Es membres des meses electoraus

QUE EI UA MESA ELECTORAU?

Era mèsa electorau ei er element essenciau, era unitat basica de tot eth procès electorau e eth lòc a on s’emet eth vòt.

QUINA EI ERA COMPOSICION D’UA MESA ELECTORAU?

Ua mèsa electorau ei formada per tres ciutadans: 1 president e 2 vocaus.

POGUI PARTICIPAR EN UA MESA ELECTORAU D’UA AUTA MANERA?

Ath delà deth president o presidenta e des dus vocaus, pòden assistir as actes dera mèsa e participar enes sues deliberacions es interventors e es apoderadi nomenadi pes candidatures.

COMA S’ELEGISSEN ES MEMBRES DES MESES ELECTORAUS?

Es ajuntaments, jos supervision des juntes electoraus de zòna, elegissen as membres des mèses electoraus e as sòns suplents per tiratge public enter es persones censades en ua seccion, que siguen menors de 65 ans e que sàpien liéger e escríuer.
Aguest tiratge se harà enter eth 28 d’abriu e eth 2 de mai de 2007.
Era persona designada coma membre d’ua mèsa electorau receberà ua notificacion e un manuau d’instruccions.

ERA MESA EI COMUNA ENTA TOTES ES ELECCIONS QU'AN LOC ETH 27 DE MAI?

Òc, atau ac establís er article 25.2 dera Lei organica 5/1985, ena suposicion qu'en un madeish dia agen lòc diuèrses eleccions, era mèsa ei comuna entà totes es eleccions.

COM EI REGULADA ERA FONCION DE MEMBRE DE MESA ELECTORAU?

Es presidents e vocaus des mèses, atau coma es suplents que siguen fin finau designadi coma membres titulars dera mèsa:

• perceberàn ua indemnitat de 53,34 èuros
• auràn dret a ua reduccion dera jornada laborau de cinc ores eth dia immediatament posterior
• seràn protegidi peth sistèma dera seguretat sociau en cas de contingéncies e situacions que poguen derivar-se dera sua participacion enes eleccions.

EI OBLIGATORI ETH CARGUE DE PRESIDENT/A O VOCAU DE MESA ELECTORAU?

Òc, ath delà d'èster un déuer ciutadan, ei ua obligacion, er incompliment dera quau ei punit pera lei damb pena d’arrèst major e multa.

SE ME DESIGNEN MEMBRE DE MESA, QUINES CAUSES POGUI ALLEGAR ENTA DISPENSAR ERA MIA ASSISTENCIA COMA COMPONENT DERA MESA ELECTORAU?

Pòden auer desencusa legau es persones següentes, tostemp que presenten ua justificacion documentau:

• es membres des juntes electoraus
• es candidats e suplents as eleccions deth 27 de mai
• es interventors e apoderadi designadi damb anterioritat ara notificacion deth nomentament de membre de mèsa
• es militars en actiu
• es condemnadi per senténcia fèrma ara privacion deth dret a votar e a èster escuelhut
• es declaradi incapables per senténcia judiciau fèrma
• es malauts espitalizadi o non
• es residents dehòra dera circonscripcion electorau
• eth personau embarcat
• es persones inelegibles
• e quinsevolh auta persona qu'age ua rason justificada e documentada sufisentament.

A ON E D’ANAR SE M’AN NOMENAT MEMBRE D’UA MESA E NON POGUI PRESENTAR-ME ETH DIA 27 DE MAI?

As d’anar tara junta electorau de zòna correspondenta ath tòn municipi de residéncia e allegar es desencuses, justificades documentaument, que t’empedissen èster membre dera mèsa electorau.

QUIN TERMINI E ENTA ALLEGAR DESENCUSES COMA MEMBRE DE MESA?

Eth termini enta allegar, dauant dera junta electorau de zòna correspondenta, ei eth comprenut enter es dies 6 e 12 de mai, andús includidi.

QUIN EI ETH TERMINI QU'AN ES JUNTES ELECTORAUS DE ZÒNA ENTÀ RESÒLVER ES DESENCUSES ALLEGADES?

