Era presentacion de candidatures

QUI POT PRESENTAR UA CANDIDATURA AS ELECCIONS MUNICIPAUS?

Pòden presentar candidatures as eleccions municipaus deth 27 de mai de 2007:

• Es partits politics o federacions de partits politics inscriti en registre de partits politics
• Es coalicions de partits o federacions que desiren concórrer damb listres conjuntes as eleccions e ac comuniquen ara junta electorau correspondenta enquiath dia 18 d’abriu.
• Es agropacions d’electors an de besonh un numerò de signatures des inscriti en cens electorau deth municipi, qu'an d’autentificar-se notarialament o peth secretari dera corporacion municipau correspondenta, determinat peth barèm següent :
  
  a) enes municipis de mens de 5.000 abitants, non mens der 1 per cent des inscriti, tostemp qu'eth numerò de signants sigue mès deth doble qu'eth de còssos a elegir.
  b) enes comprenudi enter 5.001 e 10.000 abitants, aumens 100 signatures.
  c) enes comprenudi enter 10.001 e 50.000 abitants, aumens 500 signatures.
  d) enes comprenudi enter 50.001 e 150.000 abitants, aumens 1.500 signatures.
  e) enes comprenudi enter 150.001 e 300.000 abitants, aumens 3.000 signatures.
  f) enes comprenudi enter 300.001 e 1.000.000 d’abitants, aumens 5.000 signatures
  g) enes auti casi, 5.000 signatures s

QUI POT PRESENTAR UA CANDIDATURA AS ELECCIONS ATH CONSELH GENERAU D’ARAN?

Entara eleccion des conselhèrs generaus pòden presentar candidatures es partits, es federacions o es coalicions legaument enregistrades, o es madeishi electors de cada terçon, avalizadi per un numerò non inferior ath 3% deth cens electorau deth madeish terçon.

QUE PASSE SE TAS ELECCIONS MUNICIPAUS NON SE PRESENTE CAP DE CANDIDATURA A UA CIRCONSCRIPCION?

En cas qu'en bèra circonscripcion non se presentèsse cap de candidatura, se procedirà en termini de sies mesi ara realizacion d’eleccions parciaus en aguesta circonscripcion.

QUINI SON ES TRAMITS ENTARA CONSTITUCION D’UN PARTIT POLITIC?

Entà constituïr-se coma partit politic, era formacion s’a d’inscríuer en Registre de Partits Politics que i a en Ministèri der Interior.
Era documentacion que cau presentar entà obtier era inscripcion ei era següenta:

• Acta notariala soscrita pes dirigents o promotors deth partit, damb exprèssa constància des sues donades personaus d’identificacion.
• Estatuts pes quaus s’a de regir eth partit.

Es partits politics aquerissen personalitat juridica pera inscripcion en Registre de Partits Politics qu'existís en Ministèri der Interior. Laguens des vint dies següenti ara presentacion dera documentacion complèta en Registre de Partits Politics, eth Ministèri der Interior procedirà a practicar era inscripcion deth partit e, exceptada enes casi de suspension d’aguest termini, passadi es vint dies s’entenerà produsida era inscripcion.

QUAN SE POT INICIAR ERA RECUELHUDA DE SIGNATURES ENTARA CONSTITUCION D’UA AGROPACION D’ELECTORS?

Era recuelhuda de signatures non se pòt iniciar abantes dera convocatòria electorau correspondenta.

ES AGROPACIONS D’ELECTORS S’AN DE CONSTITUÏR ENTA CADA PROCES ELECTORAU?

Òc. Es agropacions d’electors se constituïssen unicament e exclusivament entà cada procès electorau concrèt, rason pera quau s’a de hèr era recuelhuda des signatures de besonh entà presentar candidatures en cada procès electorau que se convòque.

QUI POT ESTER CANDIDAT AS ELECCIONS MUNICIPAUS?

Son elegibles es espanhòus majors d’edat que, en tot possedir era qualitat d’elector/tritz, non se trapen en cap cause d’inelegibilitat.
Ath delà, son elegibles as eleccions municipaus totes es persones residentes en Espanha que, sense auer nacionalitat espanhòla:

• Agen era condicion de ciutadan dera Union Europèa o ben siguen nacionaus de païsi que donguen as ciutadans espanhòus eth dret de sufragi passiu enes sues eleccions municipaus en tèrmes d’un tractat.
• Complisquen es requisits entà èster elegible segontes era normativa espanhòla.
• Non agen estat despossedidi deth dret de sufragi passiu en sòn estat d’origina.

QUI POT ESTER CANDIDAT AS ELECCIONS ATH CONSELH GENERAU D’ARAN?

Son elegibles es espanhòus majors d’edat que, en tot possedir era qualitat d’elector/tritz, non se trapen en cap motiu d’inelegibilitat.

QUIN EI ETH TERMINI ENTARA PRESENTACION DE CANDIDATURES? A ON S’AN DE PRESENTAR?

Enes eleccions municipaus era presentacion des candidatures se hè dauant dera junta electorau de zòna correspondenta, e entàs eleccions ath Conselh Generau d’Aran, dauant dera Junta Electorau Provinciau de Lhèida, enter es dies 18 e eth 23 d’abriu.

COMA S’AN DE PRESENTAR ES CANDIDATURES?

