En seguida deas multiples consultes de ciutadans catalans que non se les permet era inscripcion en Registre ERTA des consolats espanhòus, er Airau de Procèssi Electoraus e Consultes Populares dera Generalitat de Catalonha a requerit ua clarificacion ath Ministèri des Ahèrs exteriors e dera Cooperacion sus es critèris e condicions d'inscripcion. Eth Ministèri qu´a arresponut damb es arguments següents.
Cossent damb era norma sus inscripcion des espanhòus as registres de matricula des burèus consolars en estrangèr, era inscripcion en cens electorau de residents absenti en estrangèr (CERA) ei obligatòria entad aqueri ciutadans qu´era sua demorança en estrangèr age volontat de permanéncia o que s'alongue en temps. Per contra, era inscripcion des ciutadans temporaus en estrangèr en Registre ERTA ei potestativa, a ua vigéncia d'un an e non ei renovabla.
Eth Ministèri des Ahèrs exteriors e dera Cooperacion arrepòrte que, damb caractèr generau, se comprenerà coma passatgèrs e, donques, auràn accès ath Registre ERTA es ciutadans qu´en moment d'enregistrar-se en consolat non hèsque mès d'un an que s´agen establit en país estrangèr e qu´ac certifique era sua documentacion. Es que pòrten mès d'un an cau que s´inscriuen en CERA.
Maugrat aqueth critèri generau, eth Ministèri arrepòrte qu'ei competéncia de cada burèu consolar decidir, un còp analisades es circonstàncies de cada cas concrèt, era inscripcion coma temporau o permanent en Registre consolar d´enmatriculacion.
Eth Ministèri justifique es arrefusi d'inscripcion en Registre ERTA basicaments en aquera obligacion d´inscripcion coma residents permanenti quan, en principi, era residéncia ei superiora ar an. Tanben, segons eth Ministèri, i a un grèuge comparatiu a efèctes electoraus entre uns e d'auti, pr´amor qu'un resident permanent, un viatge acabat eth termini de reclamacions (17 d´agost), ja non a cap mès d´opcion d'èster includit en cens electorau d´aguesta convocacion, deth temps qu'entàs temporaus eth termini entà inscríuer-se e demanar era documentacion electorau s´alongue enquiath 29 d´agost e, donques, comprenen que quauqui uns se poderien acuélher ara inscripcion coma temporaus solament entà exercir eth sòn dret de vòte sense complir damb era obligacion d´inscripcion.
A causa de totes aguestes consideracions e cossent damb eth calendari deth procès electorau, es ciutadans residents en estrangèr qu´ara ora d'ara non son includidi en cens deth sòn burèu consolar coma residents permanenti, o an ja hèt es oportunes reclamacions e no se les permet d´inscríuer-se en Registre ERTA, solament les demore era possibilitat de votar en Catalonha (presencialaments eth 27 de seteme o anticipadaments per corrèu).
Entà consultes especifiques e d'auti ahèrs, es ciutadans se pòden adreçar ar Airau de Procèssi Electoraus e Consultes Populares mejançant eth corrèu electronic eleccions.governacio@gencat.cat.