- Eth Govèrn active un servici d´informacion multicanau sus es eleccions entath Parlament de Catalonha deth 27 de seteme que ven
- Es ciutadans se pòden entresenhar sus es comicis a trauès deth web electorau, es hilats sociaus, messatgeria mobila e telefonicaments
- Es persones damb andicap visuau pòden sollicitar eth procediment de vòt accessible, damb documentacion en sistèma Braille, que permet votar damb garanties d´autonomia e secrèt deth sufragi
5.510.713 catalans poderàn exercir eth sòn dret de vòt enes eleccions entath Parlament de Catalonha deth 27 de seteme que ven, segons donades deth cens provisionau. 195.533 d´aqueres persones residissen en estrangèr. D´aguest totau, 4.124.254 persones son dera circonscripcion de Barcelona (dont 151.131 son enregistrades en estrangèr), 510.820, dera circonscripcion de Girona (15.214 en estrangèr), 313.729, dera circonscripcion de Lhèida (14.598 en estrangèr), e 561.910, dera circonscripcion de Tarragona (14.590 en estrangèr). D´aqueres persones, 164.240 son naui electors. Enes darrèri comicis, eth cens electorau siguec de 5.413.769 persones, 96.944 catalans mens qu'enes comicis d´aguest mes de seteme.
Entà informar as ciutadans des tramits que tanhen ath procès electorau, eth Govèrn dera Generalitat a activat ua seguida de canaus entà que toti dispòsen dera informacion que cau entà poder votar en aguesti comicis. Atau, es ciutadans se poderàn entresenhar, hèr consultes e resòlver dobtes sus es eleccions a trauès deth web electorau, enes hilats sociaus, per messatgeria mobila e telefonicaments.
Es Mejans de comunicacion tanben difoneràn era campanha institucionau qu'eth Govèrn meterà en marcha aguesta setmana.
Portau www.parlament2015.cat
Eth portau www.parlament2015.cat amasse tota era informacion sus es eleccions entath Parlament: calendari electorau, qüestions frequentes, norma, composicion des juntes electoraus, directòri des juntes, donades estadistiques, eca.
Coma novetat, en aguesta escadença, eth portau includís sèt vidèos-tutoriaus sus es tèmes següents:
- Membres des mèses electoraus,
- Vòt presenciau,
- Vòt per corrèu,
- Vòt des electors catalans que residissen en estrangèr de manèra permanenta,
- Vòt des electors catalans que se tròben temporauments en estrangèr,
- Vòt accessible entàs electors damb andicap visuau e
- Vòt des malauts o andicapats.
Eth sit web ei en quate lengües: catalan, occitan aranés, castelhan e anglés.
Telegram
Ua auta novetat d´aguestes eleccions ei era possibilitat d'arrecéber informacion ath telefòn mobil a trauès de Telegram, ua aplicacion de messatgeria instantanèa gratuïta e hèta damb logiciau liure que permet d´enviar e d´arrecéber messatges a trauès d'Internet.
Cau auer era aplicacion descargada en telefòn mobil e seguir aguestes indicacions:
- Damb era aplicacion Telegram dubèrta, daurir un messatge nau (new message) e escríuer 012 en cercaire. Automaticaments apareisherà eth destinatari "Missatgeria 012" e ja podem escríuer era qüestion o eth comentari que se desire.
Tanben podem accedir a Telegram a trauès dera aplicacion Gencat. Un còp dubèrta, apareish "Contacta damb eth 012" ena part inferiora dera pagina d´inici damb tres opcions mercades damb tres icònes: Telegram (se clicam sus era icòna se dubrís dirèctaments un messatge nau), telefòn o Twitter.
Centre d´atencion telefonica
Tanben entà informar e resòlver es dobtes des ciutadans en çò que tanh as eleccions deth 27 de seteme que ven, eth Departament de Governacion e Relacions Institucionaus a metut en foncionament un centre d´atencion telefonica qu'aten es telefonades de 8 a 19 ores de manèra ininterrompuda. Eth numèro de telefòn ei 935 515 990.
Atencion telefonica en 012
D´un aute costat, coma ei abituau, en telefòn d´atencion ciutadana 012 tanben proporcionarà informacion e veïcularà es consultes des ciutadans sus es eleccions.
Hilats sociaus
Ath delà d´aqueres vies, a trauès des compdes de Twitter deth Departament de Governacion e Relacions Institucionaus (@governaciocat), eth compde deth portau de participacion dera Generalitat (@participacat), e es compdes de Twitter e Facebook des casals catalans (@casalscatalans) e des diuèrses delegacions dera Generalitat en exterior se rapòrte eth calendari electorau e es terminis entà realizar es diuèrsi tramits entà votar, e se resòlven dobtes des usatgèrs. Egalaments tanben s´atieràn es qüestions posades per mejan de tweets damb era etiqueta #participacat.
