Un totau de 5.554.394 persones poderàn votar enes eleccions tath Parlament de Catalonha de 21D

Un totau de 5.554.394 catalans e catalanes son aperadi a participar enes eleccions tath Parlament de Catalonha convocades entad aguest dijaus 21 de deseme, segons donades der Institut Nacionau d’Estadistica (INE), un 0,79% mès qu'enes comicis deth 27 de seteme de 2015. D’aguestes, 5.328.013 persones residissen en Catalonha e 226.381 son inscrites en Recensament de Residents en Estrangèr (CERA). Per çò qu'ei deth nombre de naui electors, 136.444 votants poderàn exercir peth prumèr còp eth sòn dret de vòte en ues eleccions tath Parlament de Catalonha dempús d’auer artenhut era majoritat d’edat.

A data d’aué, eth nombre de sollicitacions de vòte de catalans residents en estrangèr acceptades ei de 39.521, un 81,53% mès qu'es acceptades entàs comicis de 2015. D’un aute costat, pendent qu'eth vòte en estrangèr creish, eth vòte per corrèu dempús der Estada espanhòu diminuís per arrepòrt ath 2015, damb un totau de 78.876 sollicitacions acceptades, per arrepòrt as 107.421 deth 27S.

Nombre d’electors en recensament per circonscripcions:

 

Circumscripcion	Residents en Catalonha	Residents en estrangèr	Totau recensament
Barcelona	3.981.177	175.082	4.156.259
Girona	499.730	18.151	517.881
Lleida	297.860	16.053	313.913
Tarragona	549.246	17.095	566.341
Totau	5.328.013	226.381	5.554.394

Hònt: INE

Eth dispositiu electorau

Aguest dijaus, a 9:00 ores deth maitin dauriràn es sues pòrtes 2.680 locaus electoraus plaçadi en 947 municipis pertot en Catalonha, damb 8.247 burèus de vòte des quaus 5.885 son en Barcelona; 825 en Girona; 534 en Lhèida; e 1.003 en Tarragona. Aguesti burèus seràn geridi damb totes es garanties per ua equipa umana formada per 24.741 membres titulars (49.482 suplents) e 3.889 representants dera Administracion, a mès des apoderadi e des interventors des diuèrses formacions politiques.

Locaus e burèus electoraus:

 

Circumscripcion	Locaus	Seccions	Burèaus
Barcelona	1.600	3.588	5.885
Girona	393	531	825
Lleida	318	387	534
Tarragona	369	541	1.003
Totau	2.680	5.047	8.247

Hònt: INE

 

Per çò qu'ei dera seguretat, segons donades deth Departament d’Interior, i participaràn un totau de 12.321 Mòssos d’Esquadra que daràn cobertura a 2.682 locaus electoraus amassa damb Policies Locaus de pertot deth territòri. De hèt, 600 centres de votacion seràn corbidi exclusivaments per 1.834 policies locaus e 104 vigilants de seguretat. Cau destacar qu'enes centres de coordinacion i aurà era preséncia dera policia dera Generalitat - Mòssos d'esquadra e dera rèsta de còssi de seguretat der Estat.

38 candidatures proclamades entà un Parlament damb 135 sètis

Un totau de 38 candidatures participaràn enes eleccions d’aguest dijaus tàs quate demarcacions, dues mens qu'enes comicis der an 2015. Atau, des 42 proclamades e publicades en BÒE e a en DÒGC eth passat 25 de noveme, fin finau se’n presenten aguestes 38, dempús qu'aguest madeish deluns Dialòg Republican age retirat era sua candidatura tàs quate demarcacions. Es candidatures finauments proclamades son: 9 en Barcelona, 10 en Girona, 10 en Lhèida e 9 en Tarragona. Aguestes includissen un totau de 1.247 candidats titulars demest es quaus seràn escuelhudi es 135 deputats qu'aocuparàn es sòns sètis en emicicle deth Parlament de Catalonha: 85 per Barcelona, 17 per Girona, 15 per Lhèida e 18 per Tarragona.

