Vòt der estrangèr estant

Es persones que se tròben temporaument en estrangèr e es terminis no les permeten votar presenciaument o per corrèu dempús der Estat espanhòu o preferissen votar dempús der estrangèr ac les cau sollicitar prèviament.

Entà exercir eth dret de vòt, les cau èster inscrites en Registre de matricula consolar coma non residents. Aguesta inscripcion cau hèr-la presenciaument enes burèus o enes seccions consolars des ambaissades. Se pòt realizar en madeish moment que se sollicite eth vòt.

Sollicitud de vòt

Era documentacion entà sollicitar er exercici deth dret a vòt se pòt trobar:

• Enes burèus consolars o enes seccions consolars des ambaissades (estampat especific).
• En web parlament2021.cat i en web deth Ministèri d’Ahèrs Exteriors, Union Europèa e Cooperacion.

Aguesta documentacion, degudament ramplida, cau liurar-la personaument, en tot presentar eth DNI o passapòrt espanhòu, entre eth 22 de deseme e eth 16 de gèr (termini agranit enquiath 26 de gèr)enes burèus consolars o seccions consolars des ambaissades.

En madeish moment de tramitar era sollicitud de vòt, tanben se pòt tramitar era inscripcion en Registre de matricula consolar com a non resident.

Documentacion entà votar

Eth Burèu deth Cens Electorau envie per corrèu certificat e urgent era documentacion entà votar ara adreça que s’age indicat ena sollicitud. Non ei de besonh qu’era adreça sigue dera madeisha demarcacion consolar a on se hè era sollicitud, pòt èster d’ua demarcacion consolar diferenta.

Eth Burèu deth Cens Electorau li cau hèr er enviament, en tot cas, non mès tard deth dia 2 de hereuèr . Ad aguest termini cau ahíger eth temps que trigue eth corrèu a arribar ena abitança der elector o electriz en estrangèr.

Era documentacion enviada includís:

• Eth certificat d’inscripcion en cens.
• Es paperetes de totes es candidatures.
• Era envolòpa de votacion.
• Era envolòpa adreçada ath president o presidenta dera mesa electorau que correspone.
• Ua huelha explicativa.

Com se vòte

S’introdusís era papereta ena envolòpa de votacion e se barre. Se se vò votar eth blanc, cau barrar era envolòpa sense includir-i cap papereta.

De contunh, s’a d’introdusir ena envolòpa adreçada ath president o presidenta dera mesa electorau que correspon:

• Era envolòpa de votacion damb era papereta.
• Eth certificat d’inscripcion en cens.
• Er estampat formalizat entara devolucion des despenses d'afranquiment, se conven.

Eth termini entà enviar aguesta documentacion per corrèu certificat ara mesa electorau finalize eth 10 de hereuèr.
Per'mor qu’aguesti vòts siguen valids, cau que conste clarament ena envolòpa un sagèth de Còrreus o quina auta inscripcion que sigue oficiau d’un burèu de Corrèus der estat corresponent que certifique que er enviament s’a hèt laguens deth termini previst.

Es persones que residissen permanentament en estrangèr e cònsten en Cens de residents absenti en estrangèr (CERA) pòden votar enes eleccions ath Parlament de Catalonha deth 14 de hereuèr damb era sollicitud prealabla de vòt.

Sollicitud de vòt

Enquiath 16 de gèr (termini agranit enquiath 26 de gèr), es electors inscrits en Cens d’electors absenti en estrangèr (CERA) les cau formular era sollicitud de vòt qu'anarà adreçada ara delegacion provinciau corresponenta deth Burèu deth Cens Electorau.
Er enviament dera sollicitud se pòt hèr per internet, fax o corrèu postau:

PER INTERNET

cau accedir ath tramit “Sollicitud de vòt CERA” en web der Institut Nacional d’Estadistica (INE) mejançant: 

• Certificat electronic arreconeishut, associat ath DNI, o o eth sistèma Cl@ve.
• Clau de tramitacion telematica (CTT), que se tròbe enes instruccions qu'envie eth Burèu deth Cens Electorau (tanben se pòt consultar peth web ine.es). Cau seguir es instruccions e adjuntar era imatge d’un d’aguesti documents: 
  • DNI espanhòu.
  • Passapòrt expedit pes autoritats espanhòles.
  • Certificat de nacionalitat espanhòla (l’expedís gratuïtament era ambaissada o eth consolat a on se cònste inscrit).
  • Certificat d’inscripcion en Registre de matricula consolar (l’expedís gratuïtament era ambaissada o eth consolat a on se cònste inscrit).

