Damb caractèr generau, pòden votar totes es persones de nacionalitat espanhòla, majors d’edat eth dia dera votacion e recensades en Catalonha. Es ciutadans que complissen 18 ans eth dia des eleccions, pòden votar.
Entà poder votar, ei obligatòri èster inscrit en recensament electorau. Eth recensament electorau que s’utilize en aguestes eleccions ei eth barrat en data 1 de gèr de 2024.
Tanben pòden votar es persones damb nacionalitat espanhòla que residissen permanentament en estrangèr qu’an agut en Catalonha eth darrèr vesinatge administratiu e que son inscrites en recensament CERA.
Se pòden consultar es listes electoraus en vigor des manères següentes:
Per mejans informatics:
- Ena pagina web der INE, a compdar deth 19 de març, dia de publicacion dera convocacion. Se pòt hèr era consulta mejançant eth sistèma Cl@ve o en tot utilizar un certificat electronic.
De manèra presenciau:
- Enes ajuntaments: deth 25 de març ar 1 d’abriu expausen es listes electoraus en vigor deth vòste municipi.
- Ena delegacion provinciau deth Burèu deth Recensament Electorau corresponent, que dispause deth recensament actualizat pr’amor que se pogue consultar permanentament. Cau demanar se s’ei includit en recensament des eleccions deth 12 de mai de 2024.
Per telefon:
- En tot telefonar ath 900 343 232.
Ath delà, eth Burèu deth Recensament Electorau mane a cada elector o electora ua carta censau que conten es donades actualizades dera inscripcion en recensament electorau e dera seccion e era mesa a on correspon votar.
Era carta censau a un caractèr sonque informatiu e non servís tà identificar-se ara ora de votar.
Pendent eth periòde d’expausicion des listes electoraus, deth 25 de març ar 1 d’abriu, quinsevolha persona, en cas de non figurar en recensament electorau maugrat auer-ne dret o es donades electoraus non siguen corrèctes, pòt presentar ua reclamacion:
- Deuant dera delegacion provinciau deth Burèu deth Recensament Electorau corresponent: en aguest cas ei de besonh mostrar eth DNI, eth passapòrt o eth permís de condusir, aportar-ne ua fotocòpia e presentar un certificat de recensament.
- Deuant der ajuntament deth municipi de residéncia: en aguest cas, ei de besonh mostrar eth DNI, eth passapòrt o eth permís de condusir e aportar-ne ua fotocòpia.
En tres dies, es delegacions provinciaus deth Burèu deth Recensament Electorau resolveràn es reclamacions e ordenaràn es rectificacions apertientes, que s’auràn d’expausar enes ajuntaments respectius eth 5 d’abriu. Ath delà, tanben notificaràn era resolucion adoptada a cadun des reclamants.
Finalizat eth tèrme de rectificacions e reclamacions:
Un viatge finalizat eth tèrme de rectificacions e reclamacions e enquiath madeish dia dera votacion abans dera ora deth barrament des collègis, en cas de non figurar enes listes electoraus liurades as meses electoraus, e solament pes causes especificament avalorades, se poderà sollicitar un certificat censau especific:
- Ena delegacion provinciau deth Burèu deth Recensament Electorau: ei de besonh mostrar eth DNI, eth passapòrt o eth permís de condusir, aportar-ne ua fotocòpia e presentar un certificat d’empadronament.
- En ajuntament respectiu, que manarà era peticion per fax ara delegacion provinciau deth Burèu deth Recensament Electorau, degudament autentificades peth secretari der ajuntament o persona en qui delegue.
Aguest certificat acredite eth dret a votar deuant dera mesa electorau respectiva.
Quinsevolh elector pòt sollicitar que se l’excludisque des listes deth recensament electorau pr’amor de non recéber propaganda postau des partits politics.
Es sollicitacions d’exclusion s’an de presentar enes ajuntaments, consolats e delegacions provinciaus deth recensament electorau. Tanben se pòden presentar ena sedença electronica der INE.
Eth Burèu deth Recensament Electorau comunicarà as electors era exclusion sollicitada. Es sollicitacions d’exclusion an caractèr permanent enquia qu’er elector se manifèste en sens contrari.