Deth dia 13 ath 17 de mai, andús includidi.
Un còp resolvudes es allegacions pera junta electorau de zòna, se pòden produsir dues situacions:

• en cas d’auer negligit era desencusa allegada, era junta electorau de zòna notificarà definitiuament eth nomentament ath membre de mèsa
• en cas d’admeter-la, se desencusarà ara persona deth cargue, se li notificarà e se designarà un aute membre de mèsa, a qui s’emeterà era notificacion correspondenta.

Contra era decision dera junta electorau de zòna non i cap recors ulterior.

QUE E DE HER SE NON POGUI ANAR ETH DIA 27 DE MAI ENTATH COLLEGI ELECTORAU ENTA FORMAR PART DERA MESA?

Se non pòs presentar-te entàs 8.00 ores deth dia 27 de mai, per causa justificada, as d’avertir çò de mès lèu possible ara junta electorau de zòna correspondenta. Se non i a causa justificada, eth hèt de non anar tara mèsa ei un delicte sancionat damb pena d’arrèst major e multa.

EN CAS QU'ETH DIA 27 DE MAI SIGUE LABORABLE ENTA JO, E DRET A UN PERMIS ENTA ESTER MEMBRE D’UA MESA?

Òc, es persones que non gaudisquen de pòsa setmanau eth dia des eleccions e acrediten era condicion de membres de mèsa electorau o d’interventors, an dret a gaudir d’un permís retribuït correspondent ara jornada complèta d’aguest dia e ara reduccion des cinc prumères ores dera jornada laborau posteriora, tanben damb dret a retribucion. Aguesti permisi, de caractèr non recuperable, seràn retribuïts pera empresa un còp justificada era actuacion coma membre de mèsa o coma interventor/a.

ENTA QUINA ORA SE CONSTITUIS ERA MESA ELECTORAU?

Entàs 8.00 ores deth dia dera votacion s’an d'amassar, en collègi electorau correspondent a cada mèsa, eth president o presidenta, es dus vocaus e es suplents respectius entà constituïr era mèsa electorau.

SE POT CONSTITUIR UA MESA SENSE PRESIDENT O QUAUQUE VOCAU?

Non, non se pòt constituïr ua mèsa sense era preséncia d’un president o presidenta e de dus vocaus.

QUE CAU HER S'ENTAS 10.00 ORES NON S’A CONSTITUIT ERA MESA?

Es membres dera mèsa presenti o era autoritat governativa ac an de comunicar ara junta electorau de zòna correspondenta, era quau convocarà ua naua votacion qu'aurà lòc laguens es dus dies següenti.

UN VIATGE CONSTITUIDA ERA MESA, QUE HEN ES SUPLENTS?

Es suplents que non agen estat nomenadi finauments membre dera mèsa electorau, un viatge constituïda era mèsa, pòden abandonar eth collègi electorau. En aguest moment despareish tota responsabilitat juridica existenta enquia alavetz.

QUINI ELEMENTS SON DE BESONH ENTARA VOTACION?

Cada mèsa electorau a de dispausar coma minim des elements següenti:

• ua orna per cadua des eleccions qu'an lòc. Es ornes an d’estar sagelades. En cas que s’age espatracat o s’age deteriorat eth ligam sagelat, eth president o presidenta dera mèsa s’a d’assegurar de qu’era orna ei barrada
• ua cabina
• un numerò sufisent d’engolòpes e de paperetes de totes es candidatures que se presenten a cadua des eleccions.

Se manque quinsevolh des elements indicadi ena ora soslinhada entara constitucion dera mèsa, eth president o presidenta ac a de comunicar immediatament per telefòn ara junta electorau de zòna, pr'amor que les ac provesisque.

DE QUINA DOCUMENTACION E DE QUINI ESTAMPADI A DE DISPAUSAR CADA MESA ELECTORAU?

