Era Administracion electorau velhe pera transparéncia e era objectivitat deth procès electorau, atau coma peth compliment deth principi d’egalitat
Compòsen era Administracion electorau: es burèus electoraus e es conselhs electoraus (centrau, provinciau e de zòna).
- Un Conselh Electorau Centrau, de caractèr permanent.
- Quate conselhs electoraus provinciaus.
- Trenta un conselhs electoraus de zòna (plaçadi enes localitats catalanes que son cap de circonscripcion judiciària segons era delimitacion judiciària de 1979).
Es conselhs electoraus provinciaus son es conselhs competents entara realizacion de totes es gestions per arrepòrt ara presentacion e era proclamacion de candidatures, e per arrepòrt ar escrutinh generau enes eleccions tath Parlament de Catalonha.
Es conselhs electoraus provinciaus e de zòna non son permanenti, se constituïssen en ocasion de cada procès electorau.
Se vos cau hèr ua consulta, podetz adreçar-vos ath conselh electorau de zòna corresponent ath vòste municipi.
Es seccions electoraus son es zònes en qué se dividissen es circonscripcions electoraus.
Se determinen peth nombre d'electors: cada seccion includís un maximau de 2.000 electors e un minim de 500.
Maugrat açò, per cada municipi i a, aumens, ua seccion electorau, en tot tier en compde que cap seccion non pòt auer un encastre superior ath deth tèrme municipau.
Eth burèu electorau ei er organisme deuant deth quau se vòte. Eth burèu contròtle eth desvolopament dera votacion e amie a tèrme er escrutinh provisòri.
Un burèu de vòte ei format per tres ciutadans: un president/a e dus membres.
Eth burèu hè partida dera Administracion electorau, amassa damb es conselhs electoraus.
