Contacte
Recompde de vòts ena mesa
Finalizada era votacion, cau procedir, de manèra immediata e sense interrupcions, a compdar es vòts. Eth recompde sonque se pòt suspéner per causa de fòrça major.
Eth president dera mesa daurís era urna e n’extrè ua per ua es envolòpes, les daurís e lieg en votz nauta era denominacion dera candidatura votada (o eth nòm deth candidat o candidata en cas des eleccions ara presidéncia des entitats municipaus descentralizades). Eth president a de mostrar cada papereta, un còp liejuda, as vocaus, interventors e apoderadi. Es notaris, en exercici des sues foncions, es candidats e es representants des candidatures, s’an dobtes sus eth contengut d’ua papereta liejuda peth president dera mesa en recompde, pòden demanar que s’examine deuant es membres dera mesa.
Prumèr cau hèr eth recompde des eleccions municipaus, dempús des eleccions ara presidéncia des entitats municipaus descentralizades, s'ei de besonh, e fin finau er escrutinh en tot correspóner as eleccions ath Conselh Generau d’Aran
Era mesa electorau a de:
- Verificar qu’eth nombre d’envolòpes coïncidís damb eth de votants anotadi ena lista numerotada de votants.
- Resòlver es reclamacions e protèstes que pogue auer contra eth recompde, que s’an de resòlver per majoritat des membres dera mesa (president e vocaus).
- Destruïr es paperetes de votacion en preséncia des assistents, trèt des paperetes as quaus s’age negat validesa (vòts nulles) e es que siguen objècte de reclamacion.
Acabat eth recompde, eth president anóncie en votz nauta eth resultat, e especifique eth nombre d’electors censats, eth de certificacions censaus aportades, eth nombre de paperetes nulles, eth de vòts en blanc e eth des vòts obtengudi per cada candidatura (o per cada candidat o candidata en cas des eleccions ara presidéncia des entitats municipaus descentralizades).
Era mesa hè publics es resultats per miei dera acta de recompde e darà ua còpia ath representant dera Administracion e as representants de cada candidatura, as interventors, apoderadi e candidats qu’ac solliciten.
Eth recompde ei public, tota persona pòt presenciar eth recompde des vòts de quinsevolh mesa, sense votz ne vòt. Totun, s’obsèrve quauqua irregularitat, ac pòt manifestar ara mesa en concludir. Era protèsta o reclamacion s’a de hèr a constar ena acta dera session.
Recompde definitiu
Eth recompde definitiu se hè eth 2 de junh.
En cas des eleccions tath Conselh Generau d’Aran lo hè eth Conselh Provinciau de Lhèida, deth temps qu'enes eleccions municipaus e eleccions as entitats municipaus descentralizades lo hè eth conselh electorau de zòna der encastre corresponent. Ei un acte unic, non se pòt interrómper e lo cau finalizar non mès tard der 5 de junh.
Era junta s’amasse damb es representants e apoderadi des candidatures que se presenten. Eth president esten era acta de constitucion.
Era session de recompde comence damb era lectura deth secretari des disposicions legaus. Dempús comence era dubertura des envolòpes (era envolòpa nombre 1 damb era documentacion electorau corresponenta a cada mesa) qu’es presidents de cadua des meses electoraus liurèren eth dia des eleccions en jutjat.
Eth secretari deth conselh s’a d’encuedar des resumits de votacion de cada mesa. Pendent eth recompde, eth conselh non pòt anullar cap d’acta ne vòt; s’a de limitar a verificar eth recompde e era soma des vòts des meses segontes es actes. Sonque se i a un error materiau o de hèt, era junta a de procedir ara sua resolucion.