Cada mèsa electorau a de dispausar dera documentacion e des estampadi següents:

• Dus exemplars certificadi dera listra deth cens electorau correspondenta ara mèsa. Un s’a d’expausar ena entrada deth locau e er aute a de quedar a disposicion dera mèsa pr'amor qu'es sòns membres poguen verificar era inscripcion de cada votant en cens.
• Modèus oficiaus d’actes:
• acta de constitucion dera mèsa unica entà toti es procèssi electoraus
• acta d’escrutinh: ua entà cadua des eleccions qu'an lòc
• acta dera session: ua entà cadua des eleccions qu'an lòc.
• Listra numerotada de votants, a on s’an d’anotar es electors qu'emeten eth sòn vòt.
• Certificadi de votacion, entàs votants que en demanen.
• Talons des credencials des interventors qu'actuen ena mèsa.
• Talons des credencials des electors inscriti en cens dera mèsa qu'actuen coma interventors en ua auta mèsa.
• Tres engolòpes numerotades der 1 ath 3 e recebudi de liurament d’aguestes engolòpes. I aurà un jòc de tres engolòpes e de recebudi correspondenti entà cadua des eleccions qu'an lòc.

S'era mèsa non dispause de quauqu’un d’aguesti elements, eth president o presidenta a de comunicà'c immediatament ara junta electorau de zòna, pr'amor que en hèsque era remesa.

QUINES FACULTATS A ETH PRESIDENT O PRESIDENTA D’UA MESA ELECTORAU?

• Eth president o presidenta dera mèsa a, laguens eth locau electorau, era autoritat exclusiva entà garantir er orde public damb era finalitat d’assegurar era libertat des electors e eth compliment dera lei.
• Ad aguest efècte, eth president o presidenta dera mèsa electorau, pòt demanar era intervencion des fòrces e còssi de seguretat, destinadi a protegir es locaus electoraus.
• Es fòrces e còssi de seguretat an de dar ath president o presidenta, laguens e dehòra des locaus electoraus, era assisténcia que demane.

QUE EI UN APODERAT O APODERADA?

Ei era persona a qui eth representant de cada candidatura autrege podèrs pr'amor qu'age era representacion dera candidatura enes actes e operacions electoraus.
Es apoderadi pòden:

• accedir liurament a toti es locaus electoraus, examinar eth desvolopament dera votacion e der escrutinh en quinsevolh mèsa, formular reclamacions e protèstes e demanar certificacions
• se non i a interventors dera sua candidatura, pòden actuar coma tau ena mèsa, en tot participar enes deliberacions damb votz e sense vòt.

Es apoderadi an d’identificar-se en tot mostrar es sues credencials e eth sòn document d’identitat as membres dera mèsa. Vòten ena mèsa a on figuren inscriti en cens electorau.

QUE EI UN INTERVENTOR O INTERVENTORA?

Ei era persona designada peth representant d’ua candidatura entà poder:

• assistir ara mèsa e participar enes sues deliberacions, damb votz mès sense vòt
• formular reclamacions e protèstes e demanar certificacions dauant dera mèsa.

An foncions sonque ena mèsa ena quau son acreditadi e vòten ena mèsa en qué son acreditadi. Pòden auer-i dus interventors nomenadi per mèsa electorau.

COMA S’ACREDITEN ES INTERVENTORS?

Es interventors designadi pes disparières candidatures presenten ara mèsa es sues credencials emetudes pes juntes electoraus de zòna, es quaus s’an de confrontar damb es talons (còpies) que i a enter era documentacion dera mèsa.

QUE SE HE DAMB ES COPIES DES CREDENCIALS?

Es còpies des credencials (talons) s’an d’unir ar expedient electorau e, se non s’an recebut, s’an d’unir ar expedient es credencials aportades pes interventors.

ES INTERVENTORS E ES APODERADI PODEN PORTAR EMBLEMES O ADESIUS?

Òc, es interventors e es apoderadi pòden portar emblemes o adesius damb eth nòm e es sigles dera candidatura que representen, sonque damb era finalitat d’identificar-se coma interventors o apoderadi, sense qu'açò constituïsque propaganda electorau.

QUI SIGNE ERA ACTA DE CONSTITUCION DERA MESA?

An de signar era acta de constitucion dera mèsa eth president o presidenta dera mèsa, es dus vocaus e es interventors des candidatures.

QUI A DRET A UA COPIA DERA ACTA DE CONSTITUCION DERA MESA?

Eth president o presidenta dera mèsa a de liurar ua còpia dera acta de constitucion as representants de candidatures, as apoderadi o as interventors qu'ac demanen.

