Eth Departament de Governacion e Relacions Institucionaus planh era decision deth JEC, pr´amor que confiaue que se facilitèsse que fòrça electors en periòde de vacances disposèssen deth temps sufisent entà hèr era sollicitacion deth vòte per corrèu.
Era conselhèra de Governacion e Relacions Institucionaus, Meritxell Borràs, a planhut qu'era Junta Electorau Centrau (JEC) non permete d´alongar eth termini, que finalize aguest dissabte, 29 d´agost, entà qu'es catalans residents en estrangèr e poguen demanar eth vòte. Borràs a considerat que damb era decision, eth JEC "pòse dificultats entà qu´es catalans que demoren en estrangèr e poguen votar e privilegie era burocracia ara democracia". Era titolara de Governacion a hèt aqueres declaracions en ua compareishença aguest dimèrcles de ser, dempús d'arrecéber era notificacion dera Junta Electorau Centrau, qu'a arresponut negativaments ara peticion qu'eth Departament de Governacion hec dimars dera setmana passada.
"Mos auíem proposat aguesta peticion de prorròga coma un exercici de democracia", çò a precisat era conselhèra Borràs, "pr´amor que entà fòrça gent ei periòde de vacances e poderie èster que siguessen dehòra deth país de residéncia pendent eth termini entà demanar eth vòte. Mès era responsa a estat un barrament de pòrta a facilitar eth vòte des catalans en estrangèr e auem vist que prumèr ei era burocracia e dempús era democracia", çò a insistit era titulara de Governacion, qu'a posat en qüestion qu'un des arguments que se dan entà negar er ampliament ei que "resultarie un inconvenient pr'amor qu'alterarie era planificacion des trabalhs deth Burèu deth Cens Electorau".
Ara qüestion de s'era negativa dera JEC a intencionalitat politica, era conselhèra a arrebrembat qu'eth Govèrn a hèt tot çò de possible entà qu'es catalans que volguen votar ac poguen hèr e entà evitar que se repetissen episòdis d´eleccions anteriores "a on es causes non s´auien hèt pro ben". "Auem clar que votar ei un dret e mos calie dar normalitat entà qu'es ciutadans ac podessen hèr", çò a precisat Meritxell Borràs, qu'a arrebrembat que s´a metut a disposicion des ciutadans diferenti canaus entà informar-se sus es eleccions: eth web http://www.parlament2015.cat, eth telefòn 012, eth corrèu electronic, es hilats sociaus, ua campanha institucionau e vidèos didactics, ath delà des contactes des delegacions en estrangèr e es casals catalans. Borràs tanben a arrebrembat qu'eth Govèrn envièc ua letra ath ministre des Ahèrs exteriors e ua a Corrèus entà demanar que se facilitèsse era informacion e es tramits as consolats e ambaishades, atau coma era remesa des documents e des vòtes.
Hè ua setmana, era conselhèra Meritxell Borràs, en nòm deth Govèrn, manèc ua peticion ara Junta Electorau Centrau, fondamentada ena coïncidéncia damb eth periòde de vacances entà fòrça electors residents en estrangèr e ena reduccion d´oraris e de personau de quauqui consolats e burèus consolars des ambaishades.