Contacte
Vòt deth personau embarcat
Eth procediment de votacion entath personau des vaishèths dera marina mercanta o flòta pesquèra de nautor, damb drapèu der estat espanhòu, que les calgue demorar embarcadi pendent eth procès electorau e que pendent eth dit periòde tòquen pòrts en territòri estatau, consistís en un vòt per corrèu damb es especificitats següentes:
- Per radiotelegrafia, corrèu electronic o fax, se sollicitarà, en periòde comprenut entre eth 4 d'abriu e eth 18 de mai (ambdús includidi), eth certificat d’inscripcion en cens electorau e era documentacion entà exercir eth dret de vòt ena delegacion provinciau deth Burèu deth Cens Electorau a on er elector sigue inscrit. En messatge se i mostraràn es dades següentes:
- Nòm e cognòms dera persona sollicitanta.
- Numèro de DNI.
- Data, municipi e província de neishença.
- Municipi de residéncia a on sigue includit en cens electorau.
- Nòm deth vaishèth a on sigue embarcat.
- Pòrt a on age prevista era arribada eth vaishèth, damb indicacion des dates concrètes enes quaus s’age de produsir.
En cas de que se pogue arrecéber era documentacion electorau per miei de un aute vaishèth, aurà d’indicar er armador, consignatari o vaishèth a on se li age d’enviar.
- Era delegacion provinciau deth Burèu deth Cens Electorau corresponent, un còp age verificat era inscripcion dera persona interessada, considerarà a toti es efèctes coma arrecebuda era sollicitud e remeterà era documentacion tath pòrt o tar armador, consignatari o vaishèth qu’er electo age designat, entre eth 8 e eth 21 de mai (ambdús includidi).
- Un còp er elector arrecebe era documentacion electorau, la remeterà tara mesa que li correspon, per corrèu certificat e urgent, non mès tard deth 24 de mai despús quinsevolhe des lòcs a on eth vaishèth hèsque pòrt.
Vòt deth personau en missions en exterior
Eth procediment de votacion entath personau embarcat en vaishèths dera armada, o que, en apartier a unitats militares terrèstres o aerianes, se tròbe destacat dehòra deth territòri der estat espanhòu e que participe o coopère damb es fòrces de païsi aliadi e organizacions internacionaus, en missions d’assisténcia umanitària o mantenença dera patz internacionau, ei eth vòt per corrèu damb es especificitats següentes:
- Eth comandant deth vaishèth o eth cap d’unitat remet era relacion de personau que vò exercir eth dret de vòt tara Direccion Generau de Personau deth Ministèri de Defensa, que tramitarà es sollicituds deth certificat d’inscripcion en cens electorau e era documentacion entà exercir eth vòt enes corresponentes delegacions provinciaus deth Burèu deth Cens Electorau. Entà cada sollicitant se harà a constar:
- Nòm e cognòms dera persona sollicitanta.
- Numèro de DNI.
- Data, municipi e província de neishença.
- Municipi de residéncia a on sigue includit en cens electorau.
- Era delegacion provinciau deth Burèu deth Cens Electorau corresponent, un còp verificada era inscripcion dera persona sollicitanta, considerarà a toti es efèctes coma arrecebuda era sollicitud e remeterà era documentacion tara Direccion Generau de Personau deth Ministèri de Defensa, entà que, peth procediment mès urgent possible, la hèsque a arribar ath destinatari.
- Er elector exercirà eth sòn dret de vòt un còp age arrecebut era documentacion electorau. Des vòts emetudi, se harà cargue eth comandant deth vaishèth o eth cap d’unitat, que les sauvarà e ne garantirà era seguretat, era integritat e eth secrèt, enquia que siguen recuelhudi pera persona encargada de transportar-les en territòri estatau.
- Era Direccion Generau de Personau deth Ministèri de Defensa harà a arribar es vòts arrecebudi tà Corrèus, non mès tard deth 24 de mai. TERMINI AGRANIT enquiath 25 de mai, cada viatge qu'eth depaus des enviaments se hèsque abans dera 14h ath burèu principau de Corrèus en Madrid.
Vòt des persones intèrnes en centres penitenciaris
Es persones intèrnes en centres penitenciaris que non siguen privades deth dret de sufragi pòden votar per corrèu.
En toti es centres s’exposaràn, deuant dera poblacion intèrna, es nòrmes electoraus que regulen eth vòt per corrèu e s’organizarà sessions informatives.
Eth procediment que les cau seguir ei eth següent:
- Eth director de cada centre penitenciari, o era persona en qui delegue, a de sollicitar a Corrèus qu’un foncionari d’aguest servici se desplace ath centre en ua data determinada, comprenuda entre eth 4 d'abriu e eth 18 de mai (ambdús includidi), damb es impresi de sollicitud deth certificat d’inscripcion en cens electorau de besonh entath vòt per corrèu que cau que ramplisquen aquiu madeish es intèrns que volguen exercir eth sòn dret de vòt.
- Se bèth intèrn non a DNI, serà pro damb eth document d’identitat interiora qu’an toti es intèrns des centres penitenciaris, tostemp que i aparegue era fotografia.
- Eth Burèu deth Cens Electorau remeterà ath centre penitenciari es paperetes e es envolòpes electoraus sufisentes, qu’etha trabalhador deth servici de Corrèus liurarà personauments ar intèrn entre eth 8 e eth 21 de mai.
- Er intèrne a d’escuélher era papereta corresponenta, introdusir-la ena envolòpa (o deishar-la ueda se preferís votar en blanc), entà cadun des procèssi electoraus a on desire votar, e introdusir aguesta envolòpa o envolòpes laguens de ua auta envolòpa adreçada ara mesa electorau que correspongue, non mès tard deth 24 de mai.
- Eth servici de Corrèus harà a arribar aguestes envolòpes as meses electoraus corresponentes eth madeish dia des eleccions.