Es electors residents permanents en exterior (CERA) poderàn exercir eth sòn dret de vòte enes consulats e burèus consulars enquiath madeish dia des eleccions deth 21D. Tanben, eth CEC a esperlongat enquiath dia 20 de deseme eth limit iniciau deth dia 16 entà depositar eth vòte per corrèu en estrangèr. Es Conselhs electoraus provinciaus deueràn d'arrecéber totes es envolòpes damb es vòtes des electors abans des 8 deth maitin deth dimenge 24 de deseme.
Eth Conselh Electorau Centrau (CEC) a adoptat er acòrd de perméter es dies 20 e 21 de deseme eth dret de vòte presenciau des electors residents permanents en exterior (CERA), damb era fin de facilitar ath maximum er exercici deth dret de sufragi d’aguesti ciutadans. En tot tier en compde es dificultats que s’an presentat ena tramitacion d’aguest vòte enes anteriors procèssi electoraus, era formacion politica Amassa per Catalonha a sollicitat ath CEC un esperlongament deth tèrne qu'acabaue iniciauments eth 19 de deseme.
D’aguesta manèra, es ciutadans poderàn depositar eth sòn vòte enes urnes des consulats e burèus consulars abilitades enquiath madeish dia des eleccions deth 21D. Era ora maximau prevista de votacion serà enquias 20 ores deth dijaus 21 de deseme, en tot coïncidir damb era ora peninsulara de barrament de collègis electoraus.
Eth CEC tanben a esperlongat enquiath dimèrcles 20 de deseme eth limit entà depositar eth vòte per corrèu en estrangèr, fixat de prumèr peth dia 16 de deseme. Açò vò díder qu'es Conselhs Electoraus Provinciaus deueràn d’acceptar coma valids es vòtes per corrèu arrecebudi des burèus consulars enquiath dia abans des eleccions.
Aguesti alongament deth dret de vòte des residents permanents en exterior signifique qu'eth Ministèri d’Ahèrs Exteriors e Cooperacion deuerà préner totes es mesures de besonh entà procurar qu'es envolòpes damb es vòtes des electors poguen èster a disposicion de Corrèus abans des 13 ores deth dissabte 23 de deseme. Era tòca finau entraïne hèr eth liurament des mandadisses as Conselhs Electoraus Provinciaus corresponenti enquias 8 deth maitin deth dimenge 24 de deseme, entà que poguen hèr-ne eth recompde.