QUAN S’INICIE E QUAN S’ACABE ERA VOTACION?

Era votacion s’inície entàs 9.00 ores, eth president o presidenta ac anóncie damb es paraules “comence era votacion”, e contunhe sense interrupcion enquias 20.00 ores.

QUAN S’INTERROMP ERA VOTACION?

Eth president o presidenta dera mèsa a d’interrómper era votacion se se’n da compde dera abséncia de paperetes de quauqua candidatura e ac a de comunicar per telefòn ara junta electorau de zòna, era quau a de provedir immediatament ara mèsa de naues paperetes.

QUAN SE SUSPEN ERA VOTACION?

Era suspension dera votacion se produsís ben per ua interrupcion superiora a ua ora o ben per quinsevolh motiu que hèsque impossible er acte de votacion.
Suspenuda era votacion en ua mèsa, era junta electorau de zòna a de convocar naues eleccions, qu'an d'auer lòc laguens deth termini de 48 ores.

QUINA EI ERA MECANICA DERA VOTACION?

• Es electors an d’apropar-se ara mèsa un per un
• Cada elector o electritz a de díder eth sòn nòm e es sòns cognòms ath president o presidenta
• Es vocaus e es interventors an de verificar era identitat der elector o electritz, qu'a de presentar un document acreditatiu dera sua identitat e verificar que sigue inscrit ena listra deth cens electorau
• Er elector o electritz a de liurar dera sua pròpria man ath president o presidenta era engolòpa o es engolòpes de votacion barrades
• Eth president o presidenta, sense amagar era engolòpa o es engolòpes en cap de moment, a de díder eth nòm der elector o electritz en votz nauta e híger “vòte”, e a d’introdusir era engolòpa ena orna correspondenta
• Un membre dera mèsa a d’anotar ar elector o electritz ena listra numerotada de votants.

PODEN VOTAR ES PERSONES QUE SIGUEN EN LOCAU ELECTORAU ARA ORA DETH BARRAMENT DERA VOTACION?

Òc, se dempús d’anonciar-se eth finau dera votacion entàs 20 ores i a electors en locau electorau o en accès ath locau que non an votat encara, eth president o presidenta permeterà que vòten.

QUE SE HE DAMB ES ENGOLOPES DE VOT PER CORREU?

Un viatge a votat eth darrèr elector, eth president o presidenta introdusís ena orna es engolòpes que contien es paperetes de vòt per corrèu, en tot seguir es passi següents:

• verificar que cada engolòpa conten eth certificat d’inscripcion en cens
• verificar qu’er elector ei inscrit en cens dera mèsa
• introdusir ena orna era engolòpa de votacion
• anotar ar elector ena listra numerotada de votants.

QUAN VOTEN ES MEMBRES DERA MESA E ES INTERVENTORS?

Es membres des mèses e es interventors vòten dempús qu'age concludit era votacion e s’agen introdusit es vòts per corrèu ena orna.

S’A DE SIGNAR ERA LISTRA NUMEROTADA DE VOTANTS?

Òc; un còp finalizades es operacions anteriores, es membres dera mèsa e es interventors signen era listra numerotada de votants. Aguesta signatura aurà de hèr-se ara aurèra de cadua des huelhes e tanben immediatament dejós deth darrèr nòm escrit.

EN QUIN ORDE SE HE ER ESCRUTINH?

Er orde d’escrutinh en Catalonha ei eth següent:

• En prumèr lòc, er escrutinh correspondent as eleccions municipaus
• En dusau lòc, er escrutinh correspondent as eleccions ath Conselh Generau d’Aran.

QUINES DONADES REBAT ERA ACTA D’ESCRUTINH?

Era acta d’escrutinh se liure damb es donades següentes:

• numerò d’electors censadi
• numerò de certificats censaus aportadi, en tot hèr distincion enter es de nauta e es de correccion d’errances
• numerò de votants
• numerò de paperetes nulles
• numerò de vòts en blanc
• numerò de vòts obtengudi per cada candidatura

QUI SIGNE ERA ACTA D’ESCRUTINH?

Era acta d’escrutinh a d’èster signada peth president o presidenta dera mèsa, es dus vocaus e es interventors des candidatures.

