Noticies

Governacion lamente qu'es invidents non agen garantida era confidencialitat de vòt ath Conselh Generau d’Aran

Eth conselhèr de Governacion e Administracions Publiques, Joan Puigcercós, lamente qu'era Junta Electorau Centrau age denegat era possibilitat de hèr ua pròva pilèr entà qu'es persones invidentes poguen exercir eth dret de vòt damb confidencialitat, un hèt que non se complís aué dia. Dempús d'amassar-se damb diuèrses organizacions d’invidents, coma era Associació Catalana per a la Integració dels Cecs (ACIC), eth conselhèr considère que s’aurie d’aplicar eth metòde suedés, que consistís a introdusir cada papereta electorau normau damb era engolòpa correspondenta laguens d’ua dusau engolòpa. En aguesta dusau engolòpa, e en sistèma braille, i aurie escrit eth nòm dera candidatura que conten. D’aguesta manèra, sonque era persona cèga saberie a quina candidatura da eth vòt e es membres dera mesa, en recompde, non traparien cap papereta disparièra deth rèste.

Eth Departament de Governacion demanèc ara Junta Electorau Centrau que permetesse hèr ua pròva pilèr damb aguest sistèma enes eleccions ath Conselh Generau d’Aran deth dia 27 de mai. Era Junta Electorau Centrau, mès, a refusat aguesta possibilitat.

Sistèma aplicat en Suècia, era Índia o Còsta Rica

En quinsevolh cas, eth conselhèr Puigcercós demore qu'eth sistèma de votacion entà persones invidentes se pogue aplicar damb normalitat en futur. En aguest sens, considère qu'es eleccions generaus serien ua ocasion idonèa entà amiar a tèrme ua prumèra experiéncia.

Eth titular deth Departament de Governacion assegure qu'eth sistèma non supause ua carga economica significativa e rebrembe que fòrça païsi ja l’apliquen. Eth sistèma s'emplegue damb normalitat en Suècia, Alemanha, era Índia o Còsta Rica, enter d’autes.