Meritxell Borràs anóncie qu´eth Govèrn envie letres ath Ministèri d´Ahèrs exteriors e a Corrèus entà demanar era maximala collaboracion entà facilitar eth vòte des catalans en estrangèr

Era conselhèra de Governacion e Relacions Institucionaus, Meritxell Borràs, a anonciat qu´eth Govèrn dera Generalitat a enviat letres ath ministre espanhòu d´Ahèrs exteriors, José Manuel García-Margallo, e ath responsable dera enterpresa estatau de Corrèus entà demanar que s´actue "damb era maximala diligéncia " entà facilitar as ciutadans que demoren en estrangèr er exercici deth sòn dret de vòte enes pròplèus eleccions entath Parlament de Catalonha. Borràs ac a anonciat en ua entrevista en RAC1.

Meritxell Borràs a explicat qu´eth Departament dera Presidéncia dera Generalitat a remanat ua letra adreçada personalaments ath ministre Margallo, entà demanar-li collaboracion, entà qu´es ambaishades e es consolats espanhòus aufrisquen totes es facilitats tà qu´es electors catalans que se tròben en estrangèr e poguen votar damb normalitat enes eleccions deth 27 de seteme que ven. Atanben, era conselhèra a explicat qu´era madeisha a enviat ua letra ara Societat Estatau de Corrèus e Telegrafs que li demane que hèsque era distribucion des bulletins de vòte e dera documentacion de besonh entà votar en estrangèr damb "especiau dilligéncia e agilitat, entà que s´actue damb perfeccion, e, donques, qu´arren arribe tard, pr´amor que mos cònste que, de viatges, es causes arriben tard".

Era conselhèra a arrebrembat que, en çò que tanh ath vòte exterior, es causes non an pas foncionat tostemp tanplan ben qu´aurien pogut". Per açò, deuant d´aquera experiéncia, eth Govèrn a decidit de cercar solucions. En aguest sens, a assegurat que, ath delà des letres, s´a proporcionat  "informacion tre era menuta zèro, a trauès dera pagina web, des hilats e des casals catalans. S´a sajat d´èster actiu entà mandar es informacions a toti, entà que, qui volgue, non pèrde eth sòn dret de votar e de díder era sua en moment que correspone, en aguest cas eth 27 de seteme".

Meritxell Borràs a soslinhat que i a 195.533 electors catalans absenti inscriti en Cens d´electors absenti (CERA), aperaquí 40.000 persones mès qu´enes darrères eleccions entath Parlament de Catalonha. Aquerò demòstre, çò a dit, que i a un gran interès entà poder votar e a persutat en besonh de mandar era maximala informacion pr´amor qu´eth Govèrn a constància qu´era baisha participacion en estrangèr non ei pera manca d´interés mès pr´amor que, "maugrat er interès e era volontat de votar, an estat multiples es empediments e es dificultats entà hè´c". Cau arrebrembar qu´enes darrèri comicis solament votèc eth 6,7% des catalans inscriti en CERA e fòrça persones residentes en estrangèr exprimiren planhs de trebucs e retards en procès entà hèr efectiu eth sòn vòte.

En çò que tanh ath dispositiu electorau, Meritxell Borràs a arremercat qu´en Govèrn s´ei e se serà "fòrça escrupolosi damb era legalitat. Era legalitat mos empare ena anóncia, ena convocacion, e en tot. Per arrepòrt ad aquerò, èm fòrça tranquilli, actuam d´ua manèra plan corrècta". En aguest sens, era conselhèra a defenut era campanha institucionau sus es eleccions entath Parlament de Catalonha eth 27 de seteme: "Ei ua anóncia fòrça efectiva, pr´amor que ei clara, hè eth trabalh que deu hèr, qu´ei informar, ei didactica e, donques, s´a volut èster escrupolós damb era lei, mès tanben èster fòrça informatiu".