Palai dera Generalitat, 3 d´agost de 2015
Benvoludes e benvoludi compatriòtes,
Veni de signar eth decrèt de convocacion des pròplèus eleccions entath Parlament de Catalonha, que se debanaràn dimenge 27 de seteme. Ua convocacion que seguís eth marc legau en vigor, semblabla a totes es que s´an hèt enquia dia d´aué per arrepòrt ara forma. Totun, toti sabem qu'aguestes eleccions seràn fòrça diferentes per arrepòrt ath hons.
En circonstàncies normaus, aguestes eleccions s´aurien d´auer hèt ena fin der an que ven. Mès Catalonha non viu en condicions normaus. Quan ua majoritat fòrça clara e categorica d´un país vò exercir eth sòn dret de decidir, democraticaments e pacificaments, e se li nègue constantaments aqueth dret, en tot empedir eth dialòg e era negociacion, e alavetz er acòrd e eth pacte, signifique qu'èm deuant d´ua situacion excepcionau, que requerís decisions tanben excepcionaus. Arrespóner e dar gessuda ad aqueth desir democratic ei çò que fondamente e justifique aguesta convocacion d´eleccions anticipades ath Parlament.
Hè dus ans deishè escrit en un debat de politica generau qu'ère disposat a hèr usatge dera facultat legau que me pertòque d´auançar es eleccions s´er Estat pretenie silenciar era votz e eth vòt deth pòble de Catalonha. Volíem ua consulta sus eth nòste futur politic, e la volíem legau e acordada. Era negativa totau deth Govèrn espanhòu quitament a parlar-ne precipite ara era decision anonciada dempús longtemps.
Coma President de Catalonha hèsqui ua crida que responsablaments totes es fòrces e coalicions politiques i presenten es sues proposicions e es sòns projèctes entath futur d´aguest país. Totes es proposicions, mentre respècten es drets umans, son legitimes en democracia e son solament es ciutadans liures damb eth sòn vòte es que pòden hèr-les possibles. Era mia crida ei a respectar, toti, çò qu'es ciutadans decidiràn, e a assumir er engatjament de trobar es vies politiques e legaus entà implementar eth mandat democratic des urnes.
Enes setmanes que vien eth mon mos tornarà a observar. Sigam-ne conscienti e tornam a aufrir era nòsta melhora cara. Hiem dera legitima confrontacion de proposicions un gran exercici de dialòg.
Èm un país plurau e diuèrs. Èm un país damb ua istòria millenària, frut deth trabalh de hemnes e d´òmes qu´ua generacion e ua auta an bastit Catalonha e l´an estimada. Èm un país hèt per persones d´origines, parlars e credences diferentes, qu'an vist en aguesta tèrra era oportunitat de créisher, desvolopar-se e de dar un futur as sòns hilhs e as sòns arrèhilhs. Èm ua nacion millenària qu'a dret de decidir eth sòn futur, èm ua nacion de persones liures que mos auem guanhat eth dret de decidir com volem èster e com volem governar-mos. Contraposem modèls, defenem-les passionadament; hiem deth civisme e deth respècte dera opinion des auti era caracteristica dera nòsta democracia; hiem dera convivéncia ena diferéncia, un actiu; dera pluralitat e deth respècte, vertut; e deth dret a soniar e hèr possible eth futur que volem, un orizon d´esperança entà bastir un país melhor. Ua vida melhora entà cadun de nosati.
Pensi, umilaments, que podem hèr deth 27 de seteme que ven ua data soslinhada ena nòsta istòria. Era democracia ei ara era protagonista. Es urnes, es vòts e era decision liura, es airines. Un futur hèt de democracia, justícia e libertat, n´ei er orizon. Assumim cadun de nosati era responsabilitat e eth protagonisme qu'eth moment e demane e hem-mo'n dignes.
Visca Catalonha!