Modalitats de vòt

MESURES DE PREVENCION

• Se recomane de portar eth vòt premanit de casa damb er objectiu de minimizar eth temps d’estada laguens deth locau electorau, atau com entà evitar de tocar quinsevolh tipe de materiau.
• Era taula dam es paperetes e envolòpes se plaçarà apròp der accès ar espaci interior, a on i aurà eth punt d’igiene de mans damb eth gèl idroalcoolic, pr’amor de garantir era neteja de mans tot just abans deth moment de recuélher es paperetes e es envolòpes de votacion. En cas qu’açò non siguesse possible, es dus punts nomentadi, accès ar espaci interior e taula damb paperetes e envolòpes, auràn de dispausar de gèl idroalcoolic.
• Es electors mostraràn as membres dera mesa eth sòn document oficiau d’identificacion de manèra qu’es membres dera mesa non agen de tocar-lo. Tanben se poderà dispausar de plates entà plaçar-i eth document.
• Es votants non se retiraràn pas era mascareta, a excepcion qu’era mesa les ac requerisque de faiçon puntuau entà facilitar-ne era identificacion.
• Un còp identificadi, es electors acalaràn eth vòt laguens dera urna e gesseràn dera sedença.

FRANGES DE VÒT RECOMANAT

• Se recomane ara ciutadania anar a votar segons ua distribucion de franges d’acòrd damb era situacion sanitària personau. Eth seguiment d’aguestes indicacions non ei obligatòri e s’apelarà ath sens comun, era bona volontat e era responsabilitat de cada persona en benefici dera seguretat sanitària.
• Era distribucion des votants per franges ei era següenta:
  • Es collectius de risc votaràn preferentament pendent es 3 prumères ores dera jornada electorau, ei a díder, des 9.00 h as 12.00 h
  • Es votants non apertenenti as collectius de risc o en quarantena votaràn preferentament ena franja des 12.00 h as 19.00 h
  • Es collectius de persones en quarantena —contagiats, contactes propèrs e suspèctes— votaràn pendent era darrèra ora dera jornada electorau, ei a díder, des 19.00 h as 20.00 h. Pendent era darrèra ora de votacion es membres dera mesa utilizaràn materiau d'emparament individuau (en catalan, EPI) integrau de nauta seguretat. Se les auràn de méter entre es 18.40 h e 19.00 h per torns, de manèra que demoren tostemp dus membres en custòdia dera urna e entà seguir damb eth procès electorau.
• Es persones contagiades, contactes propèrs e suspèctes auràn de portar un certificat de desplaçament pera crisi sanitària pera COVID-19 o document equivalent en vigor damb era fin unica de trincar eth confinament obligatòri entà exercir eth sòn dret a vòt. Era autoritat competenta les ac poderà demanar.

• Se recomanarà er usatge deth procediment de vòt per corrèu.
• Era sollicitud de vòt per corrèu se pòt hèr per via telematica, damb certificat electronic reconeishut (DNIe, idCat, eca.), a trauès deth web Correos.es.
• En cas de desplaçar-se ara oficina de Corrèus entà tramitar era sollicitud de vòt de manèra presenciau, s'a abilitat era opcion de demanar cita prèvia des deth web e app de Corrèus o per telefon.

• Damb motiu dera COVID-19, s'a abilitat era possibilitat d'enviament ath domicili dera documentacion de vòt accessible.
• Quan era persona sollicitant truque ath telefon gratuït, pòt demanar recéber era documentacion de vòt accessible en sòn domicili.
• Entà receber-la en domicili cau demanà'c de manèra expressa, en cas contrari se receberà ena mesa electorau que correspone.