Glossari de termes electoraus

Dia des votacions
Dia qu’es electors pòden exercir eth sòn dret de vòt. Er orari permés entàs votacions ei des des 9 ores enquias 20 ores. Ar efècte deth dispositiu electorau, eth dia se dividís ens fases següentes: dubertura des mèses (9 ores), auançament de participacion (en Catalonha, 13 ores e 18 ores) e escrutinh de vòts (a compdar des 20 ores).

Difusion de resultats provisionaus
Operacions damb era finalitat de dar a conéisher es resultats provisionaus der escrutinh. Segontes eth miei utilizat se parle de difusion audiovisuau, informes escrits de resultats o terminaus de consulta.

Dispositiu electorau
Conjunt de sistèmes e equipaments qu’amien a tèrme toti es prètzhèts correspondents a un procès electorau. Ei responsabilitat dera Administracion convocant, que cerque eth supòrt, entara sua execucion, d’empreses extèrnes.

Districte censau
Agropacion geografica de seccions censaus. Ei ua unitat intermieja entre era seccion e eth municipi. Era definicion complèta d’ua mèsa segontes toti es sòns nivèus ei: circonscripcion, municipi, districte, seccion e mèsa.

Eleccions
Procès peth que se renauissen es components d’ua cambra o parlament, damb era eleccion dirècta per part des ciutadans. En sentit restringit, mos referim as eleccions com eth dia des votacions en tot diferenciar-lo deth procès electorau en sentit ampli. En Espanha i a, entre d’autes, eleccions tàs Còrts Generaus, eleccions europèes, tàs parlaments autonomics e eleccions municipaus, segontes er àmbit respectiu.

Elector/a
Ei era persona qu’exercís eth dret de sufragi actiu (vòt). Pòden èster electors es espanhòus majors d’edat e que non siguen en cap des supòsits previsti pera lei que n’impedisquen er exercici. Enes eleccions europèes e municipaus aguest dret s’amplie as residents en Espanha de païsi dera Union Europèa. Enes eleccions municipaus, tanben as residents en Espanha nacionaus de d’auti païsi a on se permete eth dret ath vòt actiu as espanhòus residents.

Elegible
Ei era persona qu’exercís eth dret de sufragi passiu. Pòden èster elegibles es espanhòus majors d’edat, que, auent era qualitat d’electors, non siguen en quauqu’ua des causes d'ineligibilitat prevista pera lei. Enes eleccions municipaus e tath Parlament Europèu aguest dret s’amplie as residents en Espanha de païsi dera Union Europèa. Enes eleccions municipaus, tanben as residents en Espanha nacionaus de d’auti païsi a on se permete eth dret ath vòt passiu as espanhòus residents.

Empoderat/ada
Representant nomentat per ua candidatura entà que hèsque ua foncion de contròl, especiaument enes actes de votacion e d’escrutinh. Non forme part dera mèsa e a de votar en aquera a on estongue censat. Pòt visitar quinsevolh mèsa.

Escon (sèti)
Unitat de composicion deth parlament o cambra a que se referissen es eleccions. Er objectiu des eleccions ei assignar es escons (sètis) dera cambra as diferentes candidatures segontes eth nombre de vòts e ua formula electorau d’atribucions d’escons.

Escrutinh generau
Acte de caràcter public qu’amien a tèrme es juntes electoraus competentes eth tresau dia següent ath dera votacion pr’amor de proclamar es resultats definitius oficiaus. Se realize a compdar des resultats provisionaus, en tot revisar es actes entà detectar-i errors e corregir-les, en cas que n’i age.

Escrutinh provisionau
S’efectue en cada mèsa electorau, a compdar deth tancament des collègis. Eth president da per acabada era votacion e se procedís ara dubertura des urnes e ara comptabilitzacion des vòts. Damb eth resultat finau se ramplís era acta, ua còpia dera que se liure ara persona representanta nomenada pera Administracion, qu’ac comunique ath Centre d’Arremassada d’Informacion.