Contacte
Eth cens electorau ei un document que conten era inscripcion des qui complissen es requisits entà votar e non son privadi deth dret de sufragi. Es ciutadans que complissen 18 ans eth dia des eleccions, pòden votar.
Eth Burèu deth Cens Electorau, comprenut en der Institut Nacionau d’Estadistica (INE), ei er organ encargat dera formacion deth cens electorau, damb era collaboracion des ajuntaments e des consulats.
Eth cens que s’emplegue en cada procès electorau ei eth barrat eth prumèr dia deth dusau mes anterior ara convocacion des eleccions. Entàs eleccions en Parlament de Catalonha correspon eth cens barrat er 1 d'octobre de 2020.
Se pòden consultar es listes electoraus en vigor des següentes manères:
Per mejans informatics:
- Ena pagina web der INE. Ei de besonh era utilizacion d’un certificat digitau o o mejançant eth sistèma Cl@ve.
De manèra presenciau:
- Enes ajuntaments: deth dia 28 de deseme ath 4 de gèr exposen es listes electoraus en vigor des sòns municipis.
- Ena delegacion provinciau deth Burèu deth Cens Electorau corresponent, que dispòse deth cens actualizat entara sua consulta permanenta.
Per telefòn:
- En tot trucar ath 901 101 900.
Ath delà, eth Burèu deth Cens Electorau envie a cada elector ua carta censau que conten es dades actualizades dera inscripcion en cens electorau e dera seccion e era mesa a on correspon votar.
Era carta censau a un caractèr simplament informatiu e non servís entà identificar-se ara ora de votar.
Pendent eth periòde d’exposicion des listes electoraus, deth 28 de deseme ath 4 de gèr, tota persona, en cas de qu’es dades electoraus non siguen corrèctes, pòt presentar ua reclamacion:
- Ena delegacion provinciau deth Burèu deth Cens Electorau corresponent: en aguest cas ei de besonh mostrar eth DNI, eth passapòrt o eth carnet de condusir, aportar ua fotocòpia e aportar un certificat d’empadronament.
- En ajuntament deth municipi de residéncia: en aguest cas, ei de besonh mostrar eth DNI, eth passapòrt o eth carnet de condusir e aporta-ne ua fotocòpia.
En tres dies, es delegacions provinciaus deth Burèu deth Cens Electorau resolveràn es reclamacions e ordenaràn es rectificacions pertinentes, que calerà que siguen exposades enes ajuntaments e consolats respectius eth 8 de gèr.
Finalitzat eth termini de rectificacions e reclamacions:
Un còp finalizat eth termini de rectificacions e reclamacions e enquiath madeish dia dera votacion abans dera ora deth barrament des collègis, en cas de non constar enes listes electoraus liurades as meses electoraus, e sonque pes causes especificaments taxades, se poderà sollicitar un certificat censau especific:
- Ena delegacion provinciau deth Burèu deth Cens Electorau: ei de besonh mostrar eth DNI, eth passapòrt o eth permís de condusir, aportar-ne ua fotocòpia e aportar eth certificat d’empadronament.
- Er ajuntament respectiu enviarà era peticion per fax ara delegacion provinciau deth Burèu deth Cens Electorau, autentificada peth secretari der ajuntament o persona en qui delegue.
Aguest certificat acredite eth dret a votar deuant dera mesa electorau respectiva.
Tot elector o electora pòt sollicitar d’èster excludit des listes deth cens electorau damb era fin de non arrecéber propaganda postau des partits politics.
Es sollicituds s’an de presentar enes ajuntaments, consolats e delegacions provinciaus deth cens electorau. Tanben se pòden presentar ena sedença electronica der INE
Eth Burèu deth Cens Electorau comunicarà as electors era exclusion sollicitada. Es sollicituds d’exclusion an caractèr permanent enquia qu’er elector se manifèste en sens contrari.