S'ètz catalans residents en estrangèr e auetz agut problèmes entà exercir eth vòste dret de vòt enes eleccions entath Parlament de Catalonha deth 27 de seteme, se vos platz, explicatz-mos-ac ací.
Eth Departament de Governacion e Relacions Institucionaus met ara vòsta disposicion aguesta boèta de corrèu electronic entà que mos comuniquetz es problèmes e es incidéncies qu´auetz trobat ara ora de votar en exterior.
Es reclamacions arrecebudes a trauès d´aguest canau oficiau seràn analisades peth personau tecnic e juridic deth Departament de Governacion e Relacions Institucionaus e seràn eth fondament entà empréner es accions legaus que s´estimen oportunes contra era Junta Electorau Centrau e eth Ministèri d´Ahèrs exteriors e Cooperacion, peth foncionament irregular deth vòt per corrèu en estrangèr en aqueres eleccions.
Governacion a adoptat aguesta decision en seguida des multiples denóncies d´irregularitats en vòt en exterior enes comicis deth 27S arrecebudes en madeish Departament, o ben hètes publiques enes mejans de comunicacion e es hilats sociaus per ciutadans catalans residents en estrangèr.
En aguest sens, eth Departament de Governacion tanben demanarà ara Junta Electorau Centrau (JEC) qu'investigue es incidéncies qu'an ja denonciat catalans residents en estrangèr, coma ei eth cas des vòts en Itàlia, enviadi a ua adreça erronèa, e çò que s´ei passat damb era documentacion entà votar que non ei arribada a païsi coma Mexic, Còsta Rica, Chile, e parts des Estats Units e de China. Governacion insistís que demanèc ath JEC en tres escadences que s'alonguèssen es tèrmes de vòt en estrangèr e enes tres escadences aqueth organ dera Administracion electorau li ac deneguèc.