Glossari de termes electoraus

Termièra legau
Limit minim de vòts que s’establissen en escrutinh pr’amor qu’ua candidatura pogue concórrer ara distribucion d’escons. Enes eleccions generaus e europèes ei eth 3% entà cadua des circonscripcions e enes municipaus, eth 5%, entot qu’enes autonomiques i a diuèrses formules segontes era comunautat autonòma (en Catalonha, eth 3%). Enes eleccions entath Conselh Generau d’Aran aguesta termièra legau ei tanben deth 3%.

Votants d’ua mesa
Ei exactament igual ath concèpte de participacion en aguesta mèsa.

Vòts de residents absenti en estrangèr
Enes eleccions locaus se contabilizen enes madeishes mèses, entot qu’ena rèsta d’eleccions les escruten es juntes electoraus provinciaus e les higen ena acta der escrutinh generau en un cens independent (veigatz cens d’electors residents absenti-CERA).

Vòt per corrèu
Ei eth vòt emés pes electors que per abséncia o malautia non pòden presentar-se ena mèsa eth dia dera votacion, un viatge hèta prèviament era sollicitud ara delegacion provinciau deth Burèu deth Cens Electorau. Eth servici de Corrèus a de conservar era correspondéncia adreçada as mèses electoraus, trasladar-la tàs 9 hores, e incorporar-i pendent eth dia tota era que se recebe enquias 20 hores.

Vòts a candidatures
Son es vòts realizats validament entà quinsevolh des candidatures electoraus. S’exprèsse, abituaument, en percentatges sus es vòts valids, entath totau der àmbit e entà cadua des candidatures. Era relacion entre es diuèrses categories de classificacion des vòts ei era que se presente ara seguida:
Vòts totaus = vòts valids + vòts nulli
Vòts valids = vòts en blanc + vòts a candidatures

Vòts en blanc
Son es vòts emetudi en engolòpes sense papereta. Enes eleccions tath Senat, son vòts en blanc es paperetes que non agen indicacions a favor de cap candidat. Tanben son vòts en blanc es emetudi a favor de candidatures retirades ath long deth procès. Es vòts en blanc formen part deth conjunt de vòts valids (causa qu’ei considerabla entath càlcul de percentatges).

Vòts nulli
Son es vòts emetudi en engolòpa o paperetes diferentes deth modèu oficiau, en papereta sense engolòpa, en engolòpa qu’age mès d’ua papereta (se son de diferentes candidatures) e en paperetes en es que s’age modificat, hijut o raiat nòms des candidats que i son includidi. Enes eleccions tath Senat, son nulles es paperetes a on s’agen mercat mès de tres nòms.

Vòts valids
Ei eth totau de vòts emetudi mens es vòts nulli. Se dividissen en vòts en blanc e vòts a candidatures. Ei era magnitud emplegada coma denominador entà calcular eth percentatge de vòts de cada candidatura.