Era Administracion electorau velhe pera transparéncia e era objectivitat deth procès electorau e entà garantir eth principi d'egalitat. Ei formada pera Junta Electorau Centrau, es juntes electoraus provinciaus, es juntes electoraus de zòna e, se cau, era junta electorau dera comunautat autonòma, atau coma des mèses electoraus.
Era Junta Electorau Centrau ei er organ permanent qu'actue coma arbitre e moderador de tot eth procès electorau, seguit pes juntes electoraus provinciaus e de zòna.
Demiei es foncions especifiques qu'amie a tèrme era Junta Electorau Centrau enes eleccions ath Parlament de Catalonha 2017, ne destaquen es següentes:
- supervise e apròve es modèls d'actes entàs mèses e es juntes electoraus
- supervise e apròve eth manuau d’instruccions des membres des mèses electoraus
- contraròtle es donades e es informacions des sondatges publicadi
- dirigís e supervise era accion deth Burèu deth Cens Electorau
- resòlv damb caractèr constrenhent es consultes des juntes electoraus provinciaus
- ei er organisme deuant eth quau es formacions politiques nomenten as representants generaus, as representants des candidatures e as administradors generaus
Es juntes electoraus provinciaus exercissen, enes eleccions ath Parlament de Catalonha 2017, es competéncies següentes:
- amiar a tèrme totes es formalitats per çò qu'ei dera presentacion e dera proclamacion de candidatures
- resòlver es reclamacions presentades contra era delimitacion des seccions, es locaus e es mèses efectuades pera delegacion provinciau deth Burèu deth Cens Electorau
- adméter es nomentaments des administradors des candidatures per part des representants des candidatures e comunicar-los ara Junta Electorau Centrau
- distribuïr es espacis gratuïts de propaganda electorau que s'emeten enes mejans de comunicacion publics
- formalizar era designacion d'apoderats e d'interventors
- realizar er escrutinh generau
- resòlver de manèra constrenhenta es consultes des juntes electoraus de zòna
Es juntes electoraus de zòna amien a tèrme es prètzhèts següents:
- garantir qu'en cada mèsa electorau se trapen es mejans de besonh entara votacion.
- supervisar eth nomentament des membres des mèses electoraus pes ajuntaments
- distribuïr es plaçaments disponibles entara collocacion de cartèus, plancardes e banderòles, atau coma es locaus e es lòcs publics gratuïts entara realizacion d'actes de campanha electorau
- formalizar era designacion d'apoderats e d'interventors
- arrespóner es consultes des electors
Es mèses electoraus son organs formadi per ciutadans elegidi per tiratge ath sòrt, encargadi d'arrecéber es vòtes des ciutadans e de hèr-ne eth recompde. Les correspon presidir er acte de votacion, contrarotlar eth desvolopament dera votacion e realizar eth recompde e er escrutinh.
Una mèsa electorau ei formada per tres ciutadans includidi en cens electorau dera mèsa: 1 president/a e 2 vocaus.
Cada mèsa electorau correspon, normauments, a ua seccion electorau. S'eth nombre d'electors d'ua seccion ac hè conselhable o era populacion ei fòrça dispersa, ua seccion electorau se pòt dividir en diuèrsi mèses electoraus, cada còp qu'eth resultat non resulte qu'eth nombre d'electors adscriti en una mèsa sigue inferior a 200. Er encastre geografic que correspon a una mèsa, ac estipule eth Burèu deth Cens Electorau, un viatge escotades es prepauses des ajuntaments.
