Eth cens electorau

QUE EI ETH CENS ELECTORAU?

Eth cens electorau ei un document que conten era inscripcion des qui amassen es requisits entà votar e non son privadi definitiuament o temporalament deth dret de sufragi.

QUINA EI ERA COMPOSICION DETH CENS ELECTORAU?

Eth cens electorau ei compausat peth:

• CER: cens d’electors residents en Espanha
• CERA: cens d’electors residents absenti que demoren en estrangèr
• CERE: cens d’estrangèrs residents en Espanha, en cas des eleccions municipaus.

QUI EI ER ENCARGAT DE FORMAR ETH CENS ELECTORAU?

Eth Burèu deth Cens Electorau, enquadrat laguens der Institut Nacionau d’Estadistica, ei er organ encargat dera formacion deth cens electorau, damb era collaboracion des ajuntaments e des consolats.
Atau madeish, es encargadi deth Registre Civil e deth Registre de Penadi e Rebèls, comuniquen quinsevolh circonstància que pogue afectar era inscripcion en cens electorau.

EI OBLIGATORI ESTER INSCRIT EN CENS ELECTORAU?

Òc, era inscripcion en cens electorau ei obligatòria entà poder votar.

QUIN CENS S’UTILIZARA ETH 27 DE MAI DE 2007?

Eth cens que s’utilize en cada procès electorau ei eth barrat eth dia prumèr deth mes anterior ath dera data dera convocatòria, ei a díder, en cas des eleccions deth 27 de mai, eth cens serà eth der 1 de març de 2007.

COM POGUI VERIFICAR ERA MIA INSCRIPCION EN CENS ELECTORAU?

Vos auetz d’adreçar ara delegacion provinciau deth Burèu deth Cens Electorau dera vòsta província, a on se trape disponible eth cens actualizat de manèra permanenta.
Entà consultar era vòsta inscripcion, damb motiu des eleccions deth 27 de mai, vos podetz adreçar, tanben, ath vòste ajuntament o consolat, a on s’expausaràn es listres electoraus vigentes deth 9 ath 16 d’abriu.

QUE EI UA CARTA CENSAU?

Era carta censau, remesa peth Burèu deth Cens Electorau, conten es donades actualizades dera inscripcion en cens electorau e dera seccion e era mèsa ena quau vos correspon votar.

ERA CARTA CENSAU SERVIS ENTA IDENTIFICAR-ME ENTA VOTAR?

Era carta censau a un caractèr sonque informatiu e non servís entà identificar-se ara ora de votar.

S'ES MIES DONADES ESTAN MAU, QUE E DE HER?

As de presentar ua reclamacion dauant dera delegacion provinciau deth Burèu deth Cens Electorau correspondent enter eth 9 e eth 16 d’abriu. Aguesta reclamacion se pòt presentar tanben en ajuntament deth municipi a on residisses.

QUINI DOCUMENTS SON DE BESONH ENTA PRESENTAR UA RECLAMACION?

S'era reclamacion se presente en AJUNTAMENT, ei de besonh mostrar eth DNI, eth passapòrt o eth permís de condusir e aportar-ne ua fotocòpia.
S'era reclamacion se presente ena DELEGACION PROVINCIAU DETH BUREU DETH CENS ELECTORAU ei de besonh mostrar eth DNI, eth passapòrt o eth permís de condusir, aportar-ne ua fotocòpia e aportar un certificat de recensament.

QUAN SE RESOLVEN ES RECLAMACIONS?

Es delegacions provinciaus deth Burèu deth Cens Electorau resolveràn es reclamacions coma maxim eth dia 19 d’abriu e n’ordenaràn era mòstra ath public eth 20 d’abriu. Ath delà, tanben notificaràn era resolucion adoptada a cadun des reclamants, ajuntaments e consolats correspondenti.

I A PERSONES INSCRITES EN CENS ELECTORAU QUE NON PODEN VOTAR?

Òc, en començar er an s’inscriuen en cens toti es residents que haràn 18 ans enter er 1 de gèr e eth 31 de deseme der an en cors, damb era anotacion de “menor”. Aguesti “menors” inscriti en cens poderàn votar s'es eleccions an lòc en ua data ena quau ja agen complit es 18 ans.

QUE SON ES CERTIFICADI CENSAUS ESPECIFICS?

Es certificadi censaus especifics, les expedissen, exclusivament, es delegacions provinciaus deth Burèu deth Cens Electorau un viatge finalizat eth termini de rectificacions e reclamacions e enquiath madeish dia dera votacion.
Pòden èster de dus tipes:

• Certificat de nauta: constituís era pròva qu'era persona que lo presente acredite èster inscrita en cens encara que non figure enes listres.
• Certificat de correccion d’errances: er elector/tritz òc qu'apareish enes listres, mès i a quauqua errança enes sues donades (nòm, cognòm, eca.).

Es certificadi censaus s’an de presentar en moment de votar.

QUE PASSE S'ETH MEN NOM E ES MENS COGNOMS, QUE FIGUREN CORRECTAMENT EN MEN DNI, NON COÏNCIDISSEN DAMB ES DONADES QUE FIGUREN EN CENS DERA MESA PER ERRANCES IMPUTABLES ARA CONFECCION DETH CENS O PERA GRAFIA O ORTOGRAFIA CATALANA DISPARIERA? POGUI VOTAR?

Òc que pòs votar, tostemp qu'ena mèsa electorau i age quauqua persona presenta e dongue testimòni favorable sus era vòsta identitat. Se maugrat açò, era vòsta identitat presente dobtes ara mèsa, as d’anar entara sedença dera delegacion provinciau deth Burèu deth Cens Electorau e, damb eth DNI, eth passapòrt o eth permís de condusir, ua fotocòpia d’aguest document e un certificat de recensament, sollicitar un CERTIFICAT CENSAU ESPECIFIC DE CORRECCION D’ERRANCES deth cens entà poder votar. Se presentatz aguest certificat, era mèsa electorau a de perméter eth vòt.

SE FIGURI ENES LISTRES DETH CENS ELECTORAU EXPAUSADES EN MEN AJUNTAMENT E SO INSCRIT EN CENS E, MAUGRAT AÇO, QUAN VAU A VOTAR ENTARA MESA ELECTORAU NON APAREISHI ENES LISTRES DETH CENS DERA MÈSA, QUE E DE HER? POGUI VOTAR?

As de sollicitar ara sedença dera delegacion provinciau deth Burèu deth Cens Electorau un CERTIFICAT CENSAU ESPECIFIC DE NAUTA en cens entà poder votar, en tot exibir eth DNI, eth passapòrt, eth permís de condusir, ua fotocòpia d’aguest document e un certificat de recensament. Un viatge concedit, as d’anar tara tua mèsa electorau damb eth certificat e atau poderàs votar.