Era votacion presenciau

COM POGUI SABER EN QUINA MESA ME CORRESPON VOTAR?

Eth Burèu deth Cens Electorau envie a toti es electors ua carta censau a on figure era seccion ena quau ei censat cada elector o electritz e era mèsa a on li correspon votar, damb era adreça deth collègi electorau.
Tanben podetz consultar en vòste ajuntament o dirèctament enes delegacions provinciaus deth Burèu deth Cens Electorau (a trauèrs deth servici d’atencion telefonica 901.101.900) quina ei era mèsa que correspon ath vòste domicili e a on se trape.
Fin finau, tanben ac podetz endonviar a trauèrs d’Internet, en tot introdusir eth domicili a on ètz censadi e era iniciau deth vòste cognòm (https://censoelectoral.ine.es/censo/ce_mesas.indice).

COMA M’IDENTIFIQUI DAUANT DERA MESA?

Vos podetz identificar mejançant eth DNI, eth passapòrt o eth permís de condusir a on apareishe era fotografia deth titular.
En cas d’estrangèrs (comunitaris o norvègis) era identificacion se hè mejançant era carta d’estrangèr.
Non impòrte qu'aguesti documents siguen caducadi, mès an d'èster es originaus, non son valides es fotocòpies.

POGUI VOTAR DAMB ETH CARNET D’UN CLUB ESPORTIU O D’UN AUTE CLUB O UA AUTA ASSOCIACION EN QUÉ FIGURE ERA FOTOGRAFIA DETH TITULAR?

Non, pr'amor qu'era lei non permet qu'un aute document damb fotografia deth titular pogue remplaçar eth DNI, eth passapòrt, eth permís de condusir o era carta d’estrangèr, documents oficiaus acreditatius dera identitat der elector o electritz. Er incompliment d’aguesta norma per part des membres des mèses pòt comportar era imposicion d’ua pena d’arrèst major e ua multa.

POT UA PERSONA VOTAR PER UA AUTA?

Non, en cap cas e jos cap concèpte. Eth vòt ei personau e non se pòt exercir per delegacion. S'ua persona ei empedida o a dificultats entà votar, pòt hè'c per corrèu o hèr-se ajudar per quauquarrés en qui age confidança entà premanir eth vòt e acompanhar-la a votar.

COM VOTEN ES ANDICAPADI E/O ES PERSONES DAMB INVALIDITATS?

Era legislacion exigís qu'es locaus electoraus siguen accessibles as persones damb limitacions de mobilitat.
Ath delà, es persones malautes o damb incapacitat qu'empedisque eth vòt en persona, pòden hè'c per corrèu.

COM VOTEN ES PERSONES CEGUES O INVIDENTES?

Era legislacion prevé, entàs electors invidents, eth sistèma de votacion assistida en establir qu'es electors que per defècte fisic siguen empedidi entà escuélher papereta o collocar-la laguens dera engolòpa, pòden ajudar-se d’ua persona en qui agen confidança entà hèr aguestes operacions.

S'ETH DIA 27 DE MAI EI ENTA JO LABORABLE, E DRET A ABSENTAR-ME DETH TRABALH ENTÀ PODER ANAR A VOTAR?

Òc; eth Govèrn centrau entàs eleccions municipaus e era Generalitat de Catalonha entàs eleccions ath Conselh Generau d’Aran dictaràn era normativa que sigue procedenta pr'amor qu'es electors que realizen servicis eth dia des eleccions poguen dispausar, laguens der orari laborau, d'enquia quate ores entar exercici deth dret de sufragi, es quaus seràn retribuïdes. Quan eth trabalh sigue en jornada redusida, s’efectuarà era correspondenta reduccion proporcionau deth permís.

E DRET A UA REDUCCION DERA JORNADA QUAN ERA MIA JORNADA LABORAU COMENCE EN TORN DE NET DETH 26 DE MAI E FINALIZE ENTAS 8.30 ORES DETH 27 DE MAI?

Non, pr’amor qu'es trabalhadors qu'agen jornada laborau damb un orari que non coïncidisque ne totaument ne parciaument damb eth dera votacion non an dret a demanar cap de permís ara empresa.

QUE CAU HER QUAN NON I A PAPERETES D’UA CANDIDATURA ENA MESA?

Enes mèses electoraus non pòden mancar-i paperetes de cap des candidatures que se presenten as eleccions. Se manquèssen paperetes de quauqua candidatura, avertitz ath president o presidenta dera mèsa, qu'a era obligacion d’interrómper era votacion enquia que se corregisque aguesta anomalia.

QUE CAU HER SE QUAUQUA PERSONA O GROP COACCIONE O INTIMIDE AS VOTANTS?

S’a de comunicar aguest hèt ath president o presidenta dera mèsa, qu'a era obligacion de velhar entà qu'arren atempte contra era libertat de vòt des electors en collègi electorau e enes sues immediacions e pòt ordenar as fòrces de seguretat qu'actuen entà evità'c.

QUE S’A DE HER SE QUAUQUARRES HE PROPAGANDA ELECTORAU ENES PROXIMITATS DETH COLLÈGI ELECTORAU?

S’a de comunicar aguest hèt ath president o presidenta dera mèsa. Tot acte de propaganda electorau ei proïbit pendent era jornada electorau e eth president o presidenta de cada mèsa a de velhar entà evitar que se hèsque propaganda electorau en collègi electorau, enes sòns accèssi e enes sues immediacions.

QUE S’A DE HER QUAN S'AN DOBTES SUS ERA IDENTITAT D’UN VOTANT?

En cas qu'es membres dera mèsa, un interventor, un apoderat o quinsevolh aute elector o electritz que sigue present age dobtes fondamentadi sus era identitat d’un votant, era mèsa a de decidir per majoria se l’accèpte o non, en vista des documents d’identificacion que presente e des testimònis des persones presentes.
Totes es circonstàncies, includidi es nòms des persones qu'agen prestat testimòni sus era identitat que se mete en dobte, s’an d’anotar ena acta dera session, entà que, posteriorament, se poguen exigir responsabilitats a qui age usurpat un nòm d’autrú o a qui age metut en dobte sense fondament era identitat d’un elector o electritz.

SE PODEN HER ENQUESTES PENDENT ERA JORNADA ELECTORAU?

Ei proïbida era publicacion e difusion de sondatges electoraus des des cinc dies abantes ara jornada electorau, mès non ei proïbit hèr entrevistes entà sondatges electoraus en cap moment, ne eth madeish dia des eleccions.

QUE CAU HER SE S’OBSERVE QUAUQUA IRREGULARITAT PENDENT ERA VOTACION?

Quinsevolh elector o electritz qu'obsèrve quauqua irregularitat pendent era votacion pòt manifestar-la ara mèsa, e era sua protèsta o reclamacion s’a de hèr constar ena acta dera session.