Tanben s’a publicat eth decret que dicte es normes complementàries que deuen regir eth procès des eleccions tath Parlament de Catalonha 2017
Eth 28 d’octobre de 2017, eth Bulletin Oficiau der Estat (BÒE) publique eth Reiau Decret 946/2017, de convocacion d’eleccions tath Parlament de Catalonha e era sua dissolucion. Eth tèxte fixe eth dia 21 de deseme coma era data de celebracion des naues eleccions e establís qu'ena circonscripcion electorau de Barcelona s’escuelheràn 85 deputats; en Girona, se’n escuelheràn 17; en Lhèida, 15; e en Tarragona, 18. Era campanha començarà tàs 0:00 ores deth dia 5 de deseme de 2017 e acabarà tàs 24:00 deth 19 de deseme de 2017.
Eth 3 de noveme de 2017, eth BÒE publique eth Reiau Decret 953/2017, que dicte es normes complementàries que deuen regir eth procès des eleccions tath Parlament de Catalonha 2017. Entre autes causes, aguest Reiau Decret establís era composicion des conselhs electoraus provinciaus e des burèus de vòte e seccions electoraus; especifique qu'eth recensament que s’emplegarà enes eleccions ei eth que se barrèc eth dia 1 d’agost de 2017; determine es tèrmes de designacion des representants des formacions politiques, e de presentacion e proclamacion des candidats que volguen concórrer ad aguestes eleccions.
Per çò qu'ei dera campanha electorau, s’indique qu'era Generalitat de Catalonha serà era encargada d'amiar a tèrme era campanha institucionau e que cinc dies abans deth 21 de deseme non se poderà difóner cap enquèsta ne sondatge d’opinion, ne de simulacion de vòte. Pendent era campanha, es mejans de comunicacion publica auràn de cedir espacis gratuïts tàs grops politics, d’acòrd damb es vòtes obtengudi per cada partit enes darrères eleccions tath Parlament. Es ajuntaments auràn de cedir lòcs gratuïts entà poder-i penjar cartèus, plancardes e bandieròles, e tanben espacis entara realizacion gratuïta d’actes de campanha.
Permís de 4 ores tàs trabalhadors e trabalhadores entà poder exercir eth sòn dret de vòte
Eth tèxte indique es tèrmes des vòtes per correspondéncia e eth procediment que deuen seguir es persones damb handicapacitat visuau; explique eth foncionament der escrutinh enes burèus de vòte electoraus e tanben preve qu'eth dia des eleccions se concedirà as trabalhadors e trabalhadores un permís de 4 ores laguens dera jornada de trabalh, que serà retribuït e non recuperable, entà poder exercir eth sòn dret de vòte.
Fin finau, eth Reiau Decret fixe es indemnizacions des membres des conselhs electoraus provinciaus, des secretaris d’ajuntament, des membres des burèus de vòte, des membres deth còs de Mòssos d’Esquadra e des representants dera Administracion; dera madeisha manèra que regule es despenses des ajuntaments e es conselhs electoraus, per mejan deth Sistèma de Gestion Electronica (SGE), metut en plaça peth Departament dera Vicepresidéncia e d’Economia e Finances.
Eth Reiau Decret de normes complementàries entara realizacion des eleccions tath Parlament de Catalonha 2017 conten 13 capítols, 32 articles, 2 disposicions addicionaus e 2 finaus.
