Contacte
Es persones que se tròben temporaument en estrangèr e es terminis no les permeten votar presenciaument o per corrèu dempús der Estat espanhòu o preferissen votar dempús der estrangèr ac les cau sollicitar prèviament.
Entà exercir eth dret de vòt, cau èster inscrit en Registre de Matricula Consolar coma non resident. Aguesta inscripcion s’a de hèr presenciaument enes burèus o enes seccions consolares des ambaishades. Se pòt hèr en madeish moment que sollicite eth vòt.
· Directòri d'ambaissades e consolats
Important:
Es electors que se tròben inscriti en cens d’electors residents-absents que viuen en estrangèr (CERA) non pòden votar enes eleccions tath Conselh Generau d’Aran ne as eleccions municipaus ne as eleccions ara presidéncia des entitats municipaus descentralizades.
Sollicitud de vòt
Era documentacion entà sollicitar eth dret de vòt se pòt trobar:
- Enes burèus consolars o enes seccions consolares des ambaishades (imprès especific).
- En wèb exteriores.gob.es.
- En wèb elecciones.locales2023.es
Aguesta documentacion, degudaments ramplida, la cau liurar personauments, en tot presentar eth DNI o passapòrt espanhòu, entre eth 4 e eth 29 d’abriu, enes burèus consolars o seccions consulares des ambaishades.
Sonque s’a d’enviar ua sollicitud entà toti es procèssi electoraus que se celèbren eth 28 de mai: eleccions municipaus, eleccions tath Conselh Generau d’Aran e as eleccions ara presidéncia des entitats municipaus descentralizades.
En madeish moment de tramitar era sollicitud de vòt, tanben se pòt tramitar era inscripcion en Registre de matricula consolar coma non resident.
ARREBREMBATZ:
Eth termini entà demanar era sollicitud de vòt finalize eth 29 d’abriu de 2023. TERMINI FINALIZAT.
Documentacion entà votar
Eth Burèu deth Cens Electorau envie per corrèu certificat e urgent era documentacion entà votar tara direccion que s’age indicat ena sollicitud.
Eth Burèu deth Cens Electorau a de hèr er enviament, en tot cas, non mès tard deth dia 8 de mai (en cas de que i age recors ara presentacion de candidatures, eth tèrme s’amplie enquiath 16 de mai). Ad aguest tèrme i cau ahíger eth temps que tarde eth corrèu a arribar ena abitança der elector en estrangèr.
Era documentacion enviada includís entà toti aqueri procèssi electoraus que se celèbren eth 28 de mai qu'eth sollicitant hèsque part deth cens:
- Eth certificat d’inscripcion ath cens.
- Es paperetes de votacion, en blanc en cas des eleccions locaus e ara presidéncia des entitats municipaus descentralizades, e paparetes de totes es candidatures en cas des eleccions ath Conselh Generau d’Aran.
- Es envolòpes de votacion, ua entàs eleccions municipaus, ua entàs eleccions ara presidéncia des entitats municipaus descentralizades e ua entàs eleccions tath Conselh Generau d’Aran.
- Còpia des pagines deth BOP dera província a on figuren es candidatures proclamades en municipi d’empadronament (en cas des eleccions municipaus e ara presidéncia dera EMD).
- Era envolòpa dirigida ath president dera mesa electorau que correspone.
- Ua huelha explicativa.
- Un imprès oficiau destinat a hèr possible eth remborsament des despenses de franqueg, se procedís.
Com se vòte
En cas des eleccions tath Conselh Generau d’Aran, s’introdusís era papereta ena envolòpa de votacion e se barre. En cas des eleccions municipaus e des eleccions ara presidéncia des entitats municipaus descentralizades, s’a d’escríuer eth nòm dera formacion politica (o deth candidat/a en cas dera EMD) que se volgue votar ena papereta e s’introdusís era papereta ena envolòpa de votacion. Se se vò votar en blanc, cau barrar era envolòpa sense introdusir-i cap de papereta.
Non ei obligatòri votar en totes es eleccions convocades.
Dempús, s’a d’introdusir ena envolòpa dirigida ath president dera mesa electorau que correspon:
- Era envolòpa o envolòpes de votacion damb era papereta.
- Eth certificat d’inscripcion en cens.
- Er imprès formalizat entath remborsament des despenses de franqueg, se procedís.
Eth certificat d'inscripcion en cens no'e li cau includir ena envolòpa de votacion mès ena envolòpa adreçada ath president dera mesa; eth cas contrari serie vòt nul.
ARREBREMBATZ:
Eth tèrme entà enviar aguesta documentacion per corrèu certificat ara mesa electorau finalize eth 24 de mai de 2023.
Entà qu’aguesti vòts siguen valids, a de constar claraments ena envolòpa ua mèrca postau o ua inscripcion que sigue oficiau d’un Burèu de Corrèus der estat corresponent que certifique qu’er enviament s’a hèt laguens deth tèrme previst.