Er interventor/a ei era persona assignada peth representant d’ua candidatura entà:
• Assistir eth burèu e participar enes sues deliberacions, damb votz mès sense vòte.
• Formular reclamacions e protèstes e demanar certificacions deuant deth burèu.
Poderà èster designat interventor/a, era persona qu'age era condicion d’elector/a e sigue inscrita en recensament electorau.
I pòt auer dus interventors per cada candidatura nomentadi per cada burèu de vòte, mès non pòden exercir es sues foncions de manèra simultanèa; se deuen substituïr liuraments entre eri.
Es interventors exercissen es sues foncions solament en burèu en quau son acreditadi.
Eth representant de cada candidatura pòt nomentar, enquiath 18 de deseme, enquia dus interventors per cada burèu de vòte mejançant era expedicion de credenciaus de chècs, damb era data e era signatura ath pè deth nomentament.
Es huelhes de chequièr entà cada interventor/a seràn divididi en quate parts:
• Ua, coma talon, pr'amor que la conserve eth representant;
• era dusau, que se deu liurar ath interventor/a coma credenciau;
• era tresau e era quatau, que se deuen remanar ath conselh de zòna, entà que ne mande ua ath burèu de vòte deth quau hè part e ua auta ath burèu ena lista electorau deth quau figure inscrit, pr'amor que se l'excludisque d'aguest burèu.
Eth manament as conselhs de zòna se harà enquiath 18 de deseme es quaus haràn eth manament as burèus de sòrta qu'agen es chècs en moment en qué se constituïsquen eth dia dera votacion.
Entre es 8.00 e es 8.30 ores deth dia dera votacion, es interventors deuen presentar es sues credenciaus (nomentament) e eth DNI ath president/a deth burèu electorau, que les deurerà acarar damb es sòns talons (còpies qu'a eth burèu).
S'era presidéncia deth burèu considère confòrmes es credenciaus presentades pes interventors damb es talons qu'a eth burèu, deu adméter es interventors.
S'eth president/a non a arrecebut es talons o a dobtes sus era autenticitat des credenciaus, era identitat des presentadi, o ambdús casi, les darà possession, s'atau ac exigissen, mès deu consignar en acta de constitucion era sua resèrva entar esclarziment apertient e entà exigir-les, se cau, era responsabilitat corresponenta.
Se se presenten mès de dus interventors per ua madeisha candidatura, eth president/a solaments darà possession as dus que prumèr presenten es sues credenciaus e numerotarà es credenciaus per orde cronologic de presentacion.
Es talons arrecebudi peth president/a se deuen ahíger ath dorsièr electorau. Es credenciaus presentades pes interventors, un còp acarades peth president/a, les seràn retornades. S'era presidéncia non arrecep es talons, es credenciaus corresponentes se deueràn ahíger ath dorsièr electorau ara fin der escrutinh.
S'eth interventor/a se presente en burèu dempús des 8.30 ores, un viatge redigit er acte de constitucion deth burèu de vòte, era presidéncia non li darà possession deth sòn cargue, encara que poderà votar en aguest burèu.
Es interventors que siguen trabalhadors per compde d'autrú e es foncionaris qu'acrediten era sua foncion de interventor/a an dret, pendent eth dia dera votacion e eth dia immediataments posterior, a un permís retribuït de jornada complèta pendent eth dia dera votacion, s'ei obrant, e a ua reduccion dera sua jornada de trabalh de cinc ores eth dia immediataments posterior.
Er interventor/a assistís eth burèu electorau e participe des sues deliberacions damb votz mès sense vòte.
Pòt formular reclamacions e protèstes e demanar certificacions, coma er acte de constitucion deth burèu.
Pòden exercir era sua foncion unicaments en burèu en quau siguen acreditadi. Es interventors d'ua madeisha candidatura acreditadi en burèu se pòden substituïr liuraments entre eri.
Es interventors vòten en burèu en quau son acreditadi, encara que non siguen includidi en recensament electorau d’aguest burèu, cada viatge que figuren ena circonscripcion que correspon ad aguest burèu; en cas contrari, quan er interventor/a non serà inscrit ena circonscripcion electorau que correspon ath burèu a on deu exercir es sues foncions, poderà votar pera pòsta.
Un empoderat/ada ei era persona a qui eth representant de cada candidatura autrege poders entà qu'age era representacion dera candidatura enes actes e es operacions electoraus.
Pòden èster empoderadi es ciutadans majors d’edat que se tròben en plen usatge des sòns drets civius e politics.
Es representants de cada candidatura autregen eth poder en favor der empoderat/ada d'aguesta candidatura.
Er empoderament se formalize deuant notari/ària o deuant eth secretari/ària deth conselh electorau provinciau o de zòna, es quaus expedissen era credenciau corresponenta, d’acòrd damb eth modèl establit oficiauments.
Per identificar-se, es empoderadi deuen mostrar es sues credenciaus (nomentament) e eth sòn document nacionau d'identitat as membres des burèus de vòte e a autes autoritats competentes.
Es trabalhadors per compde d’altrú e es foncionaris qu'acrediten era sua condicion d'empoderadi an dret a un permís retribuït pendent eth dia dera votacion.
Es empoderadi pòden:
• Accedir liuraments en toti es locaus electoraus.
• Examinar eth desvolopament dera votacion e der escrutinh en quinsevolhe burèu.
• Formular reclamacions e protèstes.
• Demanar certificacions.
Ath delà, se non i a interventors dera sua candidatura, pòden actuar coma taus en burèu e participar des sues deliberacions damb votz e sense vòte.
Es empoderadi an d’identificar-se coma taus en tot mostrar era sua credenciau e eth sòn document nacionau d’identitat as membres deth burèu.
Es empoderadi vòten en burèu a on figuren inscriti en recensament electorau.
Òc. Es interventors e es empoderadi pòden portar emblèmes o adesius damb eth nòm e es sigles dera candidatura que representen, mès solament damb era fin d’identificar-se coma interventors o empoderadi, non coma propaganda electorau.
Non. En moment en qué prene possession coma interventor/a d’un burèu, era persona designada ja non pòt exercir era foncion d’empoderat/ada en autes burèus de vòte.
