Glossari de termes electoraus

Abstencion
Ei eth conjunt d’electors que non exercissen eth sòn dret de vòt en ues eleccions. Se pòt expressar en valors absoluts o en percentatges. Era soma des valors absoluts dera abstencion e era participacion somen eth cens electorau. Era soma des sòns percentatges ei, evidentament, 100, pr’amor que son concèptes complementaris.

Acta d’escrutinh
Document oficiau a on queden reflectides totes es donades der escrutinh d’ua mèsa electorau: cens, certificats censaus, vòts nulli, vòts en blanc, vòts entà cada candidatura, eca. Ei de besonh que sigue signada per toti es components dera mèsa (president, vocaus e interventors).

Administracion convocanta
Ei era administracion publica que convòque e organize un procès electorau: era Generalitat de Catalonha, en cas d’eleccions tath Parlament de Catalonha e eleccions entath Conselh Generau d’Aran; eth Govèrn dera nacion (Ministèri der Interior), en cas d’eleccions entàs Còrts Generaus e tath Parlament Europèu, e es ajuntaments entàs eleccions municipaus.

Administracion electorau
A era finalitat de garantir era transparéncia e objectivitat deth procès electorau, e eth principi d’igualtat. La compausen era Junta Electorau Centrau, es juntes electoraus provinciaus e es juntes electoraus de zòna e, se cau, es juntes electoraus dera comunautat autonòma, amassa damb es mèses electoraus.

Burèu de Contròl d'Incidéncies (OCI)
Espaci a on se resòlen es incidéncies produsides per anomalies ena transmission d’informacion tath centre de processament electorau. Son emplaçades estrategicament ath long dera geografia pr’amor de proporcionar era adequada cobertura a un airau que comprén un cèrt nombre de mèses electoraus.

Burèu deth Cens Electorau
Organ encargat dera formacion deth cens electorau. Ei ua entitat administratiua emmarcada laguens der Institut Nacionau d’Estadistica, damb delegacions en totes es províncies.