Se poderàn consultar es donades de participacion e es resultats des candidatures, damb era possibilitat de comparar-les damb es des convocacions de 2012 e 2015, e quitament escuélher es opcions entà arténher majories en Parlament. Aguesta app siguec era mès descargada de totes es qu'a publicat era Generalitat, damb descargaments realizadi en 133 païsi pendent es darrères eleccions de 2015.
Es ciutadans poderàn seguir en temps reau es donades de participacion e es resultats der escrutinh des eleccions tath Parlament de Catalonha deth propdan 21 de deseme. Un còp installada en terminau mobil o tauleta der usatgèr, era aplicacion Eleccions 21D permeterà consultar es auanci dera jornada electorau, mès que mès es percentatges de participacion e ua informacion detalhada des resultats provisòris des candidatures, que se poderàn comparar damb es des eleccions de 2015 e 2012.
Es possibilitats e combinacions entà obtier informacion son fòrça elevades, pr'amor qu'es donades se pòden seguir dempús de quinsevolhe lòc e se concrèten en diuèrsi nivèus: Catalonha, circonscripcions, comarques e municipis. Ath delà, er usatgèr a era opcion de mercar coma favorit un d’aguesti airaus geografics e seguir-lo de forma preferenta. Ua des foncionalitats dera aplicacion especifica son es vòtes artenhudi pes diferentes candidatures, tant a nivèu de Catalonha coma per circonscripcion, e conéisher eth nòm des candidats elegidi.
Eth mèn Parlament, ua foncionalitat que permet crear es majoritats desirades
Damb era foncionalitat ‘Eth mèn Parlament’, er usatgèr pòt escuélher es candidatures que li agradarie que pactèssen entà crear ipotetiques majoritats en Parlament, damb era possibilitat de poder méter un nòm ara formula escuelhuda, que se poderà comunicar e compartir enes hilats sociaus. Aguestes aliances simulades poderàn evolucionar a mesura qu'auance er escrutinh pendent era net electorau. Era aplicacion Eleccions 21D permet introdusir era simulacion escuelhuda abans deth dia des eleccions entà poder hèr eth sòn posterior seguiment.
Aguesta aplicacion ei era de mès reüssida de totes aqueres qu'a publicat era Generalitat. Es descargaments des dues edicions anteriores se multipliquen en estrangèr. Atau, era version corresponenta as eleccions deth 25 de noveme de 2012 siguec era prumèra a nivèu europèu liderat per un Govèrn. En solaments quate dies artenhec apròp de 80.000 descargaments dempús de 120 païsi, e se convertic ena prumèra en classament des aplicacions mobiles gratuïtes descargades des mercats d’Apple e Google.
Es descargaments aumentèren ena darrèra convocacion electorau deth 27 de seteme de 2015, damb eth registre de descargaments dempús de 133 païsi.
Era app ei disponible de forma gratuïta entà telefòns mobils e tauletes des plataformes Android e IOS (iPhone/iPad), e se pòt configurar en catalan, castelhan e anglés. Es usatgèrs des anteriores edicions dera aplicacion arreceberàn un messatge qu'anonciarà que pòden sauvar era version de 2015, que manten es donades des fichièrs istorics, mès que ja non ei operativa. Aguest messatge tanben indicarà era possibilitat de descargar era aplicacion Eleccions 21D. Era installacion se hè efectiva dempús d’aguesti ligams:
Android: http://gen.cat/app21D_android