PER FAX O CORRÈU POSTAU

Cau ramplir e signar eth estampat de sollicitud de vòt qu'envie eth Burèu deth Cens Electorau. Tanben se tròbe enes ambaissades o consolats, en web parlament2021.cat, en web deth Ministèri d’Ahèrs Exteriors, Union Europèa e Cooperacion e en web ine.es. Ei important que non desbrembatz signar-lo. Er estampat de sollicitud cau acompanhar-lo d’un des documents següents:

• Fotocòpia deth DNI espanhòu.
• Fotocòpia deth passapòrt expedit pes autoritats espanhòles.
• Certificat de nacionalitat espanhòla (l’expedís gratuïtament era ambaissada o eth consolat a on se cònste inscrit).
• Certificat d’inscripcion en Registre de matricula consolar (l’expedís gratuïtament era ambaissada o eth consolat a on se cònste inscrit).

Cau enviar aguesta documentacion ath mès lèu possible e, ath delà trigar, eth dia 26 de gèr, ara delegacion provinciau deth Burèu deth Cens Electorau dera província a on se cònste inscrit en Estat espanhòu.

Documentacion entà votar

Eth Burèu deth Cens Electorau envie per corrèu, non mès tard deth 2 de hereuèr  (ad aguest termini cau somar-i eth temps que trigue a arribar era documentacion ad adreça en estrangèr), era documentacion següenta: 

• Ua huelha informativa.
• Ua papereta de cadua des formacions politiques que se presenten as eleccions e ua envolòpa de votacion.
• Dus certificats d’inscripcion en cens electorau.
• Ua envolòpa que i figurarà era adreça dera junta electorau provinciau corresponent.
• Ua envolòpa damb era adreça dera ambaissada o consolat.
• Eth estampat de sollicitud de devolucion dera despenuda d’enviament deth vòt per corrèu.

Com se vòte

Un còp arrecebuda era documentacion, s’a d’introdusir era papereta dera candidatura escuelhuda ena envolòpa e barrar-la. En cas que volgatz votar en blanc, non cau méter cap papereta laguens dera envolòpa de votacion.
De contunh, cau introdusir ena envolòpa adreçada ara junta electorau provinciau:

• Era envolòpa de votacion damb era papereta escuelhuda.
• Un des exemplars deth certificat d’inscripcion en cens electorau.
• Ua fotocòpia deth passapòrt o deth DNI (o eth certificat de nacionalitat o eth certificat d’inscripcion en Registre de matricula consolar, expedidi peth consolat espanhòu en país de residéncia).

A partir d’ací, se pòt optar per:

• Votar en urna: se depause personalament era envolòpa adreçada ara junta electorau provinciau enes urnes abilitades ena ambaissada o consolat corresponent entre es dies 10 e 12 de hereuèr (ambdús includidi) (termini agranit enquiath 14 de hereuèr a les 8h horari península). Cau liurar eth dusau certificat d’inscripcion en cens ath personau consolar, e eth personau consolar a d’estampar ena envolòpa eth sagèth deth burèu consolar damb era data de depaus.
• Votar per corrèu certificat: introdusir era envolòpa barrada adreçada ara junta electorau provinciau ena envolòpa adreçada ath consolat. En aguesta envolòpa s’includirà, ath delà, eth dusau certificat d’inscripcion en cens e, se conven, eth estampat ramplit entara devolucion de despenuda d’enviament. Un còp barrada, s’a d’enviar ath burèu consolar o seccion consolar que correspone, per corrèu certificat, non mès tard deth 9 de hereuèr. Cau que i conste ena envolòpa un sagèth de Còrreus o ua auta inscripcion oficiau d’un burèu de Corrèus der estat corresponent que certifique que s’an complit es terminis.