QUE SE HE DAMB ES COPIES DERA ACTA D’ESCRUTINH?

Ua còpia dera acta d’escrutinh s’a de collocar ena entrada deth collègi electorau e, ath delà, se n’a de liurar:

• ua còpia per candidatura as representants, interventors, apoderadi o candidats qu'ac solliciten
• ua còpia ath representant dera Administracion

QUINES DONADES INCLUDÍS ERA ACTA DERA SESSION?

Ena acta dera session cau indicar detalhadament:

• numerò d’electors censadi
• numerò de certificadi censaus aportadi, en tot hèr distincion enter es de nauta e es de correccion d’errances
• numerò d’electors dera mèsa qu'an votat
• numerò d’interventors non censadi ena mèsa qu'an votat
• numerò de paperetes nulles
• numerò de vòts en blanc
• numerò de vòts obtengudi per cada candidatura

Ath delà, en aguesta acta s’an de hèr constar es reclamacions, es incidents e es protèstes que s’an formulat, atau coma era resolucion o es resolucions adoptades pera mèsa electorau.

QUI SIGNE ERA ACTA DERA SESSION?

Era acta dera session l’a de signar eth president o presidenta dera mèsa, es dus vocaus e es interventors des candidatures.

QUE A D’INCLUDIR ERA ENGOLOPA NUM.1? A ON VA ADREÇADA?

En aguesta engolòpa cau includir er expedient electorau, compausat per:

• originau dera acta de constitucion dera mèsa (aguesta s’includís ena engolòpa correspondenta as eleccions municipaus)
• originau dera acta dera session
• toti es documents a qué hè referéncia era acta dera session e, en particular, era listra numerotada de votants e es paperetes as quaus s’a negat era validitat o qu'an estat objècte de quauqua reclamacion
• era listra deth cens electorau utilizada (aguesta s’includís ena engolòpa correspondenta as eleccions municipaus)
• es certificadi censaus aportadi (aguesta s’includís ena engolòpa correspondenta as eleccions municipaus)
• talons (còpies) des credencials des interventors qu'an actuat damb aguesta condicion ena mèsa (aguesti s’includissen ena engolòpa correspondenta as eleccions municipaus)

Eth president o presidenta dera mèsa a de liurar aguesta engolòpa ara sedença deth jutjat de prumèra instància o de patz. Eth jutge de prumèra instància o de patz a de portar-les ara junta electorau qu'age de hèr er escrutinh generau.

QUE A D’INCLUDIR ERA ENGOLOPA NUM. 2? A ON VA ADREÇADA?

Aguesta engolòpa conten es documents següenti:

• ua còpia dera acta de constitucion dera mèsa
• ua còpia dera acta dera session

Eth president o presidenta dera mèsa a de liurar aguesta engolòpa ara sedença deth jutjat de prumèra instància o de patz. Aguestes engolòpes an de demorar archivades en jutjat.

QUE A D’INCLUDIR ERA ENGOLOPA NUM. 3? A ON VA ADREÇADA?

Aguesta engolòpa conten es documents següenti:

• ua còpia dera acta de constitucion dera mèsa
• ua còpia dera acta dera session

Un des vocaus hè liurament d’aguesta engolòpa ath foncionari de Corrèus, que lo harà arribar ara junta electorau competenta entà hèr er escrutinh generau.

QUI POT ENTRAR ENES LOCAUS ELECTORAUS?

Sonque an dret a entrar en collègi electorau, ath delà des electors:

• es representants des candidatures
• es candidats
• es apoderadi e es interventors
• es notaris
• es agents dera autoritat requeridi peth president o presidenta
• les jutges d’instruccion e es sòns delegadi
• es representants dera Administracion
• es persones qu'an de prestar assisténcia as electors, s'ac an de besonh

Es accèssi ath locau an de demorar complètament liures e accessibles entàs persones qu'an dret a entrar-i.

GUAIRE GENT POT VOTAR EN UA MESA ELECTORAU?

En ua mèsa electorau pòden votar un minim de 500 electors e un maxim de 2.000.
En cap de cas eth numerò d’electors adscriti a ua mèsa electorau pòt èster inferiora a 200.