5.510.713 catalans son cridadi a votar enes eleccions ath Parlament de Catalonha deth 27 de seteme que ven
Era conselhèra de Governacion a presentat es canaus d´informacion sus es eleccions qu´eth Govèrn met ara disposicion des ciutadans
Era conselhèra de Governacion e Relacions Institucionaus, Meritxell Borràs, a presentat aué en conferéncia de premsa es diuèrsi canaus qu´eth Govèrn a metut en marcha entà arreportar sus es eleccions entath Parlament de Catalonha deth 27 de seteme que ven. "Era nòsta volontat ei informar as ciutadans sus es tramits de besonh entà votar e facilitar tota era informacion electorau entà que cap de ciutadan o ciutadana que volgue hè´c non demore sense votar", çò a explicat.
"Cau facilitar qu´era votz de Catalonha s´exprimisque damb normalitat e claretat eth 27S", çò a assegurat. Per aquerò, en Governacion s´a activat un sistèma multicanau entà qu´es ciutadans e poguen auer totes es informacions des tramits qu´an de besonh entà votar sigue quina sigue era sua situacion.
Ath delà deth sit web electorau www.parlament2015.cat, es ciutadans e ciutadanes tanben se poderàn entresenhar e resòlver dobtes sus es tramits que tanhen ath procès electorau enes hilats sociaus, per miei de telefonia mobila e telefonicaments.
"Toti es catalans e catalanes èm cridadi a votar e toti e totes auem de poder hè´c damb libertat e normalitat", çò a dit era conselhèra, "pr´amor qu´era democracia servís entà resòlver problèmes, en cap de cas, entà bloquejar solucions".
Vòt en estrangèr e entà persones damb andicap visuau
Meritxell Borràs a explicat que, segons es donades deth cens provisionau, 5.510.713 catalans poderàn votar enes eleccions que vien entath Parlament de Catalonha. 195.533 d´aqueres persones son residentes en estrangèr inscriti en Cens d´Electors residents absenti (CERA segon era sigla en catalan). Era conselhèra a soslinhat qu´aqueth ei un des collectius sensibles, a qui cau adreçar informacion especifica sus eth procediment entà hèr efectiu eth sòn vòt, e a arrebrembat qu´enes eleccions entath Parlament de Catalonha de 2012, solament 6,7% des catalans inscriti en CERA votèren e que fòrça persones residentes en exterior exprimiren planhs pes dificultats qu´auien trapat.
"Ei remercable qu´entà poder votar en estrangèr cau era convergéncia de diuèrsi factors e que non son toti ena nòsta man", çò a explicat era conselhèra. "Abans tot, cau era volontat de votar, en dusau lòc, era informacion avienta, e en tresau lòc, era dilligéncia e eficiéncia des diferenti actors que i participen, ja siguen es ambaissades e consolats der Estat espanhòu o es diferentes enterpreses de corrèus en cada país".
Eth termini entà qu´es catalans en estrangèr e poguen sollicitar eth vòt per corrèu comencèc ager e finalize eth 29 d´agost. En aguest sens, era conselhèra a soslinhat qu´eth Govèrn dera Generalitat pòt subervier ena informacion e ene anticipacion ara ora de hèr es tramits. Per açò, pendent aguest periòde, eth Govèrn proporcionarà tota era informacion de besonh des tramits entà votar en estrangèr, per miei deth web electorau -a on i a un vidèo-tutoriau qu´explique eth procediment-, a trauès deth web dera Secretaria d´Ahèrs exteriors e dera Union Europèa, e per miei des hilats sociaus.
Un aute des collectius sensibles a qui eth Govèrn vò mandar tota era informacion de besonh entà poder votar son es persones damb andicap visuau. Era conselhèra a explicat que s´an tengut reünions damb associacions de persones damb andicap visuau entà "trobar manères de garantir que poguen exercir eth sòn dret de vòt enes madeishes condicions qu´era rèsta des ciutadans".
Atau, es persones damb andicap visuau ja pòden sollicitar, a compdar d´ager e enquiath 31 d´agost, era documentacion en sistèma Braille, a trauès deth telefòn gratuït 900 400 012, que permet era identificacion dera opcion de vòt damb garanties d´autonomia e, alavetz, eth secrèt de sufragi. Aquera documentacion cònste d´ues instruccions explicatives, estampades en sistèma Braille, ua engolòpa de votacion e ua engolòpa entà cadua des candidatures damb era indicacion dera candidatura en tinta e en sistèma Braille, e laguens cadua d´aqueres engolòpes, ua papereta de vòte corresponent ara candidatura indicada en exterior.
Sistèma multicanau d´informacion
Era conselhèra a detalhat quini son es diuèrsi canaus qu´eth Govèrn dera Generalitat a metut ara disposicion des ciutadans entà arrecéber informacion sus es eleccions. Eth canau principau, çò a soslinhat, ei eth sit web www.parlament2015.cat, qu´amasse tota era informacion sus calendari electorau, qüestions freqüentes, norma, composicion des juntes electoraus, directòri des juntes, donades estadistiques, eca.
Coma novetat, en aguesta escadença, eth portau includís sèt vidèos-tutoriaus sus es tèmes següents: membres des mèses electoraus, vòt presenciau, vòt per corrèu, vòt des electors catalans que residissen en estrangèr de manèra permanenta, vòt des electors catalans que se tròben temporauments en estrangèr, vòt accessible entàs persones damb andicap visuau, e vòt entà persones malautes o andicapades que non se pòden desplaçar. Eth web ei en quate lengües: catalan, occitan aranés, castelhan e anglés.
Ua auta novetat qu´a soslinhat era conselhèra ei era possibilitat d´utilizar era aplicacion de messatgeria instantanèa entà dispositius mobils Telegram entà demanar informacion e resòlver dobtes sus es eleccions. Tanben, coma en d´autes escadences, s´atieràn es consultes via telefonica a trauès deth 012 e deth centre d´atencion telefonica qu´a abilitat eth Departament de Governacion e Relacions Institucionaus damb eth numèro 935 515 990.
Fin finau, era conselhèra a explicat qu´aguesta setmana se meterà tanben en marcha era campanha informativa deth Govèrn as mejans de comunicacion que, en diuèrsi supòrts (vidèo, àudio, anóncies en premsa e pannèus), proporcionarà informacion sus eth cens electorau, eth vòt per corrèu e entà persones damb andicap visuau, e era jornada electorau.
5 d´agost de 2015