.
Meritxell Borràs a soslinhat eth hèt qu'ath long deth dia d´aué era atencion dera comunautat internacionau "serà fixada sus es catalanes e sus es catalans" e a hèt "ua crida a dar ua leçon de civisme e de convivéncia ath mon".
Cau arrebrembar que, per circonscripcion electorau, i a 5.836 mèses en Barcelona; 823 en Girona; 520 en Lhèida, e 1.002 en Tarragona. Eth totau de collègis electoraus ei de 2.697 (1.607, en Barcelona; 399, en Girona; 321, en Lhèida, e 370, en Tarragona).
Era conselhèra a arrebrembat qu'era poblacion de dret en Catalonha ei de 7.518.903 persones e qu'eth cens electorau entad aguestes eleccions ei de 5.510.798 elegeires, que 196.062 son en estrangèr. Es persones que poderàn votar peth prumèr còp en aguestes eleccions, pr'amor qu'auràn complit es 18 ans dempús des comicis anteriors, son 164.247.
En aguestes eleccions s´elegís 135 deputats, distribuïdi per circonscripcions dera manèra següenta: 85 per Barcelona; 17 per Girona; 15 per Lhèida, e 18 per Tarragona. I concorren 40 candidatures, 24 mens qu'enes comicis de 2012.
Vòt per corrèu e jornalistes acreditadi
Era conselhèra de Governacion a soslinhat qu'aguestes eleccions desvelhen un gran interès, e n´a metut dus exemples. D´un costat, i a agut 107.421 sollicitacions de vòt per corrèu en territòri estatau, 70% mès qu'enes darrèri comicis, quan i aueren 63.142 sollicitacions.
Tanben i a agut 21.771 sollicitacions de vòt per corrèu de catalans residents en estrangèr e 1.841 d´elegeires temporauments absenti.
D´un aute costat, tanben s´a incrementat notablaments eth nombre de mejans de comunicacion que seguiràn eth desvolopament des eleccions en centre de difusion de donades installat en Parlament. Atau, an sollicitat es credenciaus 550 jornalistes, de 26 païsi diferenti. Dont i a 180 jornalistes estrangèrs, d´un ueitantenat de mejans internacionaus.
Mès de 87.500 persones mobilizades entara jornada electorau
Era conselhèra Meritxell Borràs tanben a explicat que i a 87.543 persones mobilizades que trabalhen entath corrècte desvolopament dera jornada, entre efectius policèrs, personau dera Administracion e membres des mèses.
Eth dispositiu de seguretat entàs eleccions, lo formen 8.186 mòssos d´esquadra, que 4.519 hèn prètzhèts extraordinaris dirèctaments restacadi damb eth dispositiu electorau. De mès, cau ahiger 1.703 efectius de polícia locau e 143 susvelhaires locaus. En totau, i a, donques, 10.032 efectius policèrs mobilizadi.
Entà garantir qu'eth procès se desvolòpe damb fluïditat e entà resòlver es possibles incidéncies, i a 3.885 representants dera Administracion enes collègis electoraus de Catalonha tota.
Es membres titulars des mèses electoraus son 24.543, mès 49.086 suplents.
Seguiment dera jornada a trauès de web e app.
Era Generalitat a metut a disposicion des ciutadans era aplicacion Eleccions 27S, que permet de seguir en temps reau, damb eth mobil o damb era tauleta, es auanci de participacion e es resultats der escrutinh des eleccions entath Parlament de Catalonha.
Era aplicacion permet d´accedir as donades en diuèrsi nivèus: er ensemble de Catalonha, per circonscripcion, per comarca e per municipi. Incorpòre nombroses foncionalitats resultat d´un procès participatiu a on es usatgèrs aportèren suggestions entà melhorar era aplicacion que se hec entàs eleccions entath Parlament de 2012. Frut d´aqueth procès son, per exemple, ua seccion damb informacion detalhada des resultats des candidatures, a on apareishen donades sus es vòts, eth percentatge de vòt e es escons obtengudi per cada formacion, e tanben eth nòm des candidats elegidi, a mesura qu'auance er escrutinh.
Atanben s´a includit, coma nauetat, era opcion Eth mèn parlament, que permet as usatgèrs de hèr ua prediccion dera configuracion deth Parlament e partejar-la a trauès des hilats sociaus.
Eleccions 27S ei ua aplicacion mobila gratuïta disponibla en catalan, castelhan e anglés entà iOS e Android e se pòt descargar en ligam www.parlament2015.cat/ca/app.
D´un aute costat, es donades dera jornada tanben se pòden seguir a trauès deth web de resultats provisionaus, que s´a metut en foncionament a començament dera jornada electorau: resultats.parlament2015.cat.