Eth Conselh Electorau Centrau (CEC) a acordat alongar de nau eth tèrme entà que toti es electors que vòten per correspondéncia dempús der Estat espanhòu poguen enviar eth sòn vòte. A sollicitacion deth PP, eth CEC a optat per prorogar enquias 14:00 ores deth dimars 19 de deseme eth tèrme qu'enquia ara ère fixat un dia abans, eth deluns 18 de deseme. Atau, eth dret de vòte per correspondéncia se poderà exercir enes oraris abituaus de dubertura des burèus postaus e coma maximom enquias 14:00 ores.
Cau auer present qu'es oraris d’atencion ath ciutadan des burèus de Correos de poblacions petites pòden èster mès redusidi e barrar abans des 14.00 ores. Açò signifique que calerà consultar prealablaments es oraris des establiments de Correos dera localitat a on se volgue depausar eth vòte.
Eth CEC justifique aguest nau alongament deth tèrme de vòtes per corrèu vist eth retard produsit ena remission de cèrta documentacion electorau a causa des recorsi interpausadi contra era proclamacion de candidatures, e ara coïncidéncia deth tèrme deth depaus deth vòte dempús d’ua dimenjada. Eth CEC ja resolvec ua prumèra prolongacion a finaus de noveme, en tot observar qu'eth limit fixat iniciauments deth dia 17 de deseme quège en dimenge.
