Contacte
Quini son es organs de govèrn des EMD?
Es organs que compausen es entitats municipaus descentralizades (EMD) son es que seguissen:
- Eth president o presidenta dera EMD, que escuelhen dirèctaments es vesins/es dera entitat peth sistèma majoritari.
-
Eth Conselh de Vesins, qu’ei coma se’n ditz der organ collegiat e ei format peth president o presidenta dera EMD e pes vocaus. Eth nombre de vocaus a d’ésser equivalent ath tèrç des còssos qu’intègren er ajuntament deth municipi d’assignacion dera EMD, e se designen de conformitat damb es resultats des eleccions municipaus ena seccion o es seccions electoraus constitutives dera entitat. Eth nombre de vocaus en cap cas pòt èsser inferior a dus e, quan sigue senar, s’i a d’ahíger un/a vocau mès.
Quines son es competéncies des EMD?
D’acòrd damb çò que dispause eth tèxte rehonut dera Lei municipau e de regim locau de Catalonha, corresponen ara EMD:
- Era survelhança des bens d’usatge public e des comunaus.
- Era conservacion e administracion deth sòn auviatge, includit eth forestau, e era regulacion deth profitament des sòns bens comunaus.
- Er enlumenat public e era neteja viària.
- Era execucion d’òbres e era prestacion de servicis de competéncia municipau d’interès exclusiu dera entitat, quan non son a cargue deth municipi respectiu o dera comarca.
- Era organizacion deth transit de veïculs e de persones en sòn encastre.
- Era conservacion e mantenença des parcs e jardins e der auviatge istoric e artistic deth sòn encastre.
- Es activitats culturaus e esportives dirèctaments restacades ara entitat.
Ath delà, er ajuntament deth municipi d’assignacion dera entitat pòt delegà’i d’autes competéncies municipaus que permeten un exercici descentralizat. Atau madeish, quan era EMD s’age creat en vertut de fusion o d’agregacion de municipis, pòt prestar es servicis que gerie anterioraments eth municipi extinguit.