Contacte
8.00 h: Constitucion dera mesa
- Amassada deth president/a, es vocaus e es suplents
- Comprovacion des elements de besonh entara votacion
- Admission des interventors des candidatures
8.30 h: Acta de constitucion
- Hèr era acta de constitucion dera mesa electorau
9.00 h: Votacion
- Dubertura deth collègi electorau e inici dera votacion
- Desvolopament dera votacion
20.00 h: Finau dera votacion
- Anonci deth finau dera votacion e barrament deth collègi electorau
- Vòts des electors presenti en locau
- Introduccion ena urna des envolòpes deth vòt per corrèru
- Vòt des membres dera mesa e es interventors
Escrutinh
- Escrutinh des vòts
- Hèr era acta der escrutinh
- Hèr era acta dera session
Era votacion s’inície as 9.00 ores e seguís sense interrupcion enquias 20.00 ores. Maugrat açò, se dempús de qu’eth president o presidenta anóncie era fin dera votacion tàs 20.00 ores i a electors en locau electorau o en accès ath locau que non an pas votat encara, eth president permeterà que vòten.
As electors les cau apropar-se tara mesa un per un, dempús d’auer passat, s’ac desiren, pera cabina electorau.
Cada elector a de díder eth sòn nòm e cognòms ath president o presidenta. Era identificacion der elector deuant dera mesa se hè per miei d’un des documents que seguissen:
- DNI: non servís eth resguard deth DNI en tramitacion, pr’amor que non i apareish era fotografia.
- Carnet de condusir (damb fotografia).
- Passapòrt (damb fotografia).
S’accèpte era presentacion d’aguesti documents encara que siguen caducadi, mès cau que siguen originaus. Non s’admeten fotocòpies.
As vocaus e as interventors les cau verificar qu’er elector figure ena lista deth cens entad aquera mesa de votacion. Er elector liure dera sua pròpria man ath president o presidenta era envolòpa o es envolòpes de votacion barrades. Eth president, sense amagar era envolòpa o es envolòpes en cap de moment, a de nomentar er elector en votz nauta, e, en tot ahíger «vòte», a de retornar era envolòpa o es envolòpes ar elector entà que l’introdusisque o les introdusisque ena urna o enes urnes corresponentes. Un membre dera mesa, e es interventors qu’ac desiren, a d’anotar eth nòm e cognòms der elector ena lista numerotada de persones votantes.
Es accèssi ath locau an de demorar entièraments liures e accessibles entàs persones qu’an dret d’entrar. Sonqu’an dret d’entrar en collègi electorau, ath delà des electors:
- es representants des candidatures
- es candidats
- es apoderadi e es interventors
- es notaris
- es agents dera autoritat requerida peth president o presidenta
- es membres des conselhs electoraus, es jutges d’instruccion e es sòns delegadi
- es representants dera Administracion
- es persones a qui les cau balhar assisténcia as electors s’ac an de besonh
Tot elector qu’obsèrve bèra irregularitat pendent era votacion la pòt manifestar ara mesa. Era sua protèsta o reclamacion s’a de hèr a constar ena acta dera session.
Era documentacion electorau se distribuís en tres envolòpes:
- Envolòpa nº 1: a d’includir era acta de constitucion dera mesa, era acta de session, era lista numerotada de votants, certificacions censaus aportades, talons de credenciaus des interventors, lista deth cens electorau e es paperetes nulles o objècte de reclamacion.
- Envolòpes nº 2 e 3: cadun a d’includir ua còpia dera acta de constitucion dera mesa e ua còpia dera acta de session.
Eth president o presidenta a de liurar es evolòpes 1 e 2 en Jutjat de Prumèra Instància o de Patz que correspongue ara circonscripcion dera sua mesa.
Coma minim un des vocaus s’a de demorar en locau electorau enquia qu’un trabalhador de Corrèus recuelhe era envolòpa numèro 3.