Partits politics

Pòden presentar candidatures as eleccions entath Conselh Generau d’Aran es partits o federacions de partits, es coalicions e es agropacions d’electors. Aguestes candidatures s’an de presentar ath dauant dera Junta Electorau Provinciau de Lhèida enter eth 18 d’abriu e eth 23 d’abriu.

Tota candidatura a d'auer ua persona que la represente ath dauant dera Administracion electorau: son es nomentadi representants generaus e representants des candidatures. Es representants generaus s’an de designar abantes der 11 d’abriu e es representants des candidatures abantes deth 13 d’abriu ath dauant dera Junta Electorau Provinciau de Lhèida.

Atau madeish, tota candidatura a d'auer un administrador electorau, responsable des ingrèssi, des despenes e dera comptabilitat. I a administradors generaus e administradors des candidatures. Es administradors generaus, en cas de formacions que presenten candidatures en mès d’ua circonscripcion, se designen ena Junta Electorau Provinciau de Lhèida abantes deth dia 13 d’abriu. Es administradors des candidatures se designen ena Junta Electorau Provinciau de Lhèida, en acte de presentacion des candidatures.

Eth representant de cada candidatura pòt nomentar un empoderat entà que hèsque ua foncion de contraròtle, especiaument enes actes de votacion e d’escrutinh. Er empoderat non forme part dera mèsa e a de votar ena mèsa en qué sigue censat, mès pòt visitar-ne quinsevolha. Aguesta designacion se pòt hèr ath dauant dera junta electorau provinciau o dera junta electorau de zòna, en quinsevolh moment anterior ara data des eleccions.

Ath delà, es representants des candidatures pòden nomentar, enquia tres dies abantes des eleccions, dus interventors per mèsa electorau. Es interventors formen part dera mèsa e exercissen eth sòn dret a vòt ena madeisha mèsa.

Es partits non pòden difóner propaganda electorau ne desvolopar actes de campanha electorau enter era data de convocatòria e eth començament dera campanha electorau. Era campanha electorau dure 15 dies, des des 00.00 ores deth dia 11 de mai enquias 24.00 ores deth dia 25 de mai.

Es ajuntaments reservaràn uns espacis entath plaçament gratuït de pannèus e locaus o lòcs publics entara realizacion gratuïta d’actes de campanha electorau. Es juntes electoraus de zòna distribuiràn aguesti emplaçaments e locaus enter es disparières formacions.

Es partits politics, des dera data de convocatòria des eleccions enquiath dia dera votacion, non pòden contractar publicitat electorau, ne publicitat politica enes televisions publiques, ne privades, ne en ambit locau. Pendent era campanha electorau es mieis de comunicacion de titolaritat publica an de concedir espacis gratuïts as grops politics, enes desconnexions ena Val d’Aran, en tot atier eth numerò totau de vòts obtiengudi per cada partit, federacion o coalicion enes eleccions ath Conselh Generau d’Aran 2003.

Era Administracion dera Generalitat subvencionarà es despenes ocasionades as formacions politiques damb motiu des eleccions ath Conselh Generau d’Aran cossent damb era norma establida. Eth Departament de Governacion e Administracions Publiques pòt concedir as formacions politiques avances de pagament des subvencions que les corresponen pes despenes electoraus originades. Aguest impòrt non pòt èster superior, en cap cas, ath 30% dera subvencion percebuda pera madeisha formacion politica enes eleccions ath Conselh Generau d’Aran de 2003. Era sollicitud d’aguesta avança de pagament s’a de presentar enter eth 24 e eth 26 d’abriu ena Junta Electorau Provinciau de Lhèida.