Informacions entara presentacion de candidatures

Entà èster candidato candidata cau auer era condicion politica de catalan e non trobar-se sosmetut a cap de causa d’inelegibilitat.

An era condicion politica de catalans es ciutadans espanhòls qu’an eth vesiatge administratiu en Catalonha, ei a díder, es persones de nacionalitat espanhòla majors d'edat e empadronades en un municipi de Catalonha o residentes en estrangèr qu’agen agut eth darrèr domicili en un municipi de Catalonha.

Pòden presentar candidats o listes de candidats:

  • Es partits e federacions inscrits en Registre de partits politics deth Ministèri der Interior.
  • Es coalicions constituïdes qu’ac agen comunicat ara junta electorau provinciau corresponenta deth 23 de deseme de 2020 ath 1 de gèr de 2021.
  • Es agropacions d’electors que reünissen es signatures d’aumens er 1% des inscrits en cens electorau dera circonscripcion a on se presenten. Era remassada de signatures s’a d’iniciar un còp convocades es eleccions.

Es partits, federacions o coalicions que non agen obtengut representacion en Parlament ena convocatòria d’eleccions anteriora an de besonh era signatura, aumens, deth 0,1% des electors inscrits en cens electorau dera circonscripcion entara quau pretenguen era sua eleccion. Cap d’elector pòt prestar era sua signatura a mès d’ua candidatura.

Eth tèrme de presentacion des candidatures ei deth 6 ath 11 de gèr de 2021.

Es candidatures, soscrites pes representants des partits, federacions e coalicions e pes promotors des agropacions d’electors, s’an de presentar deuant dera junta electorau provinciau dera circonscripcion que correspongue.

Es candidatures s’an de presentar per escrit e an d’expressar clarament era denominacion, es sigles e eth simbèu deth partit, federacion, coalicion o agropacion d’electors, e eth nòm e es cognòms des candidats includits.

Amassa damb aguest escrit, cau presentar era declaracion d’acceptacion dera candidatura e es documents acreditatius dera condicion d’elegibilitat des candidats.

Es candidatures presentades per agropacions d’electors s’an d’acompanhar tanben damb es documents acreditatius deth nombre de signatures legaument exigit entà poder participar enes eleccions.