Eth contengut serà disponible en quate lengües: catalan, castelhan, aranés e anglés. Era informacion s’actualizarà diàriaments damb donades importantes sus conselhs electoraus, candidatures, escrutinhs, resultats o proclamacion d’elegidi.
Eth departament dera Vicepresidéncia e d’Economia e Finances a activat eth web institucionau www.parlament2017.cat, qu'aufrís informacion per arrepòrt tàs eleccions tath Parlament de Catalonha deth propdan 21 de deseme. S’i pòden trobar causes coma un recuelh d’incidéncies en vòte emetut en estrangèr, o un blòc dedicat a qüestions mès freqüentes, coma tanben es resultats des eleccions anteriores. Totes aguestes informacions s’actualizaràn damb donades importantes a propòs des decisions des conselhs electoraus, era proclamacion de candidatures o era difusion des resultats. Tanben s’i explicaràn detalhs sus eth foncionament der escrutinh generau o dera proclamacion d’elegidi.
Eth web ei adreçat basicaments tàs electors en Catalonha e en estrangèr, tàs formacions politiques e tàs mejans de comunicacion. Aué ges en catalan e castelhan e, en dies propdans, tanben serà disponible en aranés e en anglés.
Contengut mès destacat:
Norma electorau: recuelh dera norma que regís es eleccions, que s’actualizarà damb es acòrds qu'es conselhs electoraus emeten pendent eth procès.
Calendari des eleccions e qüestions mès freqüentes: informacion a propòs des tèrmes e gestions qu'afècten es electors, damb referéncies tàs diferentes modalitats de vòte, coma eth vòte anticipat pera pòsta, eth des electors residents en estrangèr, eth vòte accessible entàs electors damb handicapacitat visuau es des malauts o handicapats, entre d'auti. Detalhs restacadi damb es membres des burèus de vòte, damb es formacions politiques (inscripcion de formacions o acreditacions d’apoderadi e interventors). O qüestions freqüentes sus es afectacions qu'entraïnarà tàs trabalhadors e trabalhadores eth hèt de participar enes eleccions un dia obrant, sus eth foncionament der escrutinh o sus eth ròtle des representants dera administracion pendent era jornada electorau.
Formularis e gestions: formularis e sollicitacions adreçadi a toti es collectius concernidi e indicacions a propòs des procediments establidi (formularis entà formacions politiques, sollicitacions de vòte entà electors en estrangèr,...)
Donades electoraus: es donades mès importantes deth procès electorau, coma eth recensament, es collègis electoraus, es burèus de vòte, era distribucion des deputats tà escuélher, es candidatures, etc., atau coma tota era informacion restacada damb es conselhs e es burèus de vòte: calendari, manuau entàs membres de burèu e qüestions e responses freqüentes entàs membres de burèu.
Sala de premsa: aguest apartat ei adreçat exclusivaments tàs mejans de comunicacion. En dies propdans, ahigerà es instruccions de besonh d'acreditacion entà accedir tath centre de difusion de donades e es requisits tecnics e informacion de localizacion entàs mejans audiovisuaus. Tanben aufrirà informacion practica entà amiar a tèrme eth seguiment dera jornada electorau per mejan deth senhau institucionau.
