Era votacion per correu

QUIN EI ETH TERMINI ENTA SOLLICITAR ETH VOT PER CORREU?

Deth dia 3 d’abriu ath 17 de mai, andús includidi.

QUINI SON ES TRAMITS ENTA SOLLICITAR ETH VOT PER CORREU?

Vos auetz d’adreçar personalament a quinsevolh burèu de Corrèus e, en tot presentar er originau deth DNI, hèr ua sollicitud de certificat d’inscripcion en cens electorau. Sonque en cas de malautia o incapacitat, acreditades mejançant certificat medicau, pòt ua persona disparièra ara interessada sollicitar aguest certificat, e entad açò a d'èster autorizada per miei d’un document notarial o consular estenut individualament.

A COMPDAR DE QUIN DIA SE REMET ATH DOMICILI ERA DOCUMENTACION QUAN S’A SOLLICITAT ETH VOT PER CORREU?

A compdar deth dia 7 de mai enquiath 20 de mai era delegacion provinciau deth Burèu deth Cens Electorau correspondent remanarà per corrèu certificat en domicili que ajatz soslinhat eth certificat censau amassa damb es paperetes, era engolòpa de votacion e ua engolòpa adreçada ath president o presidenta dera mèsa ena quau vos correspon votar, ath delà d’ua huelha explicativa deth procediment que s’a de seguir.

POT UA AUTA PERSONA RECUELHER AGUESTA DOCUMENTACION EN NOM MEN?

Non; en recéber era documentacion s’a de signar un avís de recepcion qu'a de signar personalament era persona interessada, damb era acreditacion prealabla dera sua identitat. En cas que non sigue en sòn domicili, se li comunicarà qu'a de presentar-se personalament o a trauèrs dera representacion autorizada notarialament o consularment en Burèu de corrèus correspondent entà, damb era acreditacion prealabla, recéber era documentacion entath vòt per corrèu.

QUIN TERMINI E ENTA REMANAR ETH VOT PER CORREU ARA MESA?

Un còp escuelhuda era papereta de vòt e introdusida ena engolòpa de votacion, l’as de barrar e introdusir, amassa damb eth certificat d’inscripcion en cens, ena engolòpa adreçada ath president o presidenta dera mèsa, eth quau as de reméter per corrèu certificat abantes deth dia 23 de mai includit.

EI DE BESONH LIURAR PERSONALAMENT ERA ENGOLOPA DE VOTACION?

Non, non ei de besonh que se liure personalament era engolòpa ath Burèu de Corrèus. Quinsevolh auta persona pòt hèr aguest tramit.

E DRET A UN PERMIS ENTA DEMANAR ETH VOT PER CORREU?

Òc; eth Govèrn centrau entàs eleccions municipaus e era Generalitat de Catalonha entàs eleccions ath Conselh Generau d’Aran dictaràn era normativa que sigue procedenta entà qu'es persones que volguen sollicitar eth vòt per corrèu dispausen d’un permís, d'enquia quate ores liures, entà poder-lo sollicitar.

E SOLLICITAT ETH VOT PER CORREU E NON E RECEBUT ERA DOCUMENTACION. POGUI ANAR A VOTAR PERSONALAMENT ARA MESA?

Non; un viatge s’a sollicitat eth vòt per corrèu, ja non se pòt votar personalament ena mèsa electorau.

QUE HE CORREUS DAMB TOTA ERA DOCUMENTACION ELECTORAU RECEBUDA?

Eth servici de Corrèus consèrve enquiath dia des votacions tota era correspondéncia adreçada as mèses electoraus e la trasladarà as mèses entàs 9 deth maitin deth dia des votacions. Atau madeish, seguirà dant traslat ara correspondéncia recebuda eth dia des eleccions enquias 20 ores. Es engolòpes recebudes dempús des 20 ores deth dia fixat entara votacion se remeteràn ara junta electorau de zòna.