Un totau de 5.554.394 persones son aperades a participar enes comicis convocadi entad aguest dijaus Es sollicitacions de vòte dempús der estrangèr an aumentat un 81,53%, deth temps qu'eth vòte per corrèu dempús der Estat a diminuit un 26,6%, per arrepòrt a 2015
Es 2.680 locaus electoraus a on es catalans poderàn exercir eth sòn dret a vòte enes eleccions tath Parlament de Catalonha d’aguest 2017 an daurit puntuauments a 9:00 ores deth maitin es sues pòrtes “damb totau normalitat” e “sense cap incidéncia remercabla”. Atau ac a explicat eth secretari tecnic deth Ministèri der Interior, Juan Antonio Puigserver, en representacion deth Departament d’Interior dera Generalitat de Catalonha, pendent era prumèra comparucion dera jornada electorau dempús deth Centre de Difusion de Donades. “Dempús de hè ua ora, es catalans exercissen ja eth sòn dret de vòte damb totau normalitat e ac poderàn hèr enquias 20:00 ores deth ser”, a assegurat Puigserver.
Un totau de 5.554.394 persones poderàn votar enes comicis que se debanen aguest dijaus, segons donades der Institut Nacionau d’Estadistica (INE), un 0,79% mès qu'enes eleccions deth 27 de seteme de 2015. D’aguestes, 226.381 son inscrites en Recensaments de Residents en Estrangèr (CERA) e un totau de 1.36.444 poderàn votar peth prumèr còp en aguesti comicis, dempús d’auer complit 18 ans.
Pendent era sua intervencion, eth secretari a destacat era aumentacion deth nombre de sollicitacions acceptades entà votar dempús der estrangèr qu'a passat de 21.771 a 39.521, un 81,52% mès. Per contra, eth vòte per corrèu dempús d’Espanha diminuís per arrepòrt a 2015 en un 26, 6%, damb un totau de 78.876 sollicitacions acceptades, per arrepòrt as 107.421 de hè dus ans.
Eth secretari tanben a volut arregraïr eth “gran prètzhèt” en matèria de seguretat des apròp de 17.000 còssi e fòrces de seguretat – Mòssos d’Esquadra, Policia Nacionau, Guardia Civiu, Policies Locaus e vigilants de seguretat_ “que velharàn entà que tota era jornada electorau se debane damb normalitat”.
Prumères donades de participacion tàs 13:45 ores
Era propdana comparucion de premsa entà dar a conéisher es prumères donades de participacion enquias 13:00 ei prevista entàs 13:45.
Era jornada electorau se pòt seguir en temps reau e de forma gratuïta a trauès deth mobil o dera tauleta a trauès dera aplicacion Eleccions 21D, o trauès deth web resultats.parlament2017.cat.