Campanha institucionau
Fin finau, eth Govèrn dera Generalitat desplegarà ua campanha institucionau informativa, que se difonerà a trauès des mejans de comunicacion en diuèrsi supòrts: anóncies de television, ràdio, ena premsa escrita (tant jornaus, setmanèrs, revistes coma publicacions mensuaus) e pannèus exteriors. Era campanha tanben se difonerà sus Internet enes mejans numerics e s´emeteràn anóncies enes sales de cinèma.
Era campanha, que començarà aguesta setmana, subervierà en tres aspèctes basics: informacion sus eth cens electorau, eth vòt per corrèu e entà persones damb andicap visuau e era campanha informativa sus es comicis.
Vòt accessible
Es persones damb andicap visuau pòden sollicitar eth procediment de vòt accessible, damb documentacion complementària en sistèma Braille entà poder exercir eth sòn dret a vòt enes madeishes condicions qu´era rèsta des ciutadans.
Eth procediment de vòt accessible consistís ena utilizacion de paperetes e d´engolòpes de votacion normalizades, qu´acompanhen ua documentacion complementària en sistèma Braille que permet era identificacion dera opcion de vòt damb garanties d´autonomia e, alavetz, eth secrèt de sufragi.
Aguesta documentacion compde:
- Ues instruccions explicatives, estampades en sistèma Braille.
- Ua engolòpa de votacion.
- Ua engolòpa entà cadua des candidatures damb era indicacion dera candidatura en tinta e en sistèma Braille, e laguens cadua d'aqueres engolòpes, ua papereta de vòt corresponent ara candidatura indicada en exterior.
Eth periòde entà demanà'c acabe eth 31 d´agost. Es sollicitacions s´an de tramitar a trauès deth telefòn gratuït 900 400 012. Enes eleccions entath Parlament de Catalonha de 2012 s'arreceberen 297 peticions de vòt accessible en sistèma Braille.
Vòt en estrangèr
Es catalans que residissen en estrangèr de manèra permanenta (CERA) o ben temporauments (ERTA) se pòden entresenhar en sit web www.parlament2015.cat, a on trobaràn un vidèo-tutoriau sus eth vòt en estrangèr.
Eth Govèrn aufrís, atanben, ua larga informacion a trauès deth web d´Ahèrs Exteriors sus es diuèrsi procediments que pòden seguir entà exercir eth sòn dret de vòt, segon quina sigue era sua situacion (http://afersexteriors.gencat.cat/ca/arees_d_actuacio/comunitats_catalanes_de_l_exterior/Informacio-electoral-catalans-residents-exterior/).
En aguest sens, cau tier en compde qu'es ciutadans residents en estrangèr ja pòden sollicitar eth vòt per corrèu. An temps de tramitar era sollicitacion enquiath 29 d´agost.
Vòt per corrèu (en Estat espanhòu)
Es electors catalans residents en Catalonha o ena rèsta der Estat espanhòu que causisquen votar per corrèu, les ac cau solliciar entre eth 4 d´agost e eth 17 de seteme. Cau que s´adrecen personalaments a quin burèu que sigue de Corrèus e ramplisquen era sollicitacion d´inscripcion en cens electorau. Dempús, eth Burèu deth Cens Electorau les remanarà ena sua abitança era documentacion de besonh entà votar, qu'includís es paperetes de totes es candidatures que se presenten as eleccions e informacions sus eth procediment que cau seguir entà hèr efectiu eth vòt.
Eth termini entà enviar eth vòt per corrèu ara mèsa electorau corresponent acabe eth 23 de seteme. Er enviament ei gratuït entàs persones qu'ac solliciten.
Eth web www.parlament2015.cat includís un vidèo-tutoriau sus aguesta modalitat de vòt.
Calendari electorau
Bères dates deth calendari electorau que cau tier en compde son:
- Termini entà sollicitar eth vòt per corrèu entàs electors residents en estrangèr: deth 4 ath 29 d´agost.
- Termini entà sollicitar eth vòt per corrèu entàs electors que residissen en Catalonha o ena rèsta der Estat espanhòu: deth 4 d´agost ath 17 de seteme.
- Termini entà sollicitar era documentacion electorau en sistèma Braille: deth 4 ath 31 d´agost.
- Verificacion deth cens electorau: deth 10 ath 17 d´agost.
- Publicacion en DOGC des candidatures presentades: 26 d´agost.
- Cens definitiu: 1r de seteme.
- Publicacion en DOGC des candidatures proclamades: 1r de seteme.
- Campanha electorau: der 11 ath 25 de seteme.
- Dia de reflexion: 26 de seteme.
- Votacion: 27 de seteme. Es collègis dauriràn des 9 deth maitin enquias 8 deth ser.
5 d´agost de 2015