Es candidatures presentades son es següentes:

Partit dels Socialistes de Catalunya – (PSC – PSOE) (PSC)
Partit Popular / Partido Popular (PP)
Partit Animalista Contra el Maltractament Animal (PACMA)
Ciutadans-Partido de la Ciudadanía (C’s)
Esquerra Republicana-Catalunya Sí (ERC-CatSí)
Candidatura d’Unitat Popular (CUP)
Catalunya en Comú-Podem (CatComú-Podem)
Junts per Catalunya (JUNTSXCAT)
Recortes Cero-Grupo Verde (RECORTES CERO-GRUPO VERDE)
Per un Món Més Just (PU M+J)

Entà seguir era jornada electorau ara menuta

Eth Pabalhon 8 de Hèira de Barcelona (espaci Gran Via) serà er scenari deth Centre de Difusion de Donades dempús deth quau se haràn a conéisher toti es detalhs dera evolucion dera jornada electorau e es resultats finaus des comicis. Enquiath moment, mès de 127 mejans de comunicacion nacionau e internacionau e 460 professionaus s’an acreditat per via telematica entà dar cobertura ar eveniment. Eth centre dispòse de 540 taules entà redactors, damb espaci entà 84 camères de TV, 40 punts entà connexions en dirècte, servicis de traduccion simultanèa en quate lengües –espanhòu, alemand, anglés e francés-, 200 punts de hilat WIFI de 100Mb de velocitat, senhau HD damb 6 canaus de traduccion e senhau via satelit damb àudio en 6 idiòmes.

Es ciutadans tanben poderàn seguir en temps reau es eleccions tath Parlament dempús deth mobil o era tauleta per mejan dera aplicacion Eleccions 21D, que permeterà seguir en temps reau es donades de participacion e es resultats des candidatures, en diuèrsi nivèus (Catalonha, circonscripcions, comarques e municipis) damb era possibilitat de comparar-les damb es des convocacions de 2012 e 2015.

Era app ei disponible de forma gratuïta entà telefòns mobils e tauletes des plataformes Android e IOS (iPhone/iPad), e se pòt configurar en catalan, castelhan e anglés. Es usatgèrs des anteriores edicions dera aplicacion arreceberàn un messatge qu'anonciarà que pòden sauvar era version de 2015, que manten es donades des fichièrs istorics, mès que ja non ei operativa. Aguest messatge tanben indicarà era possibilitat de descargar era aplicacion Eleccions 21D. Era installacion se hè efectiva dempús d’aguesti ligams:

Android �� http://gen.cat/app21D_android

iOS �� http://gen.cat/app21D_ios

Tanben serà disponible e damb donades actualizades eth web resultats.parlament2017.cat entà hèr eth seguiment en dirècte dera participacion e er escrutinh electorau; e eth web parlament2017.cat a on se pòt consultar tota era informacion restacada damb eth 21D e comparar-la damb donades de comicis anteriors.

Pendent era jornada electorau contunharà operatiu eth telefòn deth call center 93 551 59 90 e eth telefòn d’informacion ciutadana 012.

Eth budgèt estimat d’organizacion des eleccions deth 21 de deseme ei de 25 milions d’èuros.

4 comparucions de premsa eth 21D

Eth dijaus 21 de deseme, eth secretari generau tecnic deth Ministèri der Interior, Juan Antonio Puigserver, en representacion deth Departament d’Interior dera Generalitat de Catalonha compareisherà ena sala de premsa deth Centre de Difusion de Donades entà informar des donades de participacion e des resultats provisòris. Ath ser, tanben l’acompanharà eth delegat deth Govèrn espanhòu en Catalonha, Enric Millo, entà hèr a conéisher es resultats definitius. Eth diuendres 22 de deseme, se publicaràn en web resultats.parlament2017.cat eth detalh des comicis per burèus electoraus.

Er orari* des comparucions serà eth següent:

10:00 ores: informacion sus era dubertura des locaus electoraus
13:45 ores: prumères donades de participacion enregistrada enquias 13:00 h
18:45 ores: dusaus donades de participacion enregistrada enquias 17:00 h
Darrèra comparucion: un còp disposam de 100% des donades escrutades.

*Er orari de comparucions pòt conéisher modificacions ath long dera jornada.