Era peticion se hè pr'amor que i a païsi coma Mexic, Còsta Rica, Chile, Equator e parts de China a on era documentacion entà votar encara non ei arribada. Era conselhèra Meritxell Borràs demane mesures urgentes entà garantir qu'es catalans en estrangèr e poguen exercir eth sòn dret de vòt eth 27S
Era conselhèra de Governacion e Relacions Institucionaus, Meritxell Borràs, a enviat aué ara Junta Electorau Centrau (JEC) un escrit que demane ad aqueth organ dera Administracion electorau que reconsidère era decision de non agranir eth tèrme entà votar per corrèu en estrangèr. Era conselhèra ac a auançat en ua entrevista a Catalunya Informació, a on a explicat que i a ciutadans catalans residents en païsi coma Mexic, Còsta Rica, Chile, Equator e bères zònes de China qu'ager, deluns 21 de seteme, encara non auien arrecebut era documentacion entà votar, quan es tèrmes son a mand d´acabar. Per açò, eth Govèrn a tornat a demanar ara JEC que prene bèth tipe de mesura "urgenta entà garantir qu'es catalans en estrangèr e poguen exercir eth dret fonamentau de vòt eth 27S", en tot tier en compde qu'es tèrmes entà votar per corrèu en estrangèr acaben aué entàs electors residents permanents en estrangèr (CERA) e deman, 23 de seteme, entàs residents temporaus (ERTA).
Eth Govèrn hec era peticion eth 9 de seteme passat, en seguida der endarrieratge en enviament dera documentacion as electors que residissen dehòra der Estat, pes impugnacions des proclamacions de candidatures ath Tribunau Constitucionau. Coma a explicat era conselhèra, aquera situacion excepcionau hec qu'es paperetes des electors residents en exterior gessessen entre eth dia 10 e eth 15 de seteme, quan en ua situacion normau ac aurien hèt eth 3 de seteme "çò que met enòrmaments en dificultat eth vòt en exterior". Alavetz, era JEC ac deneguèc pr'amor que considerèc que non ère procedent d´agranir eth tèrme pr'amor qu'es bilhetes s´auien enviat laguens des tèrmes legaus, e que non i auie circonstàncies excepcionaus o alteracions inabiuaus qu'ac hessen conselhable.
Era JEC tanben argumentèc que, per arrasons de còsti e foncionament, es tèrmes electoraus non se poderien prorogar; en aguest sens era conselhèra a arremercat que "comprenem que se s'a alongat aguest tèrme en cas deth vòt per corrèu laguens der Estat, o per exemple a collectius concrèts, coma ei eth cas des militars que son en estrangèr, non comprenem perqué açò non se pòt alongar tanben entàs catalans residents en exterior".
Egalaments, Governacion tanben a demanat ara JEC que s´alongue era data d´escrutinh, fixada entath dia 30 de seteme, entà garantir qu'es vòts emetudi arriben laguens deth tèrme, en cas que s´alongue eth periòde entà poder votar en exterior.
Dues negatives dera JEC era relacion damb eth vòt exterior
Era JEC ja deneguèc eth passat 26 d´agost era peticion deth Govèrn per que s´alonguèsse eth tèrme de sollicitacion de vòt per corrèu des catalans residents en estrangèr, qu'acabèc eth 29 d´agost. Governacion sostenguec en aquera escadença qu'era coïncidéncia damb eth periòde de vacances e era reduccion d´oraris e personau de quauqui consolats espanhòus auie endarrerit es tramits de sollicitacion dera documentacion.