Es auti vots especiaus: persones malautes, andicapats, personau embarcat e interns de centres penitenciaris

COM VOTEN ES MALAUTS E PERSONES ANDICAPADES?

En cas de malautia o invaliditat qu'empedisque ar elector o electritz desplaçar-se personalament a un burèu de Corrèus e demanar era sollicitud de vòt per corrèu, s’a d’actuar dera manèra següenta:

• Era sollicitud d’inscripcion en cens pòt efectuar-se en nòm der elector/tritz per ua auta persona, autorizada notarialament o consularament, mejançant un document que se liurarà individualament entà cada elector/tritz; non s’i pòden includir disparièrs electors, ne ua persona pòt representar a mès d’un elector/tritz.
• Eth desplaçament des notaris ath domicili des electors malauti o andicapadi entà qu'aguesti autregen eth podèr notarial ei gratuït entar elector/tritz.
• Eth termini entà demanar eth vòt per corrèu ei deth 3 d’abriu ath 17 de mai.
• Eth termini entara remission dera engolòpa damb eth vòt ei deth 7 de mai ath 23 de mai.

COM VOTE ETH PERSONAU EMBARCAT?

Eth personau des vaishèths dera Armada, marina mercanta o flòta pesquièra abandieradi en Espanha qu'age de demorar embarcat des dera convocatòria des eleccions enquiara sua celebracion e que pendent aguest periòde entre en pòrts, prealablament coneishudi, en territòri nacionau, poderà exercir eth sòn dret a sufragi electorau dera manèra següenta:

• A trauèrs deth servici de radiotelegrafia, se poderà sollicitar enter eth 3 d’abriu e eth 17 de mai ena delegacion provinciau deth Burèu deth Cens Electorau a on era persona interessada sigue inscrita eth certificat d’inscripcion en cens.
• Es servicis de radiotelegrafia des vaishèths auràn era consideracion de dependéncies delegades deth servici de Corrèus e es comandants e capitans o er oficiau en qui exprèssament delèguen, era de foncionaris encargadi dera recepcion dera sollicitud.
• Era delegacion provinciau deth Burèu deth Cens Electorau correspondent, un còp verificada era inscripcion dera persona interessada, remeterà era documentacion apertienta ath pòrt o, se s’escatz, ar armador, consignatari o vaishèth qu’er elector/tritz auesse designat enter eth 7 de mai e eth 20 de mai.
• Un còp recebuda era documentacion, er elector/tritz procedirà a reméter per corrèu certificat e urgent, des de quinsevolh des pòrts en qué eth vaishèth atraque, era documentacion electorau correspondenta, ara mèsa a on li correspon votar, abantes deth 23 de mai.

COM VOTE ETH PERSONAU EN MISSIONS INTERNACIONAUS?

Entar exercici deth dret de vòt per corrèu deth personau embarcat en vaishèth dera Armada o que, en tot pertànher a unitats militares, se trape destacat dehòra deth territòri nacionau, en situacions excepcionaus, restacades damb era defensa nacionau e que participe o coopère damb es fòrces des païsi aliadi e d’organizacions internacionaus, en missions d’assisténcia umanitària o mantenença dera patz internacionau, se seguirà eth procediment següent:

• Eth comandant deth vaishèth o eth cap d’unitat remeterà era relacion de personau que desire exercir eth sòn dret de sufragi ath director generau de personau deth Ministèri de Defensa, qui tramitarà es sollicituds deth certificat d’inscripcion en cens as correspondentes delegacions provinciaus deth Burèu deth Cens Electorau, a compdar dera data dera convocatòria e enquiath 17 de mai.
• Era delegacion provinciau deth Burèu deth Cens Electorau correspondent, un còp verificada era inscripcion dera persona interessada, remeterà era documentacion apertienta, enter eth 7 e 20 de mai, ara Direccion Generau de Personau deth Ministèri de Defensa, pr'amor que, peth procediment mès urgent possible, la hèsquen arribar ath destinatari.
• Er elector o electritz exercirà eth sòn dret de vòt, un viatge recebuda era documentacion. Des vòts emetudi se harà cargue eth comandant deth vaishèth o eth cap dera unitat, qui les custodiarà e en garantirà era seguretat, era integritat e eth secrèt, enquia que siguen recuelhudi per encargat de transportar-les tath territòri nacionau.
• Era Direccion Generau de Personau deth Ministèri de Defensa a de hèr arribar es vòts recebudi a Corrèus abantes deth 23 de mai, e Corrèus les remeterà damb caractèr urgent ara mèsa electorau correspondenta.

COM VOTEN ES INTERNS EN CENTRES PENITENCIARIS?

Es intèrns en centres penitenciaris que non siguen privadi deth dret de sufragi vòten per corrèu.
Eth procediment qu'an de seguir ei eth següent:

• Eth director de cada centre penitenciari, o era persona en qui delègue, a de sollicitar en Corrèus qu'un foncionari d’aguest servici se desplace en ua data determinada ath centre damb es impresi de sollicitud d’inscripcion de besonh qu'an de ramplir es intèrns que desiren exercir eth sòn dret (enter eth 3 d’abriu e eth 17 de mai).
• Se quauqu'un des intèrns non auesse eth DNI, n’i aurà pro damb eth document d’identitat intèrn qu'an toti es intèrns, tostemp que i apareishe era fotografia deth titular.
• Eth Burèu deth Cens Electorau a de reméter ath centre penitenciari engolòpes e paperetes sufisentes, qu'eth foncionari de Corrèus liurarà personalament ar elector/tritz (enter eth 7 e eth 20 de mai).
• Er elector/tritz a d’elegir era papereta correspondenta, introdusir-la ena engolòpa, e introdusir aguesta en ua auta engolòpa adreçada ara mèsa electorau que correspone (enter eth 7 de mai e eth 23 de mai).
• Eth foncionari de Corrèus harà arribar aguestes engolòpes as correspondentes mèses electoraus de votacion eth madeish dia des eleccions.