Eth DÒGC e eth BÒE an publicat aguest diuendres, 1 de deseme, er orde qu'establís es instruccions de besonh entara participacion des persones trabalhadores enes eleccions tath Parlament de Catalonha deth 21 de deseme. Eth tèxte dispòse en un prumèr article qu'es entrepreses deuen concedir as persones qu'agen era condicion d’electors un permís de quate ores laguens dera jornada de trabalh que les correspone, entà que poguen exercir eth sòn dret de vòte.
Aguesta licéncia s'esten ath vòte per corrèu entàs persones trabalhadores que realizen foncions luenh deth sòn domicili abituau o en d’autes condicions des quaus se deriven dificultats entà exercir eth dret de sufragi eth dia 21 de deseme.
Er orde tanben arremèrque qu'era determinacion deth moment d’utilizacion des ores concedides entara votacion ei potestat der empresari, e qu'aguest a dret a sollicitar ath trabalhador era exibicion deth justificatant acreditatiu d’auer votat, que deu èster fornit peth burèu electorau corresponent.
D’un aute costat, tàs membres des burèus de vòte e tàs interventors cau facilitar-les un permís se coïncidís damb era sua jornada de trabalh. En aguesti casi, eth permís se deu correspóner ara jornada complèta deth dia 21 de deseme de 2017 e tàs cinc prumères ores dera jornada laborau deth dia 22. Es persones trabalhadores qu'acrediten era condicion d’apoderadi solaments poderàn accedir ath permís eth dia des eleccions.
