Se tracte deth Decrèt de nòrmes complementàries e deth Decrèt que regule es subvencions e era comptabilitat electorau
Es impòrts des subvencions as partits, federacions, coalicions o agropacions d´electors se mantien parièr qu´en 2012
Eth Govèrn qu´a aprovat tanben eth Manuau d´instruccions entàs membres des mèses electoraus
Eth Govèrn qu´a aprovat es decrèts qu'activen eth procès electorau entara realizacion des eleccions entath Parlament de Catalonha que se debanaràn eth 27 de seteme que ven. En concrèt, a aprovat eth Decrèt des nòrmes complementàries entara realizacion des eleccions e eth Decrèt a on se regulen es subvencions e eth contraròtle dera comptabilitat electorau.
Eth Decrèt de nòrmes complementàries entara realizacion des eleccions entath Parlament de Catalonha, amassa damb çò qu'establissen er Estatut e era Lei organica deth regim electorau generau (LOREG), regule, entre d´auti aspèctes, era Administracion electorau, es representants des candidatures, es candidatures, es campanhes, eth materiau electorau, eth vòt per correspondéncia, eth vòt des persones damb andicap visuau, es apoderadi, es interventors, er escrutinh, es recorsi o es gratificacions economiques entàs persones que se mobilizen. Ath delà, aguest Decrèt conten es modèls oficiaus d´actes, engolòpes, paperetes, urnes, cabines, eca.
Eth Decrèt a on se regulen es subvencions e eth contraròtle dera comptabilitat electorau establís es subvencions as partits, federacions, coalicions o agropacions d´electors damb motiu des eleccions. Aqueres despenses se fixen cossent damb es nòrmes següentes: 16.101,60 èuros per escon obtengut; 0,61 èuros per vòt artenhut per cada candidatura qu'age obtengut aumens un escon, e 0,17 èuros per cada elector d´ua circonscripcion electorau -cada viatge qu'era candidatura age obtengut aumens un escon en aquera circonscripcion e artenhe a formar grop parlamentari- entàs despenses originades pera remesa dirècta e personau as electors des engolòpes e es paperetes, o dera propaganda e publicitat electorau.
En tot tier en compde era situacion de restriccions pressupostàries e era reduccion dera despensa non financèra dera Generalitat, se mantien es impòrts des subvencions que se fixèren enes eleccions entath Parlament de Catalonha de 2012.
Manuau d´instruccions entàs membres des mèses electoraus
D´un aute costat, eth Govèrn tanben a aprovat eth Manuau d´instruccions entàs membres des mèses electoraus entàs eleccions entath Parlament de Catalonha de 2015.
Segons era Lei, cau liurar as membres des mèses electoraus un manuau d´instruccions sus es sues foncions, qu'a d´èster supervisat pera Junta Electorau Centrau e aprovat peth Govèrn. Era Junta Electorau Centrau liegèc e aprovèc ath Manuau ena session celebrada eth 1r de junhsèga passat e aué l´a aprovat eth Govèrn.
Eth Manuau amasse era cronologia dera jornada electorau, es prètzhèts de cadun des membres dera Mèsa e eth foncionament der escrutinh e establís se qué cau hèr en cada moment.
4 d´agost de 2015