Jutges de pau

Es jutjats de patz, prumèr gradon dera estructura judiciau der Estat, son configuradi ena Lei organica deth poder judiciau coma òrgans servits per jutges sense formacion especifica, non professionaus, que hèn foncions jurisdiccionaus e que mentre exercissen eth cargue intègren eth poder judiciau e gaudissen d’inamovibilitat temporau.

Se tracte d’òrgans unipersonaus ubicadi enes municipis a on non i a jutjat de prumèra instància e instruccion. Assumissen competéncies de mens importància tant en orde civil com en penal.

Es jutges o jutgesses de patz son trigadi pera majoritat absoluta deth plen der ajuntament corresponent entre es persones que, complint es condicions legaus, atau ac solliciten.

Era sua actuacion en un procès electorau ei detalhada en article 101 dera Lei organica 5/1985, de 19 de junh, deth regim electorau generau.

1. Quan agen prèsta era documentacion corresponenta, eth/era president/a e es vocaus e interventors/es qu’ac desiren s’an de desplaçar immediatament entara sedença deth jutjat de prumèra instància o de patz laguens dera demarcacion a on pertanhe era mesa entà hèr-li liurament des envolòpes num. 1 e 2. Era fòrça publica a d’acompanhar e, se cau, facilitar eth desplaçament d’aguestes persones.

2. Damb era identificacion prèvia deth/dera president/a e, se cau, des vocaus e interventors, eth jutge o jutgessa recep era documentacion e emet eth recebut corresponent, en quau a de nomentar eth dia e era ora en qué se produsís eth liurament.
3. Laguens des dètz ores següentes ara recepcion dera darrèra documentacion, eth jutge o jutgessa s’a de desplaçar personaument tara sedença dera junta electorau qu’age de hèr er escrutin, a on a de hèr liurament, jos recebut detalhat, des envolòpes num. 1.
4. Es envolòpes num. 2 an de demorar archivades en jutjat de prumèra instància o de patz corresponent, e pòden èster reclamades pes juntes electoraus enes operacions d’escrutin generau e pes tribunaus competenti enes procèssi contenciosi electoraus.
5. Era junta electorau provinciau a d'adoptar es mesures de besonh entà facilitar eth desplaçament des jutges que se nomenten en paragraf tresau d’aguest article.