012 Telefòn d’atencion ar elector
D'autes circonstàncies
- MALAUTI E PERSONES ANDICAPADES
- PERSONAU EMBARCAT E EN MISSIONS INTERNACIONAUS
- INTÈRNS EN CENTRES PENITENCIARIS
En cas de malautia o incapacitat qu'empedisque ar elector desplaçar-se personalament a un burèu de Corrèus e demanar era sollicitud de vòt per corrèu, cau actuar dera manèra següenta:
- Era sollicitud d’inscripcion en cens la pòt hèr en nòm der elector ua auta persona autorizada notarialament o consularament mejançant un document que s’estenerà individuaument en relacion damb cada elector e en quau non se pòt includir mès d’un elector, com tanpòc pòt era madeisha persona representar mès d’un elector.
- Eth desplaçament des notaris en domicili des electors malauti o andicapadi pr'amor qu'aguesti autregen eth poder notarial ei gratuït entar elector, pr’amor que, com a indicat era Junta Electorau Centrau, aguestes despenes s’an d’enténer includides en critèri de gratuïtat des actes notarials.
- Eth termini entà demanar eth vòt per corrèu ei deth 3 d’abriu ath 17 de mai.
- Eth termini entara remission dera engolòpa damb eth vòt ei deth 7 de mai ath 23 de mai.
Eth personau des vaishèths dera Armada, marina mercanta o flòta pescaira nacionalizades en Espanha qu'agen de demorar embarcadi des dera convocatòria des eleccions enquiara sua celebracion e que pendent aguest periòde entren en pòrts, prealablament coneishudi, en territòri nacionau, poderàn exercir eth sòn dret de sufragi electorau dera manèra següenta :
A trauèrs deth servici de radiotelegrafia, se pòt sollicitar enter eth 3 d’abriu e eth 17 de mai ena delegacion provinciau deth Burèu deth Cens Electorau a on era persona interessada sigue inscrita eth certificat d’inscripcion en cens.
En messatge s’an de hèr constar es dades següentes:
a. Nòm e dus cognòms dera persona sollicitanta
b. Numerò deth document nacionau d’identitat
c. Data de neishement
d. Província e municipi de neishement
e. Municipi de residéncia a on sigue includida en cens
f. Carrèr e numerò deth sòn domicili
g. Numerò deth vaishèth a on ei embarcada
h. Pòrt o pòrts a on se prevé era arribada deth vaishèth, damb indicacion des dates concrètes en qué s’a de produsir era arribada
Se se podesse recéber era documentacion electorau a trauèrs d’un aute vaishèth, cau indicar en radiomessatge er armador, consignatari o vaishèth a on s’a d’enviar.
Ar efècte de sollicitud deth vòt per corrèu, es servicis de radiotelegrafia des vaishèths auràn era consideracion de dependéncies delegades deth servici de Corrèus e es comandants e capitans, o er oficiau en qué exprèssament deleguen, era de foncionaris encargadi dera recepcion dera sollicitud.
Era delegacion provinciau deth Burèu deth Cens Electorau correspondent, un còp verificada era inscripcion dera persona interessada, considerarà a toti es efèctes coma recebuda era sollicitud e procedirà a reméter era documentacion apertienta ath pòrt o, se cau, ar armador, consignatari o vaishèth qu’er elector auesse designat, enter eth 7 e eth 20 de mai.
Un còp recebuda era documentacion, er elector a de reméter per corrèu certificat e urgent, des de quinsevolh des pòrts en qué eth vaishèth atraque, era documentacion electorau correspondenta, ara mèsa a on li correspon votar abantes deth 23 de mai.
Entar exercici deth dret de vòt per corrèu deth personau embarcat en vaishèth dera Armada o que pertanhe a unitats militares terrèstres o aerianes que se trapen destacades dehòra deth territòri nacionau, es situacions excepcionaus restacades damb era defensa nacionau e que participe o coopère damb es fòrces des païsi aliadi e d’organizacions internacionaus en missions d’assisténcia umanitària o mantenença dera patz internacionau, cau seguir eth procediment següent:
Eth comandant deth vaishèth o eth cap d’unitat remeterà era relacion de personau que desire exercir eth sòn dret de sufragi ath director generau de Personau deth Ministèri de Defensa, qui tramitarà es sollicituds deth certificat d’inscripcion en cens as correspondentes delegacions provinciaus deth Burèu deth Cens Electorau a compdar dera data dera convocatòria e enquiath 17 de mai.
Per cada persona sollicitanta cau hèr-i notar:a. Nòm e dus cognòms
b. Numerò deth document nacionau d’identitat
c. Data de neishement
d. Província e municipi de neishement
e. Municipi de residéncia a on sigue includida en cens
f. Carrèr e numerò deth sòn domicili
Era delegacion provinciau deth Burèu deth Cens Electorau correspondent, un còp verificada era inscripcion dera persona interessada, considerarà a toti es efèctes era sollicitud coma recebuda e procedirà a reméter era documentacion apertienta, enter eth 7 e eth 20 de mai, ara Direccion Generau de Personau deth Ministèri de Defensa, pr'amor que, peth procediment mès urgent possible, la hèsquen arribar ara persona destinatària.
Er elector procedirà a exercir eth sòn dret de vòt, un viatge recebuda era documentacion. Des vòts emetudi se’n harà cargue eth comandant deth vaishèth o eth cap dera unitat, qui les susvelharà e en garantirà era seguretat, era integritat e eth secrèt, enquia que siguen recuelhudi per encargat de transportar-les entath territòri nacionau.
Era Direccion Generau de Personau deth Ministèri de Defensa harà arribar es vòts recebudi a Corrèus abantes deth 23 de mai. Corrèus les remeterà damb caractèr urgent ara mèsa electorau correspondenta.
Es intèrns en centres penitenciaris que non siguen privadi deth dret de sufragi vòten per corrèu.
Eth procediment que cau seguir ei eth següent:
- Eth director de cada centre penitenciari o era persona en qué delegue sollicitarà a Corrèus qu'un foncionari d’aguest servici se desplace en ua data determinada ath centre damb es impresi de sollicitud d’inscripcion de besonh entà èster formalizadi pes intèrns que desiren exercir eth sòn dret de vòt (enter eth 3 d’abriu e eth 17 de mai).
Se quauqu'un des intèrns non a DNI, n’i a pro damb eth document d’identitat intèrn qu'an toti es intèrns, tostemp que i apareishe era fotografia dera persona titolara. - Eth Burèu deth Cens Electorau a de reméter ath centre penitenciari engolòpes e paperetes sufisentes que seràn liurades personalament peth foncionari de Corrèus ar elector (enter eth 7 e eth 20 de mai).
- Er elector elegirà era papereta correspondenta, l'introdusirà ena engolòpa e aguesta en ua auta engolòpa qu'a d’anar adreçada ara mèsa electorau que correspone (enter eth 7 de mai e eth 23 de mai).
- Eth foncionari de Corrèus harà arribar aguestes engolòpes as correspondentes mèses electoraus de votacion eth dia des eleccions.