Glossari de termes electoraus

Cabina
Element electorau que s’a de plaçar en recinte en qu’i age era mèsa electorau e tath que podèn accedir es electors entà premanir era documentacion de votacion de manèra qu’atau se presèrve eth dret ath secrèt de vòt.

Campanha electorau
Periòde de temps prealable ath dia dera votacion, era durada deth quau se fixe ena convocatòria des comicis e permet as candidatures demanar eth vòt ar electorat per miei d’actes publics e des mieis de comunicacion. Era normatiua generau electorau establís qu’aguesta a ua durada de 15 dies.

Campanha institucionau
Campanha destinada a informar as ciutadans sus era data de votacion, eth procediment entà votar e es requisits e tràmits deth vòt per corrèu, sense influïr ena orientacion de vòt.

Candidat/a
Component d’ua listra electorau un viatge aguesta a estat proclamada pera junta electorau competenta. Segontes eth tipe d’eleccion, pòden èster candidats a deputats e senadors deth Congrès e deth Senat, respectivament, a deputats des parlaments autonòms o deth Parlament Europèu, candidats a regidors des consistòris municipaus e candidats a conselhèrs generaus d’Aran.

Candidat/a elècte/a
Candidat qu’a obtengut un escon entà ua circonscripcion determinada.

Candidatura
Conjunt de candidats que, en tot constituïr ua listra, se presente en ua circonscripcion electorau per un partit politic, coalicion de partits o agrupacion d’electors, d’acòrd damb es critèris e requisits fixadi pera lei.

Cens electorau
Conjunt d’individus que complissen es requisits entà èster electors e que non son privadi deth dret de sufragi. Se compause des electors residents en Espanha e des residents e absents que demoren en estrangèr (CERA). Eth cens electorau ei unic entà tota classa d’eleccions, totun enes eleccions municipaus e enes eleccions entath Parlament Europèu s’hig eth nomentat CERE, ei a díder, eth cens d’estrangèrs residents en Espanha.

Cens escrutat
Ei era soma d’electors que correspon as mèses escrutades enquia un moment determinat. S’exprèsse, normaument, coma percentatge sus eth totau deth cens. Per exemple, se tàs 21 ores s’a artenhut escrutar un percentatge de mèses determinat, açò vò díder que tanben s’a escrutat eth percentatge deth cens que correspon as mèses escrutades.

Cens d’electors residents absenti (CERA)
Son es persones que demoren en estrangèr e qu’exercissen eth sòn vòt en burèu consular o per corrèu certificat. I a un cens CERA en cada circonscripcion electorau, mès en escrutinh de resultats provisionaus non se’n computen es vòts excèpte des eleccions municipaus.

Cens d’estrangèrs residents en Espanha (CERE)
Ei eth cens des ciutadans de d’auti païsi dera Union Europèa i de Norvègia, residents en Espanha, qu’an dret a exercir eth dret de sufragi enes eleccions municipaus e enes deth Parlament Europèu, damb era manifestacion preabla dera volentat de vòtar.

Cens iniciau/finau
Eth cens electorau iniciau ei çò que balhe eth Burèu deth Cens Electorau der INE e ei eth vigent en moment dubertura des mèses. Se pòt modificar pendent eth dia des votacions damb es certificats censaus o per decision deth president dera mèsa o autoritat judiciau, de forma qu’eth resultat sigue eth cens finau (definitiu).

Centre de Difusion de Donades (CDD)
Lòc on se realize era difusion publica des resultats electoraus provisionaus per miei d’informes en papèr e programes de difusion audiovisuau (TV).

Centre de Processament Backup (CPB)
Subsidiari deth Centre de Processament de Donades, emplaçat en un edifici independent pr’amor de poder contunhar er escrutinh de resultats en cas d’evacuacion der edifici principau.

Centre de Processament de Donades (CPD)
Lòc a on s’emplacen es equipaments informatics e programes de càlcul entà hèr es operacions d’agregacion des mèses, còmput de vòts e, en generau, quinsevolh operacion o procès informatic entar escrutinh de resultats provisionaus.

Centre d’Arremassada d'Informacion (CRI)
Lòc fisic a on es representants dera Administracion e coordinadors des collègis electoraus comuniquen es donades dera jornada electorau: era dubertura de mèses, es auanci de participacion e es resultats der escrutinh provisionau mèsa per mèsa (acta per acta). En CRI i a es telefons entara recepcion de donades, es equips entara recepcion des donades de PDA/Smart Phone, es equips de gravacion e es equips d’incidéncies.

Centres operatius
Lòcs fisics (o logics) a on s’amien a tèrme toti es procèssi extèrni der escrutinh de resultats provisionaus. Se dividís en: centres d’arremassada d’informacion (CRI), burèus de contròl d’incidéncies (OCI), centres de processament de donades (CPD), centre de processament backup (CPB) e centres de difusion de donades (CDD).

Certificat censau
Document emés pes delegacions provinciaus deth Burèu deth Cens Electorau que constituís un miei de pròva damb eth qu’un ciutadan pòt exercir eth dret ath vòt, a despiet de que non sigue censat ena mèsa a on vage a exercir-lo. Modifique eth cens d’electors dera mèsa.

Certificat de votacion
Imprés electorau, era expedicion deth quau pòt demanar quinsevolh elector damb era finalitat d’acreditar documentaument er exercici deth vòt ara mèsa correspondenta.

Circonscripcion electorau
Conjunt d’electors, acorropadi damb base territoriau, a compdar deth vòt des quaus se procedís ara distribucion d’escons. Enes eleccions europèes ei d’àmbit nacionau; enes generaus, d’àmbit provinciau; enes autonomiques, d’àmbit provinciau (excèpte enes autonomies insulars, d’àmbit ièrla, e en Astúries e Múrcia, ua auta division intèrna), e enes eleccions municipaus, d’àmbit municipau. Enes eleccions en Conselh Generau d’Aran era circonscripcion ei eth terçon.

Coalicion
Formacion politica concrèta, abilitada entara presentacion de candidatures, compausada per partits politics e/o federacions de partits.

Collègi electorau
Lòc fisic a on s’exercís eth dret de vòt. Pòt estar compausat per ua o mès mèses electoraus.

Comission de ràdio e television
Ei er òrgan que jos era direccion dera Junta Electorau Centrau hè era prepausa de distribucion des espacis gratuïts de propaganda electorau.

Consolats
Burèus der Estat espanhòu emplaçadi en estrangèr que, per çò que tanh ara matèria electorau, hèn prètzhèts adreçadi ara confirmacion deth CERA. Ei eth lòc a on es electors residents en estrangèr pòden depausar eth vòt enes eleccions generaus, europèes e autonomiques.

Comptabilitat electorau
Registre des ingrèssi e des despenes electoraus qu’an de hèr totes es formacions politiques que participen en procès electorau.

Convocatòria electorau
Accion mejançant era quau era administracion competenta cride ath còs d’electors a exercir eth sòn vòt en ua data determinada, damb un calendari entara presentacion de candidatures, proclamacion, campanha electorau, eca.