Vòt presenciau

Eth dia 27 de mai er elector que volgue votar s’a d’adreçar, enter es 9 ores e es 20 ores, ara mèsa electorau correspondenta. Eth Burèu deth Cens Electorau envie a toti es electors ua carta a on figure era seccion ena quau son censadi e era mèsa a on les correspon votar, damb era sua adreça.

Un viatge escuelhuda era papereta dera candidatura ara quau se vò dar eth vòt, er elector s’a d’apropar ara mèsa e díder eth nòm e cognòms ath president. Es auti membres dera mèsa verificaràn era identitat der elector e era sua inscripcion ena listra deth cens electorau. Era identificacion ena mèsa se hè mejançant eth DNI, passapòrt o permís de condusir, a on apareishe era fotografia deth titular. Ei de besonh que siguen es originaus e non ua fotocòpia, encara que siguen caducadi. En cas d’estrangèrs (comunitaris o norvègis) que vòten enes eleccions municipaus era verificacion se realizarà mejançant era carta d’estrangèr.

Posteriorament, er elector liurarà pera sua pròpria man ath president era engolòpa de votacion barrada. Eth president, sense amagar era engolòpa ne un moment dera vista deth public, a de díder eth nòm der elector en votz nauta e híger “vòte”, e a d’introdusir-lo ena orna.