Es candidatures s’an de presentar per escrit; aguest escrit a d’exprimir clarament:

• era denominacion
• es sigles e eth simbèu deth partit, federacion, coalicion o agropacion d’electors
• eth nòm e es cognòms des candidats includidi

Amassa damb aguest escrit, s’a de presentar era declaracion d’acceptacion dera candidatura e es documents acreditatius dera condicion d’elegibilitat des candidats.
Es candidatures presentades per agropacions d’electors s’an d’acompanhar des documents acreditatius deth numerò de signatures legaument exigit entara sua participacion enes eleccions.
Ath delà, en cas de candidats de nacionalitat disparièra ara espanhòla, en moment dera presentacion des candidatures an d’aportar ua declaracion formau en qué cònste:

• era sua nacionalitat, atau coma eth domicili en Espanha
• que non se trape privat deth dret de sufragi passiu en estat membre d’origina
• se s’escatz, eth darrèr domicili en estat membre d’origina

POT PRESENTAR-SE UA PERSONA RECENSADA EN UN MUNICIPI ENTAS ELECCIONS DE COSSO D’UN AUTE MUNICIPI?

Òc, pòden èster candidats entath cargue de còsso es persones residentes en municipis disparièrs d’aqueth entath quau se presenten.

COM AN D'ESTER ES LISTRES?

Es listres an d’includir tanti candidats coma cargues a elegir e pòt auer-i coma maxim 10 suplents.

SE PODEN MODIFICAR ES CANDIDATURES UN VIATGE PRESENTADES?

Non. Es candidatures non se pòden modificar un còp presentades e passat eth termini previst entà esmendar irregularitats, a excepcion de decés, de renóncia deth titular o coma conseqüéncia deth tramit d’emendament. Es baishes que se produsisquen dempús dera proclamacion s’enteneràn cubèrtes pes candidats successius e, s'escatz, pes suplents.

SE POT RETIRAR UA CANDIDATURA?

Òc. Era retirada d’ua candidatura pòt efectuar-se mejançant un escrit en papèr comun en quinsevolh moment anterior ara celebracion des eleccions peth representant generau dauant dera Administracion electorau.

PODEN ES AGROPACIONS D’ELECTORS ASSOCIAR-SE ENTARA ASSIGNACION DES LOCS DES CONSELHS COMARCAUS?

Òc, es agropacions d’electors que se presenten as eleccions municipaus se pòden associar, ar efècte d’assignar es lòcs des conselhs comarcaus, mejançant ua comunicacion ara junta electorau de zòna prealabla ara data des eleccions.

QUI SON ES REPRESENTANTS GENERAUS E ES REPRESENTANTS DES CANDIDATURES E COM SE DESIGNEN?

Tota candidatura a d'auer ua persona que la represente dauant dera Administracion electorau:

• Es representants generaus actuen en nòm des partits, federacions e coalicions. Era sua designacion ei per escrit dauant dera Junta Electorau Centrau e era junta electorau provinciau correspondenta, abantes der 11 d’abriu, e a d’anar acompanhada dera acceptacion dera persona assignada.
• Es representants des candidatures son nomenadi pes representants generaus abantes deth dia 13 d’abriu dauant dera junta electorau provinciau correspondenta. N’i a d'auer un per cadua des circonscripcions electoraus a on era formacion politica presente candidatures. Es representants des candidatures s’an de personar dauant dera junta electorau de zòna correspondenta entà acceptar eth cargue abantes dera presentacion dera candidatura. Es notificacions, es escrits e es citacions adreçades pera Administracion electorau as candidats se remeten ath sòn domicili.

QUI SON ES ADMINISTRADORS ELECTORAUS E COM SE DESIGNEN?

Tota candidatura a d'auer un administrador electorau, responsable des ingrèssi, des despenes e dera sua comptabilitat. I a dus tipes d’administradors electoraus:

• Administradors generaus: es formacions que presenten candidatura ath delà d’ua circonscripcion an de nomenar-ne un. Er administrador generau respon de toti es ingrèssi e totes es despenes electoraus hètes pera formacion politica e pes sues candidatures, atau coma dera sua comptabilitat. Son designadi per escrit dauant dera Junta Electorau Centrau (JEC) pes sòns respectius representants generaus abantes deth 13 d’abriu. Er escrit de presentacion anarà amassa damb era acceptacion exprèssa dera persona designada.
• Administradors des candidatures: responsable des ingrèssi, despenes e comptabilitat des candidatures. Actuen jos era responsabilitat der administrador generau. Son designadi per escrit dauant dera junta electorau provinciau correspondenta pes sòns representants en acte de presentacion des candidatures, enter es dies 18 e 23 d’abriu, amassa damb era acceptacion exprèssa dera persona designada.

I A INCOMPATIBILITAT DAMB ETH CARGUE DE REPRESENTANT GENERAU, ETH DE REPRESENTANT D’UA CANDIDATURA, ETH D’ADMINISTRADOR GENERAU E ETH D’ADMINISTRADOR D’UA CANDIDATURA?

Administrador generau e administrador dera candidatura (administrador electorau):

• Pòt èster designat administrador electorau quinsevolh ciutadan, major d’edat, en plen emplec des sòns drets civils e politics.
• Se pòt acumular damb eth cargue de representant de candidatura o representant generau.
• Non pòden èster candidats.
• Es agropacions d’electors non cau que designen un administrador generau, mès òc qu'ac an de hèr es partits e es federacions o coalicions de partits que presenten candidatures en mès d’ua província.

Representant generau e de candidatura:

• Pòt acumular-se damb eth cargue administrador electorau.
• Ei legaument proïbit qu'era madeisha persona age era condicion de representant legau dauant deth registre de partits e representant generau dauant dera Administracion electorau dera madeisha entitat politica.
• Ei possible qu'eth representant dera candidatura sigue candidat.
• Eth representant generau pòt assumir era representacion des candidatures municipaus dera sua entitat politica.